Peqqinnissaqarfiup attavii ajoquteqarput
Inunnut nalunaarsuiffiit iserfigineqarsinnaanngitsut aamma nakorsamut sianertoqarsinnaanngitsoq, Dronning Ingridip Napparsimmavissuaniit nalunaarutigineqarpoq. Qeqqata Kommuniani peqqinnissaqarfik aamma taama nalunaarpoq.
Leiff Josefsen
Ullaaq manna nunarsuaq tamakkerlugu qarasaasiat ajoquteqarput. Dronning Ingridip Napparsimmavissuani Qeqqatalu Kommuniani aamma qarasaasiat ajoqusersimasut nalunaarutigineqarpoq.
Inunnut nalunaarsuiffiit maannakkut iserfigineqarsinnaanngitsut, piffissamillu inniminniinissamut nakorsamut sianertoqarsinnaanngitsoq, Dronning Ingridip Napparsimmavissua Facebookimi quppernermini allassimavoq.
- Qarasaasiakkut attaveqarneq ajutoorpoq, inunnut nalunaarsuiffiit takusinnaanngilavut, aammattaaq inuit sunik nakorsaatitortarnersut takusinnaanngilarput, Dronning Ingridip Napparsimmavissua allappoq.
Pinartoqartilluguli saaffiginniffik ambulancenullu sianerfissaq suli atorsinnaasut napparsimmavik nalunaarpoq.
Qeqqani aamma ajutooqqasut
Ullaaq manna nakorsanit inunnut nalunaarsuiffiit iserfigineqarsinnaanngitsut, Qeqqata Kommuniani napparsimmavimmit aamma nalunaarutigineqarpoq.
- Qarasaasiat atorsinnaanngillat, oqarasuaatilli atorsinnaapput. 801112-imut piffissamik inniminniineq taamaallaat piffissamik pisariaqartitsisunut atorneqarsinnaavoq. Nakorsiarnissannut inniminniissaguit ataasinngorpat sianeqqilaarina, allapput.
Qaqortumi aamma ajutooqqasoqarpoq. Qarasaasiat aamma ajoquteqartut, taamaattumillu ullumi tallimanngornermi juulip 19-ianni nakorsiarnissamut piffissamik tunniussisoqarsinnaanngitsoq, Qaqortup peqqinnissaqarfia allappoq.
Ajornartorsiutit peqqinnissaqarfiup aaqqinniarlugit sulissuteqarpoq.
