Paamiuni inuussutissarsiutillit tammajuitsussarsiniartartullu siunissami piniarsinnaaligassaat qulakkeerneqarput

Umimmaat 19-it Ivittuut eqqaaneersut kiisami Paamiut eqqaanni Sermilik-qeqertaasamut nunassinneqarput. Paamiut kujataatungaanut umimmannik nuussinissamut suliaq ukiualunni ingerlanneqarsimavoq. Pilersaarutip siunissaq ungasinnerusoq isigalugu tammajuitsussarsiniarluni aallaaniartitsisinnaanerit aamma inuussutissarsiutigalugu piniariarsinnaaneq periarfissaqartissavaa, taamak ilisimatitsivoq Kommuneqarfik Sermersooq nittartakkamini.

- Suliniut taanna Paamiunut arlalinnik periarfissiivoq, tamannalu aamma kommunitsinni pitsaasumik malugisinnaassavarput. Piniartunut, takornariartitsisartunut kisianni aamma Paamiuni innuttaasunut allanut iluaqutaassaaq, arlalinnik sammisassaqartitsissagami. Taamatut annertutigisumik angusaqarsinnaagatta nuannaarutigaarput, borgmesteri Avaaraq Olsen oqarpoq.

2017-mili kissaat naammassineqarpoq

2017-imili – Henrik Rachlevimit – kissaatitut saqqummiunneqarpoq Paamiut kujataanut qeqertaasamut umimmannik nuussisoqassasoq. Assigiinngitsunik peqquteqartumik suliniut piffissami taamanikkut aallartinneqanngilaq. Paamiuni Inuussutissarsiornermut Siunnersuisoqatigiinni ilaasortamit umimmannik qeqertaasamut nuussisoqarnissaanik kissaatigisaq aammaarluni 2021-mi saqqummiunneqarpoq.

Pilersaarut kommunit killeqarfii qaangerlugit piginnaasanik ataatsimoorussinermut assersuutissatsialaavoq. Ikiortaapput aalisartut piniartullu peqatigiiffiat, Paamiormiut, aamma Nuummiut, suliatigut pilersaarummut aqutsisut Arsummeersuupput, aamma savaatilik Qaqortumeersoq peqataavoq. Paamiuni Inuussutissarsiornermut Siunnersuisoqatigiit, Kommunalbestyrelsimi ilaasortat Paamiuneersut aamma innuttaasut kissaatigaat sumiiffimmut Paamiunut qanittumut umimmannik nuussisoqassasoq innuttaasunut amerlasuunut illoqarfimmullu iluaqutaasumik.

- Massakkut umimmaat Paamiut kujataatungaanut nuunneqarput, inuillu pikkorissut ikiortigalugit tamanna pivoq. Umimmaat katersorpaat Ivittuuniillu pramimi usillugit angallallugit, Sermersuumi Inuussutissarsiornermut immikkoortortami pilersaarummi aqutsisoq Susanne Bisgaard Rasmussen oqarpoq.

- Ukiut qulit utaqqeqqaarlugit piniarneqarsinnaalissapput

Nuussinissaq ukioq kingulleq pissasoq pilersaarutaasimagaluarpoq, kisianni ajornartorsiuteqarmat pilersaarut ukioq mannamut kinguartinneqarpoq.

- Suliaq sivisuumik ingerlanneqarsimavoq, kisianni pilersaarutip ilungersunarnissaa nuussinertalik massakkut naammassisimalerpoq. Kommuneqarfik Sermersuumit massakkut aqutsinissamut pilersaarut aqqutigalugu umimmaat pitsaasumik atugaqarnissaat uumasoqatigiillu amerliartornissaat qulakkeerneqassaaq. Naatsorsuutigisinnaavarput ukiut qulit missaannik “utaqqineq sivisussuseqassasoq” umimmaat piniarneqarsinnaalernissaannut; amerliniassagamik eqqissisimaaqqaassapput,  Susanne Bisgaard Rasmussen oqarpoq.

Sermersuumi Inuussutissarsiornermut immikkoortortamit nuannaarutigineqarpoq, pilersaarutip pingaarnersaa kiisami naammassineqarmat.

- Najukkami sulisut, iliuuseqarneq aammalu tunniutiinnajuitsuuneq piginngikkutsigu tamanna piviusunngorsimanavianngikkaluarpoq. Innuttaasut kiisalu aalisarnermut aamma piniarnermut naalakkersuisoqarfik suleqatigilluarnerinut qujarujussuarpugut, Susanne Bisgaard Rasmussen oqarpoq.