Paaqqinnittarfimmi pissutsit isornartorsiornartorpassuit nakkutilliinerup ersersippai

Nakkutilliinermik Ingerlatsivik marsimi siumut kalerreereerluni ulloq unnuarlu paaqqinnittarfimmut Amarumut pulaareernerup kingorna, arfinilinnik peqqussuteqarpoq 19-inillu innersuussuteqarluni.

Paaqqinnittarfiup pitsaassusianut tunngatillugu nakkutilliisoqarfik ilaatigut ima naliliivoq:

• Paaqqinniffik pisariaqartinneqartumik pitsaassuseqartuaannanngitsoq, Nakkutilliinermik Ingerlatsivimmit nalilerneqarpoq.

• Immikkoortortami ataatsimi katillugit 8+1-imik inissaqarnissamut ulloq unnuarlu paaqqinniffiup akuersissutaani piumasaqaatit ulloq unnuarlu paaqqinniffimmit naammassineqanngitsut, Nakkutilliinermik Ingerlatsivimmit nalilerneqarpoq.

• Paaqqinniffimmi najugaqartut 20-iusut immikkoortortallu pingasuusut, Nakkutilliinermik Ingerlatsivimmit paasineqarpoq.

• Paaqqinniffik akuerineqarani annertuunik allannguisimasoq, nakkutilliinermut atatillugu Nakkutilliinermik Ingerlatsivimmit paasineqarpoq.

• Paaqqinniffik immikkoortortanut marlunnut nutaanut katillugit aqqanilinnik inissalinnut akuersissummik qinnuteqarsimanngilaq.

• Paaqqinniffiup immikkoortortanik nutaanik ammaatinnani akuersissummik qinnuteqaqqaarsimannginnera Nakkutilliinermik Ingerlatsivimmit isornartoqartinneqarpoq.

• Ulloq unnuarlu paaqqinniffiup Naalakkersuisullu akornanni ingerlatsinermut isumaqatigiissut ulloq unnuarlu paaqqinniffimmit naammassineqarsimanngitsoq,  Nakkutilliinermik Ingerlatsivik naliliivoq.

• Ulloq unnuarlu paaqqinniffik ileqqoreqqusamini piumasaqaatinik naammassinnittuaannanngitsoq, Nakkutilliinermik Ingerlatsivimmit paasineqarpoq.

Nakkutilliinermik Ingerlatsiviup nakkutilliiartornerani nakkutilliinerup malitsigisaanik marlunnik nalunaaruteqartoqartoq, tassunga atatillugu ilisimatitsissutaavoq.

Ingerlatsinermut isumaqatigiissut pillugu

Ingerlatsinermut isumaqatigiissut pillugu pissutsit eqqarsaatigalugit, amerlasuut naammassineqarsimanngillat:

• Paaqqinniffik Qitiusumik Inissiinissamut Innersuussisarfimmik atuinngilaq.

• Paaqqinniffik ulloq unnuarlu paaqqinniffimmut akuersissummi piumasaqaatinik sunniuteqarsinnaasunik allannguinernik Isumaginninnermut Aqutsisoqarfimmut ilisimatitsineq ajorpoq.

• Paaqqinniffimmi aqutsisut (qullersat) paaqqinniffiup atuunneranut suliassaanullu akisussaaffimmik tamakkiisumik tigusinngillat.

• Paaqqinniffiup pissaanermik atuinerit nalunaarutigineq ajorpai.

• Paaqqinniffik Manngua 25-mut tunngatillugu illuutinut, qatserisartoqarnermut aamma uumasunut nakorsaqarfimmi oqartussanit akuersissutinik takutitsisinnaasimanngilaq.

• Taamungaannaq tigooqqaalluni misissuinermi, sulisunut misissorneqartunut tamanut pinerluuteqarsimannginnermik meeqqanillu innarliisimannginnermik, uppernarsaatinik  paaqqiinniffik takutitsisinnaasimanngilaq.

• Paaqqinniffiup malittarisassaani pillaanermik atuisoqartarneranut assersuutissanik nassaartoqarpoq.

Akuersissut annertuumik sanioqqutaarneqarsimappat tamanna ingerlatsinermut isumaqatigiissutip atorunnaarsinneqarneranik kinguneqarsinnaasoq, Nakkutilliinermik Ingerlatsiviup paaqqinniffimmut erseqqissaatigaa. Ingerlatsinermut isumaqatigiissutip atorunnaarsinneqarnerani paaqqinniffimmut akuersissut arsaarinnissutigineqassaaq.

Peqqussutit arfinillit

Nakkutilliinermik Ingerlatsiviup nalunaarusiaanni peqqussutit arfinillit uku allassimapput:

• Paaqqinniffiup sullitanut nassuiaataa sullitat immikkut pisariaqartitaat ukkataralugit paaqqinniffimmit aaqqissorneqarlunilu nutarterneqassasoq, Nakkutilliinermik Ingerlatsivimmit peqqussutigineqarpoq.

• Periaatsit illersorneqarsinnaasut, sullitanut naleqquttut najugaqartullu atugarissaarnerinut ineriartornerinullu tapersersuisut aallaavigalugit paaqqinniffiup sulinissaanut Nakkutilliinermik Ingerlatsivik peqqussuteqarpoq.

• Ingerlatsinermut isumaqatigiissut kiisalu Meeqqanut ulloq unnuarlu paaqqinniffinnik pilersitsineq ingerlatsinerlu pillugit Namminersorlutik Oqartussat nalunaarutaat naapertorlugit, Qitiusumik Inissiinissamut Innersuussisarfimmik qullersat atuisassasut Nakkutilliinermik Ingerlatsivimmit peqqussutigineqarpoq.

•  Akuersissummut tunngaviusumut, tamatumani saniatigut sammisanik aallartitsinernut tunngatillugu annertuumik allannguinerit pillugit, paasissutissanik Isumaginninnermut Aqutsisoqarfimmut paaqqinniffik nammineerluni ingerlaannarlu nalunaaruteqartassasoq Nakkutilliinermik Ingerlatsivimmit peqqussutigineqarpoq.

• Paaqqinniffiup akuersissutaani piumasaqaatit tamaasa aqutsisut naammassissagaat Nakkutilliinermik Ingerlatsivimmit peqqussutigineqarpoq.

• Inatsisit nalunaarutillu atuuttut ataani allassimasut qullersanit malinneqarnissaat siulersuisunit qulakkeerniarneqassasoq Nakkutilliinermik Ingerlatsivimmit peqqussutigineqarpoq.

Amarok ulloq unnuarlu paaqqinnittarfiuvoq imminut pigisoq, pisortamit Inunnguaq Fleischerimit aqunneqartoq.