Oqartussat umiarsuup kivisimasup nalaani suli suliaqarput
Nanortallip eqqaani uuliamit simernerit immami takuneqarsinnaasut, politiit ilisimatitsipput.
Assiliisoq: Leiff Josefsen
Malugiuk: Umiarsuup aqqa ilanngunneqarpoq.
Sisamanngormat ullaakkut umiarsuaq Adolf Jensen unnuap ingerlanerani ikkarlereernerup kingorna Nanortallip avannaani kivivoq. Qujanartumik inunnik ajoqusertoqanngilaq, umiarsuup kivinnginnerani umiarsuarmiittut qimagussortinneqarmata.
Umiarsuup tankia dieselimik 15.000-t 20.000-illu akornanni literimik imaqartoq, motorimullu uulia 1.000 literiusoq, oqartussaasut kingusinnerusukkut nalunaarput.
Umiarsuup kiviffiani oqartussaasut tallimanngornermi suliaqaqqissasut, politiit Sermitsiamut ilisimatitsipput.
Qatserisartut uuliamik mingutsitsisoqarsinnaanera pinngitsoortinniarlugu puttaqutinik assiaqutilersuipput.
Qanoq annertutigisumik mingutsitsisoqarnersoq Kalaallit Nunaanni Politiineersup Jaaku Andreassenip maannakkut oqaatigisinnaanngilaa, inuilli immami uuliamik simernernik naammattuuisinnaasut oqaatigaa.
- Ullumikkut sulineq nangeqqissavarput. Qatserisartut amerlanerusut sisamanngormat sumiiffimmut aggersarneqarsimapput, oqarpoq.
Umiarsuup kivisimanera oqartussanit arlalinnit isumagineqarpoq, ilaatigut politiinit, upalungaarsimasunit, Namminersorlutik Oqartussani Avatangiisinut Upalungaarsimanermullu immikkoortortaqarfimmit aamma Imarsiornermik Aqutsisoqarfimmit.
Adolf Jensen 30 meterisut takitigisoq 7 meterisullu silissuseqartoq politiit nalunaarput.
