Palæstina pillugu Nuummi akerliussutsimik takutitsineq
Kulturikkut suliaqartut arlallit Palæstinamik tapersersuillutik akerliussutsimik takutitsissapput.
Nunarsuarmi sumiiffippassuit Israelip Hamasimut sorsunneranut akerliussutsimik takutitsiviusimapput, Nuullu takutitsivissatut ilannguppoq.
Taamaattumik pingasunngorpat Nuummi akerliussutsimik takutitsinissamut kulturikkut suliaqartut arlallit qaaqqusipput, tassani atajuartussamik sakkulersorluni akiuukkunnaarnissap tapersersorneqarnera oqariartuutigineqarpoq oqaasinnaaq una atorlugu; INUIT FOR PALESTINE.
Akerliussutsimik aallartitsisut
Alfred Victor Hansen
Aka Niviana Mørch Pedersen
Laura Lennert Jensen
Mudi Kramer Berthelsen
Nina Kreutzmann Jørgensen
Nivi Pedersen
'Gazami inuiannik nungusaaneq' massakkut ingerlasoq isigalugu, Múte B. Egede ersarissumik nalunaaruteqarnissaanik akerliussutsimik ingerlatsisut kissaatigalugu, tusagassiuutinut nalunaarummi allapput.
- Atajuartussamik sakkulersorluni akiuukkunnaarnissaq kissaatigaarput, nunarsuarmilu tamarmi akerliussutsimik takutitsisunik tapersersuingaarpugut.
- Siornatigut Múte B. Egedep Ukrainemut tapersersuinini takutinnikuuaa, Danmarkimilu naalakkersuisut Ruslandimut pillaatitut iliuutsinut tunngatillugu tapersersuilluni, Ukrainellu innuttaasuinut Ruslandip sorsunneranik isumaqatiginninnginnerminik takutitsinikuulluni. Sooq maanna Gazami inuiannik nungusaasoqarnerani nipangersimaannarpa, nalunaarummi aperisoqarpoq.
Akerliussutsimik takutitsineq pingasunngornermi juunip aqqaneq-aappaani nal. 15:00 Nuummi pissaaq.
- Eqqissisimasumik ersoqatiginnittumillu akerliussutsimik takutitsinissamut kajumissaarivugut, illoqarfiillu allat taamaasiornissaannik kajumissaaraluta.
