Namminersorlutik Oqartussat ingerlatseqatigiiffiutai aktieselskabit amerliartuinnartut politikkikkut aalajangikkamik pilersinneqarsimapput pisortat ingerlatsiviitut politikkikkut inuiaqatigiinni suliassat ingerlanneqarsinnaaqqullugit.
Taamaakkaluartoq sukkasuumik equngasumik unammillertutut inissisimallutik ineriartupallattarput, unammilleqatigiinnermut akornusersuutaasinnaasunik politikkikkullu sammiveqarlutik suliaqarlutik, Naleqqap siulittaasua Pele Broberg isumaqarpoq.
Namminersorlutik Oqartussat ingerlatseqatigiiffiutai aktieselskabit amerliartuinnartut politikkikkut aalajangikkamik pilersinneqarsimapput pisortat ingerlatsiviitut politikkikkut inuiaqatigiinni suliassat ingerlanneqarsinnaaqqullugit.
Taamaakkaluartoq sukkasuumik equngasumik unammillertutut inissisimallutik ineriartupallattarput, unammilleqatigiinnermut akornusersuutaasinnaasunik politikkikkullu sammiveqarlutik suliaqarlutik, Naleqqap siulittaasua Pele Broberg isumaqarpoq.
- Pisortat ingerlatseqatigiiffii unammilleqatigiinnermut akornusersuutaasinnaasunik suliaqaannartanngillat, aammali namminneq imminnut aqutarilertarput iluminni nammineq ilusilersukkaminnik ingerlasilertarlutik, piginnittullu oqaasissaarutsitaasutut inissisimalertarput siulersuisorpassuit aqutsisunngortinneqartarmata, taakkulu saniatigut ikigisassaanngitsunik akissarsiaqartinneqarput, aamma ingerlatseqatigiiffiit aningaasaliisinneqartarput aningaasarpassuit atorlugit, allaat inuiaqatigiit noqqaassutigingikkaluagaannut, Pele Broberg (N) oqarpoq.
SOV'itut allanngortinneqartariaqarput
Inuiaqatigiinnut iluaqutaasumik aamma namminersorlutik inuussutissarsiortunut iluaqutaasumik, Pele Broberg isumaqarpoq, ingerlatseqatigiiffiit arlalissuit "Pisortat Suliffeqarfiutaat Namminersortuutitat" (danskisut SOV'itut) imaluunniit assingusumik allanngortinneqarpata tamanut iluaqutaassasoq.
- Piginnittuunermut politikkip eqeersimartumik ingerlanneqarnissaa pisariaqartipparput, ingerlatseqatigiiffiit imminnut aqullutillu oqartussaalertarnerannut taarsiullugu. Aamma pisariaqartitsivugut politikkikkut sakkussaqarnissatsinnik, suliassat inuiaqatigiinnut pingaarutillit qanoq naammassiniarneqarnissaannik tikkuussisinnaanissatsinnut. Naammagiinnarsinnaanngilarpummi Naalakkersuisut piginnittunut sinniisutut ingerlatseqatigiiffiit ataatsimeersuartarneranni annikitsumik oqaaseqaannartarnerat, kingornalu siulersuisunut isumagisassanngortitsilluta, ingerlatseqatigiiffiummatalu qanoq ingerlanneqarnerat politikkikkut sunniuteqarfigineqassanngitsoq akuliuffigineqarsinnaanngitsullu utoqqatsissutaaginnarsinnaajunnaarpoq.
Aalajangiiffigisassatut siunnersuummik saqqummiussissamaarput
Naleraq arlaleriaqaluni siunnersuuteqarnikuuvoq namminersorlutik oqartussanit pigineqartut aktiaatilittut piginneqatigiiffiit allannguutissanik ingerlatsinerup pitsanngorsarnissaa siunertaralugu aammalu ersarinnerulersitsinissaq anguniarlugu, amerlanerussuteqartunilli ilalerneqarnissaa iluatsinneq ajorlugu.
Partii isumaqarpoq ingerlatseqatigiiffiit pitsaanerusumik akikinnerusumillu ingerlanneqartariaqartut, aammalu siulersuisuni ilaasortat akissarsiaasa ersarinnerulersinneqarnissaat pisariaqartoq.
- Taamaattumik Naleqqamiit isumaqarpugut inuiaqatigiinnut iluaqutaassasoq taakku pisortat aqutaattut SOV-itut allanngortinneqassappata, imaluunniit aaqqissuussinerit tassunga assingusunngortinneqarpata. Taamaattumik tamanna pillugu Inatsisartunut siunnersuummik saqqummiussinissarput pilersaarutigaarput, Pele Broberg oqarpoq.
Naalakkersuisut siulittaasuat oqaaseqartinniarlugu Sermitsiamit sulissutigaarput.
