Peqatigiiffik: KNR-ip tapit pillugit kukkussuteqarnini nassuerutigaa

Akunnerit nalinginnaasumik suliffiusartut avataanni sulinermi tapit ingerlaannaq atorunnaarsinneqartut KNR-imi aqutsisut septembarip naanerani nalunaarutigimmassuk, tusagassiorfimmi innuttaasunik kiffartuussivimmi eqqissiviilliornermik kinguneqarpoq.

Aalajangiineq akerleriissutaasoq tusagassiorfimmi sulisunut, TP-p aningaasarsianut isumaqatigiissutaa naapertorlugu atorfilinnut, 50-it missaanniittunut eqquivoq. Sulisut ullaakkut, unnukkut weekendimilu piffissani aalajangersimasuni sulinerminni aningaasarsiaannut tapit pineqarput.

Sulisut peqatigiiffiat TP pisumut akuliuppoq, maannalu KNR-ip aalajangiinini atorunnaarsikkaa ilaasortaminut nalunaarutigisinnaanngorlugu:

- Isumaa uniorlugu kukkusumik paasineqartoq aalajangiusimanikuuaarput. KNR-ip tamanna maanna nassuerutigalugu iluarsiiffiginialermassuk nuannaarutigaarput, peqatigiiffik nalunaaruteqarpoq. Taakku aningaasaqarnermut sulisoqarnermillu aqutsisoqarfimmeersut KNR-imilu aqutsisut suliamut tunngatillugu arlaleriarlutik ataatsimeeqatigisimavaat.

Pisortap tapit kukkusumik tunniunneqartarnerarai

Aningaasarsianut tapit kukkussuteqarnikkut tunniunneqartarsimasut aqutsisunit nalilerneqarmat atorunnaarsinneqartut, KNR-ip pisortaata Hans Peter Poulsenip Sermitsiamut siusinnerusukkut oqaatigaa.

Aqutsisut isumaqatigiissummik paasinninnerat nutaaq naapertorlugu sulisut ullaakkut, unnukkut weekendimiluunniit sulinermi tapisisartussaanngillat. Tassa sapaatip-akunneranut nalunaaquttap qassinngornera apeqqutaatinnagu akunnerit 40-t sinnernagit suligunik tapisisartussaanngillat.

- Tassa nalunaaquttap akunnerini 40-ni nalinginnaasumik sulinermi, piffissaq sorleq apeqqutaatinnagu, nalinginnaasumik aningaasarsisoqartarpoq. Piffissami nalinginnaasuunngitsumi sulinermi tapit, piffissani aalajangersimasuni piareersimasutut sulisimagaanni aatsaat tunniunneqartarput, pisortaq taamani oqarpoq.

Teknikkikkut kukkuneq tapinut aningaasarsiaqaataasoq

KNR-imi aqutsisut nalunaarutaat peqatigiiffimmit TP-mit tupaallaatigineqarpoq, taakkualu KNR-imi sulisunit pakatsisimaqisunit saaffigineqartarsimallutik oqaatigaat.

KNR-imi sulisut tapinik pissarsisinnaanngoqqikkaluartut, TP-p paasissutissiinera naapertorlugu, teknikkikkut kukkusoqarneratigut, sulisut arfineq-pingasuneertussat siusinnerulaartumik suliartorlutik naqikkunik tapinik akissarsisarsimapput.

Kukkunerlu taanna maanna aaqqiivigineqarpoq:

- Sulisut nalunaaqutaq arfineq-pingasut sioqqullugu sulisussat tapinik maannamiit tunineqartalissapput, aamma unnukkut weekendinilu sulisunut, TP allappoq.

TP-mi siulittaasoq: Pinngitsoortinneqarsimasinnaagaluarpoq

Aningaasarsiat pillugit isumaqatigiissuteqarnikut, tassa peqatigiiffik aamma Namminersorlutik Oqartussani Aningaasaqarnermut Sulisoqarnermullu Aqutsisoqarfik, peqataatinneqarsimasuuppata maanna pisut pinngitsoortinneqarsimasinnaagaluartut, TP-mi siulittaasoq aamma Sermitsiami atorfilik Arnaq Nielsen oqarpoq:

- Eqqortumik iliuuseqartoqarsimagaluarpat tamanut ammasumik oqaluuserisimassanngikkaluarparput. Taamatut pisoqaqqinnginnissaa anguniarlugit KNR-ip piffissaatillugu sulianut peqataatittassagaatigut maanna isumaqatigiissutigaarput, oqarpoq.

Tusagassiortut amerlasuut aaqqissuisullu ukiuni kingullerni soraakaanerat KNR-imi ajornartorsiutaavoq. Tamatuma saniatigut uippakajaarlutik sulinngiffeqartut aamma pipput.

Aamma pisortat arlallit taarserneqarput, ilaatigut pisortaq. Pisortaasimasoq Annga Lynge januaarimi soraarsitaammat Hans Peter Poulsen maajip aallaqqaataani pisortanngorpoq.

Sulisoqarniarnikkut inissisimaffik eqqarsaatigalugu pisoq uggornartoq sulisut peqatigiiffianni siulittaasoq oqarpoq:

- Kalaallit Nunaanni tusagassiuutit tatineqaqqapput. Sumi tamani atuuppoq, kukkusoqartillugu pissutsinut iluaqutaaneq ajorpoq. Kukkuneq aamma ilaasortatsinnut tatisivoq, Arnaq Nielsen oqarpoq.

KNR-imi pisortaq Hans Peter Poulsen oqaaseqartinniarlugu Sermitsiamit sulissutigaarput.