Partiimi siulittaasoq USA-mi qinersisoqarnerani nalliuttorsioqataasoq: Misigisaq nuannersoq
Atassutip siulittaasua Aqqalu C. Jerimiassen Folketingimi Lagtingimilu aallartitat amerlasuut ilagalugit New Yorkimiippoq, Amerikamilu qinersineq qanimut malinnaaffigisimavaa.
Aqqalu C. Jerimiassen New Yorkimiippoq marlunngormallu Republikanerit qinersinermi nuannatsitsinerat najuuffigaa.
Assiliisoq: Atassut
Marlunngormat USA-mi præsidentimut qinersisoqarpoq, Atassutillu siulittaasuata Aqqalu C. Jerimiassenip pisut qanimut misigisimavai, maannakkorpiarmi USA-mi sivisuumik angalavoq.
- Inuit maaniittut qinersineq soqutigingaaraat malunnarpoq, aappaatigulli pissutsit nalinginnaalluinnartutut ingerlapput.
- Taamali qanitsigisumik Amerikami qinersisoqarnera misigisimagakku nuanneqaaq, Aqqalu C. Jerimiassen Sermitsiamut oqarpoq.
Aqqalu C. Jerimiassen Inatsisartuni, Folketingimi Lagtingimilu politikkerinit aallartitat ilagaat.
Republikanerit qinersinermi nalliuttorsiornerani najuuttoq
Marlunngornermi politikerit New Yorkimi qallunaat konsulateqarfiannit qinersineq malinnaaffigisimavaat, unnukkullu kingusinnerusukkut qinersinermi nuannaartoqarnerani Aqqalu C. Jerimiassen peqataasimavoq, tassani Atassutip siulittaasua republikanerit qinersinermi nuannaartitsineranni peqataasimalluni, oqaluttuarpoq:
- Nunami maani inuit qanoq iliortarnersut paasiniarlugu qinersinermi nuannatsitsisunukarpugut. Ilaat Harrisip nuannatsitsineranukarput.
- New Yorkimi Demokraatit qinerneqarnerpaasaraluartut, aamma Republikanerit qinersinermi nuannatsitsinerat ingerlanneqarpoq, tassungarpungalu. Tamatsinnut pissanganaqaaq, Aqqalu C. Jerimiassen oqarpoq.
Politikeri naapertorlugu aallartitat angalanerminni Kamala Harrisip Donald Trumpillu qineqqusaarutigisaat sukumiisumik misissoqqissaarneqarnikut pillugit saqqummiivigineqarsimapput.
Partiip siulittaasua oqarpoq qinigassanngortittut tamarmik iluaqutissartaat ajoqutissartaallu takusimallugit, maannalu Trumpip USA-mi præsidentinngortinneqarnissaa Kalaallit Nunaata naleqqussarfigisariaqaraa oqarpoq, soorlu piffissami kingullermi Bidenip aqutsineranut naleqqussartoqarsimasoq.
