Peqqinnissaq pillugu siunnersuisoqatigiit nutaat peqqinnissaqarfiup ineriartornissaanik qiterititaqartoq

Peqqinnissaq pillugu siunnersuisoqatigiit suliaat Naalakkersuisunut attuumassuteqanngitsut pilersinneqaqqammerpoq.

- Peqqinnissaq pillugu Ataatsimiititaliarsuarmi innersuussutigineqartut piviusunngortinneqarsinnaalersillugit Peqqinnissaq pillugu siunnersuisoqalernera nuannaarutigaara. Peqqinnissaqarfiup massakkut siunissamilu pitsanngorsarneqarnissaanut Naalakkersuisut siunnerfeqarlutik sulipput. 

- Politikkikkut eqqortumik aalajangiisinnaaqqulluta, peqqinnissaqarfimmi misissuinernik siunnersuutinillu pitsaasunik ineriartorfiusinnaasunut tunngasunik, siunnersuisoqatigiit ilisimasalittut nukittuutut sulianik ilanngussaqarsinnaanissaat qilanaaraara. Nunatsinni peqqinnissamut tunngatillugu piviusorsiortumik eqqartuisoqarsinnaanissaa Peqqinnissaq pillugu siunnersuisoqatigiinnit pilersinneqarumaartoq aamma neriuutigaara, Peqqissutsimut Naalakkersuisoq, Agathe Fontain oqarpoq.

Peqqinnissaq pillugu siunnersuisoqatigiit, peqqinnissamut tunngasunik ilisimasaqarluartunik, siulersuisunik tallimanik ilaasortaqassapput. Tamatuma saniatigut napparsimasut peqatigiiffiinit, kommuninit, Ilisimatusarfimmit suliassaqarfimmilu suliniaqatigiiffinnit siunnersuisoqatigiinni tallimanik ilaasortaatitaqassaaq, soorlu peqataanik Nunatta nakorsaanera ilaasortaassasoq. Aalajangersimasumik naalakkersuisoqarfiit susassaqartut peqqinnissaqarfimmilu qullersat siunnersuisoqatigiinni ataatsimeeqataasassapput.

Ataatsimiititaliap innersuussutai maleruarneqartut

Naalakkersuisoqarfiit assigiinngitsut peqqinnissaqarfinnilu aqutsisut siunnersuisooqatigiinnut ilaasortaapput.

-  Peqqinnissaq pillugu siunnersuisoqatigiit oqaluttuarisaanermut pingaaruteqarput. Peqqissutsimut suliassaqarfik inuiaqatigiinni pingaarutilimmik inissisimavoq, suliassaqarfiullu ineriartortinneqarnera innuttaasorpassuarnut napparsimasorpassuarnullu pingaaruteqarpoq.

- Taamaammat Peqqinnissaq pillugu siunnersuisoqatigiit pilersinneqarnera nuannerpoq, peqqinnissaqarfiup eqqortumut ingerlalernissaanut qulakkeerisussamik peqqissutsimullu tunngatillugu isumaqatigiissummi siunissami neriorsuuterpassuarnut eqqortitsisuulluni, Peqqinnissaq pillugu siunnersuisoqatigiinni siulittaasoq, professor Kjeld Møller Pedersen, Peqqinnissaq pillugu Ataatsimiititaliarsuarmi siulittaasup tullersortaanikoq oqarpoq

Peqqinnissaq pillugu siunnersuisoqatigiiliortoqarnissaa Peqqinnissaq pillugu Ataatsimiititaliarsuarmiit maajimi 2023-mi siunnersuutigineqarpoq. Tamatuma kingorna Inuit Ataqatigiit, Siumut, Naleraq Atassullu partiivi Inatsisartuni novemberimi 2023-mi ukiunut qulikkaanut peqqinnissaq pillugu isumaqatigiissuteqarpoq, tassani Peqqinnissaq pillugu siunnersuisoqatigiimmik qitiutitaqarnissaq salliunneqarluni.

Peqqinnissaq pillugu siunnersuisoqatigiit nalunaarusiaat siulleq ukiassami 2025-mi tamanut saqqummiunneqassaaq.