Paarisa ukiumoortumik nalunaarusiaq pillugu: Anguniagarput suli angunngilarput

Paarisa, Brugseni, Pilersuisoq Pisiffiullu akornganni suleqatigiinneq ´Kattulluta Inuuneritta – Sammen om det gode liv´ 2020-2030-mi peqqissumik ineriartorneq anguniarlugu, atuisut peqataatillugit peqqinnerulerneq atugarissaarnerulernerlu ataatsimut suleqatigiissutigaat.

- Allatut oqaatigalugu ataatsimut anguniagaqarnitsinnik qanoq angusaqarluta suliniuteqarnitsinnik ataavartumik oqaloqatigiippugut. Ukiut tamaasa ataatsimut anguniagaqartarpugut, pisiniarfiillu namminneq najukkami atukkaminnut naleqqussarlugit suliniuteqartarput, taamaalillutalu qulakkeertarparput peqqinnartunik nioqquteqarnerunissaq, Paarisamiit Linnea Katharina Möger Sermitsiamut oqarpoq.

Suleqatigiit ukiut tamaasa anguniagaqartitsisarput, pisiniarfiillu anguniakkat angunissaat qulakkeerniarlugu iliuuseqarnertik naleqqussartarpaat. 2023-mi anguniarneqarpoq naatitat qerisut, naatitat nutaat kiisalu nioqqutissanik matuersaaserfimmik ilisarnaatilinnik tunisaqarnerulernissaat. Suleqatigiit 2023-mi anguniakkatik ingerlatiinnassavaat, imeruersaatinillu aalakoornartortaqanngitsunik tunisaqarnerup annerusinissaat suleqatigiit aallartippaat.

Peqqissuunerup siuarsarneqarnissaa

Paarisa peqqissutsimut siuarsaanermik periuseq naapertorlugu sulivoq, tassa Inuuneritta III naapertorlugu, tassani oqaloqatigiinneq suleqatigiinneq aqqutigalugu iliuuseqartitsineq sammineqarpoq. ’Kattulluta Inuuneritta - Sammen om det gode liv’ suleqatigiinneruvoq inuit peqqissusaannut unammilligassat pitsaanerpaamik aaqqinneqarsinnaanera anguniarlugu.

Ukiumoortumik nalunaarusiami ’Kattulluta Inuuneritta - Sammen om det gode liv’-mi takuneqarsinnaavoq naatitat 2023-mi tunineqarnerpaat sisamaanni qulingiluaannilu inissisimasut. 2022-mi ukiumoortumik nalunaarusiami naatitat tunineqarnerpaat pingajuattut arfineq-aappaatullu inissisimapput. 2022-mili ukiumoortumik nalunaarusiami nioqqutit tunineqarnerpaat 15-it 2023-mi nioqqutit tunineqarnerpaanut 30-nut tamakkiisumik sanilliunneqarsinnaanngitsut, Paarisamit oqaatigineqarpoq:

- 2022-mi tunisaanerpaat 15-it 2023-mi tunisaanerpaanut 30-nut toqqaannartumik sanilliunneqarsinnaanngillat, naatsorsueriaatsip nutarterneqarnera pissutigalugu, taamaalilluni siunissami eqqornerusumik annertunerusumillu nalunaarsugassaqassaagut, Linnea Katharina Mögerip oqaatigaa.

Anguniagaq suli anguneqanngilaq

Ukiumoortumik nalunaarusiami nioqqutissat tunineqarnerpaat 2023-mi tunineqarsimasut kisiisa isiginiaraanni naatitat tunineqarsimasut ikileriarsimagaluartut, naatitat nutaat 2023-mi ukiup siulianut sanilliullugit 1 procentimik tunineqarnerulersimapput. Paarisap, Brugsenip, Pilersuisup Pisiffiullu ataatsimut anguniagartik anguniarlugu suleqatigiittuarniarput.

-Anguniagarput suli angunngilarput, taamaattumik suleqatigiinnerup sulissutigiuassavaa nerisassat peqqinnartut tunisat kaaviiaartitaannut annerpaartaanissaat. Taamaattumik suleqatigiinnerup angusai paasissutissallu ingerlateqqinnissaat pingaartipparput, taamaalilluni innuttaasut aamma nerisassat peqqinnartut tunisat amerliartornissaannut peqataatinneqassapput, Paarisami suliniummi aqutsisoq Linnea Katharina Möger oqarpoq.