Illittaaq Kalaalit Nunaata nalunaaqutaata aappaagu qanoq issanersoq paasissallugu soqutigaajuk?
Taamaappat paasisaqarfiginissaanut naammagittarlutit utaqqisariaqassaatit. Nalunaaquttammi ingerlaaqatigiiffiata UTC-3-mut utertinnissaanik siunnersuutit marluk ukiuunerani ataatsimiinnissamut kinguartinneqarput.
Illittaaq Kalaalit Nunaata nalunaaqutaata aappaagu qanoq issanersoq paasissallugu soqutigaajuk?
NUNATSINNI NALUNAAQUTTAT INGERLAAQATIGIIFFII
Kalaallit Nunaanni nalunaaquttap ingerlaaqatigiiffii assigiinngitsut pingasuupput.
Nunap annersaani UTC-2-uvoq.
Pituffimmi sakkutooqarfik Amerikap kangiata nalunaaqutaa malillugu UTC -4-miippoq.
Tunumi Nationalparkimi silasiorfik Danmarkshavn UTC +0-miippoq.
Kitaani Tunumilu nalunaaquttap ingerlaaqatigiiffia UTC -3-mit UTC -2-mut 2023-mi oktobarimi allanngortinneqarpoq.
Ittoqqortoormiit 2024-mi marsimi UTC-1-imit UTC-2-mut aamma nuuppoq.
Danmarkshavni Pituffillu Space Baselu kisimik pinnatik nunap sinnerani aasaanerani nalunaaqutaq atorneqarpoq.
Taamaappat paasisaqarfiginissaanut naammagittarlutit utaqqisariaqassaatit. Nalunaaquttammi ingerlaaqatigiiffiata UTC-3-mut utertinnissaanik siunnersuutit marluk ukiuunerani ataatsimiinnissamut kinguartinneqarput.
Inatsisinut Ataatsimiititaliap sulineranut tamanna pissutaavoq. Naleqqami siulittaasoq Pele Broberg oqarpoq.
Ataatsimiititaliap Air Greenland inatsisissatut siunnersuut pillugu isummernissaanut periarfissippaa, tamannalu Naleqqap isumaa naapertorlugu tusarniaaqqinnertut isigisariaqaraluarpoq, naak oktobarimi siullermeerluni oqallinnermi Inatsisartuni amerlanerussuteqartut inatsisissatut siunnersuut tapersersorsimagaluaraat.
- Ataatsimiititaliat katitigaanerat qimerlooraanni siunnersuutip tamatuma ataatsimiititaliami ilaasortanit akerlerineqarnissaa Naleqqamiit isumakuluutigaarput, inuttut partiimullu tunngatillugu isummat atorlugit siunnersuut kinguarsarneqarsinnaanera eqqarsaatigalugu, Pele Broberg oqarpoq.
Aasaanerani nalunaaqutaq qaqugu atorunnaarsinneqassava?
Pele Broberg naapertorlugu ataatsimiititaliaq ataasiinnarmik suliassaqarpoq, tassa aasaanerani nalunaaqutaq atorunnaarsinneqassanersoq imaluunniit marsimi piffissap immikkoortuanik allannguisoqassanersoq aalajangertussaavaa.
- Ataatsimiititaliap iliuusai ajornartorsiutaapput, piaaralunili taamaaliorpasipput — tassa suliaq kinguarsarniarlugu utoqqatsissutissarsiorlutik maanna angumerisinnaannginnerarpaat. Maannalu ukioq ataaseq utaqqeqqittariaqalerpugut.
Inatsisinut ataatsimiititaliami siulittaasoq Aqqaluaq C. Jerimiassen (A) Sermitsiamut allakkatigut akissuteqarluni amerlanerussuteqartut ataatsimiitsitaliami naalakkersuisunut apeqquteqarusutttu paasissutissiissutigaat. Tassa ukioq ikaarsaarfik inissinneqassappat nalimmassaanikkut qanoq isikkoqassanersoq naleqassanersorlu.
- Ataatsimiitsitaliamiit suliaq pitsaanerpaamik iluseqarluni naammassineqassappat sorpaaluit qulaarluarneqaqqaartariaqartut pingaartissimavarput, allappoq.
Suliffeqarfiit inunnut iluaqutaasussaapput
Air Greenland maannakkut nalunaaquttap UTC-2-p atuutiinnarnissaanik tapersersuinerpaasut ilagaat. Air Greenlandimi Pisortaanerup Jacob Nitter Sørensenip tamanna timmisartukkut angallannermut iluaqutaalluinnartoq Inatsisinut Ataatsimiititaliamut saqqummiuppaa.
Tamannali niuernermut qanoq iluaqutaatigigaluarpat, niuerniarneq nunatta iluani politikkikkut aqutsisuusariaqanngitsoq, partiimi illuatungiliuttuni siulittaasuusoq oqarpoq.
- Suliffeqarfiit taakku innuttaasut pigisaraat, innuttaasullu sullinniarlugit pilersinneqarput, innuttaasut taakkununnga sullissisussaanngillat, Pele Broberg oqarpoq.
Kalaallit Nunaata UTC-3-mut uternissaanut paasiuminartumik pissutissaqartoq Pele Broberg oqarpoq_
- Nunarsuarmioqataavugut, nunap immikkoortuini assigiinngitsuni piffissalersuutit aalajangersimasunik titartorneqarput. Nunarsuarmi sumiikkaluaraanniluunniit nalunaaquttap qanoq isinera uumassusittut sananeqaatitsinni malugisinnaasarparput, tulluarsarfigisarlutigullu.
EU utaqqeqqaarneqartariaqanngitsoq
Allaaserineqareersutut aasaanerani nalunaaqutaq atorunnaarsinneqarnissaa siunnersuummi ilaavoq. Inatsisartut 2019-imi taanna aalajangerpaat, EU-mili allannguisoqarnissaa utaqqeqqaarneqassalluni.
Taamaaliortariaqanngitsugulli Pele Broberg isumaqarpoq.
- Piffissarput EU-mut attuumassuteqanngilaq, nunarsuarmi inissisimaffipput aallaaviussaaq.
Nunarsuarmimi nunat 70-it missaannaat aasaanerani nalunaaqutaq atortarpaat - EU aamma Amerikap avannaata ilarujussua ilanngullugit - Europamit akunnernik sisamanik tallimanillu kinguaqqasariaqarup tunngavilersuutigineqarnera upperinngilaa.
Nunalli 70-it pineqarpata?
- Soqutaanngilaq.
Naleraq nalunaaquttat ingerlaaqatigiiffiinik allanngortitsinissamik siunnersuuteqartut aapparaat. Siumut aamma siunnersuuteqartuuvoq.
Siunnersuutit taakku marluk 2026-mi februaarip pingajuanni aappassaaneerneqartussanngorput. Siunnersuutit Inatsisartuni akuersissutigineqaqqaartussapput.
