Paasisavut 2024: Ilisimatusarneq inunnit nuannarineqarluarpoq
Arctic Hubip pingasunngornermi Nuummi takutitassiaq ilisimatusarnermik aliikkusersuinermillu imaqartoq inunnik ulikkaarluinnartoqassasoq naatsorsuutigaa. Peqataasut tallimat ajugaanniutivinnerat inuusuttut ilisimatusarnissaannut isumassarsiorfiussaaq.
Pingasunngornermi unammisoqarnissaani ajugaaniutivittussat tallimat qinnuteqartut 21-t akornannit toqqarneqarput, taakkualu Kalaallit Nunaanneerlutik, Danmarkiminngaanneerlutillu Skotlandimeersuupput.
Arctic Hub-imit tusagassiuutitigut atortussiat
Paasisavut 2024-mut piareersarneq aallartingajalerpoq, ilisimatusartullu peqatigiiffiat Arctic Hub ilisimatusarnermik aliikkusersuinermillu nunarsuarmi pitsaanerpaamik neriorsuivoq. Ajugaaniutivittussat tallimat issittumi pissutsit assigiinngitsut pillugit ilisimatusarnerminnik kikkut tamarmik peqataaffigisinnaasaannik saqqummiussinissamut unammissapput.
Inuppassuit isiginnaariarniarlkutik aamma nalunaareersimapput. Nuummi Katuami pingasunngornermi novembarip 13-ianni nalunaaqutaq 19.30 aliikkusersuinissamut isissutissani akeqanngitsuni 400-suni sapaammi 350-init amerlanerusut inniminnerneqareersimasut aaqqissuisut ilisimatitsipput.
- Tamanna innuttaasut ilisimatusarnermik soqutiginninnerannink ersersitsilluarpoq - ingammik ilisimatusartut
tamatta ilisarisinnaassatsinnik ilisimatusarnertik pillugu oqaluttuarsinnaagaangata, Nicoline Larsen, Arctic Hubimi attaveqatigiinnermut akisussaasoq oqarpoq.
Maligassiuisut
Ajugaaniutivinnermi peqataasut ph.d.-mik suliaqarnerminnik minutsit tallimat ingerlaneranni isiginnaartunut tv-milu isiginnaartunut saqqummiussissapput. Ajugaasoq 50.000 koruuninnassaaq, tamatumalu saniatigut Kalaallit Nunaanni inuusuttut ilisimatusarneq pissanganartuusoq immaqalu allaat inuunermi ingerlavissaasinnaasoq paasissavaat.
- Ajugaaniutivinniartut maligassiuisutut inuusuttut amerlanerusut Nunatsinni ilisimatusarnermik suliaqarnissaannik kajumissaarisinnaasutut isigaagut, Nicoline Larsen oqarpoq.
Ajugaanniutivittussat tallimat taakkualu ph.d.-nngorniutaat makkuupput (assimi qulaaniittumi saamerlermiit):
Natacha Severinip suliniutaa 'Kalaallit Nunaanni qalerallit uumassusilittut allanngorarnerat'
Lokesh Jainip suliniutaa 'Sikkussat serminik iigartartunik allanngoriartortitsinerannik takussutissiaq'
Kirstine Eiby Møllerip suliniutaa ’Nunasiaataanermi kulturikkut naapeqatigiinnerit’
Regine Møllerip suliniutaa ’Piujuartitsilluni ineriartortitsineq: nunasiaataaneq, nunasiaataajunnaarsaaneq nunallu inuiisa isumaat
Mie Møllerip suliniutaa ’Kalaallit Nunaanni COVID-19-imik nappaalanersuaqarneranut isiginnittaatsit'
Naliliisartut tassaapput professori Minik Rosing, isiginnaartitsisartoq nipilersortartorlu Nukâka Coster-Waldau kiisalu ph.d.-itut ilinniagalik ineriartortitsinermilu pisortaq Rosannguaq Rossen.
