Trump Jr.-ip qanittukkunni Nuummut minnera – kingornalu
nittartakkatigut isummaminnik siammarterisunik taaneqartartut
ilaatigut aningaasanik 100 dollarinik Nuummi aqqusinermi meeqqanut
agguaanermikkut aalassatsitsinerat, uitsatigineqarpoq.
Pisut Kalaallit Nunaata
nunanit allanit soqutigineqaraluttuinnarnerannik ersersitsipput.
Trump Jr.-ip qanittukkunni Nuummut minnera – kingornalu
nittartakkatigut isummaminnik siammarterisunik taaneqartartut
ilaatigut aningaasanik 100 dollarinik Nuummi aqqusinermi meeqqanut
agguaanermikkut aalassatsitsinerat, uitsatigineqarpoq.
Pisut Kalaallit Nunaata
nunanit allanit soqutigineqaraluttuinnarnerannik ersersitsipput.
Soqutiginninneq ukiuni tulliuttuni annikillinaviarpasinngilaq –
ilaatigut Kalaallit Nunaata nunani tamalaani politikkikkut
inissisimanera ilaatigullu takornariat nunanit allaneersut
amerliartorneri pissutigalugit.
Tamannattaaq Kalaallit
Nunaanni Politiinut, Kalaallit Nunaata umiarsualiviini mittarfiinilu
killeqarfinnik nakkutilliinermut akisussaasuusunut, ulapititsivoq.
Pissutsit nutaat pissutigalugit Kalaallit Nunaanni Politiit nunanit
allaneersunik killeqarfinnillu nakkutilliinermik immikkut
suliaqartussanik siorna apriilimi aallarniivoq.
- Nunanit allaneersunik
killeqarfinnillu nakkutilliinermik suliaqartussat pingasunik
sulisoqarput. Uanga politeeqatiga kiisalu allaffissornermik
suliaqartoq, politikommissær Hans Jakob Frederiksen,
immikkoortortami nutaami aqutsisuusoq, oqaluttuarpoq.
Oqartussat
suleqataasut
- Immikkoortortap
siullertut sumi qanorlu killeqarfinnik nakkutilliisoqassanersoq
suussusersillugulu aalajangertassavaat. Taamaammat Kalaallit Nunaanni
Politiit suliaqarfimmi oqartussanik, matumani mittarfeqarfinni
umiarsualiveqarfinnilu oqartussanik, qanimut ingerlalluartumillu
suleqateqarput.
- Angalasut mittarfinni
passinik misissuisarfinni uagorpiaat naapittariaqanngilaatigut,
suliassarli pilersaarusiorlugulu sumi qanorlu iliuuseqartoqassanersoq
aalajangertarparput.
Killeqarfinnik
nakkutilliineq tunngaviusumik Kalaallit Nunaanni Politiini sulisunit
kikkunnilluunniit suliarineqarsinnaavoq. Kikkut qanorlu amerlatigisut
pisumi aalajangersimasumi aalajangerneqartassapput.
Politiit killeqarfinnik
nakkutilliinermik suliaqarneranni ersarinnerpaaq angalasut
amerlanerit Danmarkimiit nunamiilluunniit allamiit timmisartumut
ilaasartaammut ilaallutik Kalaallit Nunaanni mittarfimmut tikittartut
nalunngilaat – tassanilu politiit igalaap tunuani killeqarfinnik
nakkutilliisarput.
Tassani tikittut
tamarmik, EU-mi innuttaasut innuttaasuunngitsullu, passii
misissorneqartarput. EU-mi innuttaasuunngippata angalasut suna
siunertaralugu angalanersut, sumiissanersut aqagulu angerlassanersut
arlalinnik apeqquteqarfigisarpaat.
Schengenimut
ilaanersut paasiniarlugu
- Aammattaaq angalasoq
Schengenimut ilaanersoq misissortarparput. Innuttaasut EU-mut
Schengenimullu ilaasortaanngitsut tamarmik Danmarkip nunallu
najugaqarfigisaata akornanni immikkut isumaqatigiissuteqanngikkunik
Schengenimi ulluni 180-iusuni ullut 90-iinnaat
nunaniissinnaatitaapput, taamaappallu immikkut
malittarisassaqarsinnaallutik. Piffissaq taanna qaangiuppat
angerlamut aallartariaqarput, tamatumalu kingorna ullunik
tikissinnaatitaaffinnik katerseqqissinnaapput, Hans Jakob Frederiksen
ilisimatitsivoq.
- Tamatuma saniatigut
nunat ilaanneersut Kalaallit Nunaannut tikissagunik
visumeqaqqaassapput, passinillu misissuinitsinni tikittoq
visumeqartussaanersoq allagartallu eqqortut tamaasa piginerai
nalilersortarparput. Killeqarfinnik nakkutilliisup tikittoq
tikinnissaminut piumasaqaatit tamaasa eqquutsissimanngippagut
itigartissinnaavaa.
Kalaallit Nunaanut
tikinnermi timmisartuni ilaasartaatiniinnaanngitsoq killeqarfinnik
nakkutilliisoqartarpoq. Aamma timmisartut inuinnarnit pigineqartut
umiarsuillu nakkutilliivigineqartarput. Tamanna mittarfeqarfinni
umiarsualiveqarfinnilu oqartussat qanimut suleqatigalugit pisarpoq.
- Schengen
naapertorlugu killeqarfinni periusissaq malillugu umiarsuit tamarmik
tikinnissartik umiarsualivinni oqartussanut nalunaarutigissavaat,
timmisartumillu tikittussat tikinnissartik Greenland Aiportsimut
nalunaarutigissavaat. Mittarfeqarfinni umiarsualiveqarfinnilu
oqartussat kingorna killeqarfinni nakkutilliisoqassappat Kalaallit
Nunaanni Politiit suleqatigissavaat.
Suleriaaseq
sungiusimasaq – amerlanertigut
Kalaallit Nunaannut
tikittut amerlanerpaat tassa politiinit nakkutigineqartarput.
Suleriaaseq sungiusimaneqarpoq pissanganartoqaranilu –
amerlanertigut.
Immikkulli
pisoqartarpoq. Kalaallit Nunaanni Politiit russit
ilisimasassarsiortut biilinik nunakkoorutinik avannaaniit Kalaallit
Nunaannukariarlutik sermersuakkoornialersut siorna maajimi Station
Nordimut ornippaat.
- Ilisimasassarsiortut
Kalaallit Nunaata avannarpiaanut tikikkamik Siriusimit, nunami
allanngutsaaliukkami sakkutuutut politiitullu
oqartussaassuseqartunit, naapinneqarput. Qimussertut
ilisimasassarsiortut ilaasuilu ajunnginnersut kiisalu
ilisimasassarsiortut oqartussat innersuutaat paasisimaneraat
qulakkeerniarlugu ilisimasassarsiortunut saaffiginnipput, Kalaallit
Nunaanni Politiit tusagassiutitigut nalunaarummi ilisimatitsipput.
Ilisimasassarsiortut
kingorna Station Nordiliaanneqarput, taannalu Schengenip avataaniit
Kalaallit Nunaannut tikinnermi killeqarfinnik nakkutilliisoqarfiit
qaninnersaraat. Tassani ilisimasassarsiortut ajortoqassagaluarpat
ikiorserneqarnissaannut ulorianarpallaarnera pissutigalugu
ilisimasassarsiornissaq itigartitsissutigineqarpoq.
- Peqataasut
amerlanersaattaaq nunanit allaneersut pillugit inatsit naapertorlugu
itigartinneqarput. Kunngeqarfimmiinnissaat kissaatigineqanngitsoq
nunalu qimassagaat nalunaarfigineqarput. Periuseq ataasiinnaq
atorlugu tamanna pisinnaavoq. Tassa Svalbardimiit timmisartumik
tikisitseriarlutik pinngitsaalillugit ikisillugit. Peqataasuni
marluinnaat visumii ajunngillat, politiit pisortaat Bjørn Bay pisup
kingorna oqaluttuarpoq.
