Peqqinnissaqarfik: Qarasaasiat attaveerunnerisa kingorna sullississutit pingaarutillit ingerlaqqilerput
Peqqinnissaqarfiup qarasaasiaasa attaveerunnerat annertusimavoq, sullississutilli pingaarnerit maanna ingerlaqqilerput, Peqqinnissaqarfimmi pisortaaneq Tina Amondsen sapaatiummat tusagassiuutinut nalunaarummi ilisimatitsivoq.
Leiff Josefsen
Tallimanngormat qarasaasiat attaveerunnerisa kingorna peqqinnissaqarfiup qarasaasiakkut paasissutissanik eqiteriviinik 250-inik qarasaasianillu sullivinnik 1.850-inik sumiiffinni 74-iniittunik nutarterinissaq peqqinnissaqarfiup suliassaraa annertooq.
- Siullertut pingaarnertullu napparsimasunut/nakorsianut qarasaasiakkut sullississutit ajalusoornerannit eqqugaasunut pisoq utoqqatsissutigaarput, Tina Amondsen, Peqqinnissaqarfimmi pisortaaneq oqarpoq imalu nangilluni:
- Ajalusoorneq annertullunilu paasilertoruminaatsoq, sullississutinik tamanik qarasaasiakkut paasissutissutinik eqiteriffinnik peqqinnissaqarfimmilu qarasaasianik tamangajannik eqquivoq. Qarasaasiarsornermi immikkoortortatta ajornartorsiut ilungersorluni aaqqinniarsaraa suliassarli annertoqaaq.
Dronning Ingridip Napparsimmavissuani, qitiusumik kigutilerivinni, qitiusumik napparsimmavinni peqqissaaviillu amerlanersaanni sullississutinut pingaarnerpaanut maanna atorsinnaanngoqqittunut isersinnaalernissaq qulakkeerneqarsimasoq, pisortaaneq ilisimatitsivoq.
Nakorsiartitsinissat kinguartinneqartut
- Qarasaasiarsornikkut ajalusoorneq pissutaalluni tallimanngormat nakorsiartussarpassuugaluit nakorsartittussarpassuugaluillu taamaatiinnarneqartariaqarsimapput. Taakku ingerlanniarnissaat piffissartornartussaassaaq, sapinngisarpulli tamaat suliniutigaarput, Tina Amondsen oqarpoq.
Qarasaasiarsornerup nunatsinni Peqqinnissaqarfiup immikkoortuisa sinnerini aaqqiivigineqarniarnera ingerlasoq, peqqinnissaqarfimmi pisortaaneq ilisimatitsivoq – taamaattumillu sumiiffinnut tamanut anngunnissap qanoq sivisutiginissaata nalilivinnissaa siusippallaarnerarpaa.
