ALLAASERISAQ AKILIGAQ
Peqqissaanermik Ilinniarfik teknologi atorlugu ilinniarfimmik ammaasoq
Ilinniartut suliarilerumaakkaminnik toqqissisimasumik avatangiiseqarlutik misileraanissaminnik, kukkusaarnissaminnik, eqqarsaatiginneqqissaarnissamut piginnaasaminnillu ineriartortinnissaminnut periarfissaqalerput.
Ilinniartitaanermut naalakkersuisoq Nivi Olsen Peqqissaanermik Ilinniarfimmi ilinniartitseriaatsip nutaap ammaanersiornerani oqalugiartoq.
Assi: Klaus Wiedemann
Peqqissaanermik Ilinniarfimmi (PI) aggustip arfernani pingaarutilimmik angusaqartoqarpoq. Ilinniarfiup teknologii atorlugu ilinniartitsissutaa nutaaq, Immersorfik, pisortatigoortumik atoqqaarfissiorneqarpoq.
– Ammaanersiornermi aaqqissuussaq iluatsilluarmat tulluusimaarutigaarput. Sulisut ilinniartullu teknologi peqqinnissaqarfimmi qanoq atorneqarsinnaanera workshoppimi suliaqarfigilluarpaat. Ammaanersiornermi nuannisartoqarlunilu tapersersuisoqarpoq. Ilinniartitaanermut Naalakkersuisup Nivi Olsenip aaqqissuussaq aallarnerlugu oqalugiarpoq, Den A.P. Møllerske Støttefondillu tapiissuteqarneratigut piviusunngortitsisoqarsinnaanera siunissami ilinniartitsinermut periarfissarpassuarnik pilersitsinera suleqatigisatta tikkuarpaat, Peqqissaanermik Ilinniarfimmi forstanderi Bettina Hanghøj Johansen oqarpoq.
Siunissami ilinniartitseriaaseq
Ilinniarfiup pilersinneqarnera siunissami ilinniartitseriaaseq nutaaliaasoq aningaasaliiffigineqarpoq, tassani teknologii, assiliartalersuineq aamma sulinermi suliarilerumaakkanik ilinniartitsineq ingerlanneqarsinnaalerpoq. Taamaalilluni Kalaallit Nunaanni peqqinnissaqarfimmi sulilerumaartussat piginnaanngorsarneqarsinnaalerlutik.
Immersorfik aalajangersimasumik siunertaqarluni pilersinneqarpoq: ilinniartitaaneq nutaaliorfiusoq, ilinniartut toqqissisimanartumik avatangiiseqarlutik teknologiimik inuttullu piginnaasanik ineriartortitsisinnaallutik. Immersorfiup ineriartorneq tapersersorpaa, ilinniartitseriaatsit nalinginnaasut ilinniartitseriaatsinik nutaanik tapertalerneqarlutik atuakkat suliassallu ataqatigiissarneqarlutik. Tamanna suliaqarnikkut, misileraanikkut suliaqaatigaluni ilikkariartornikkut pisinnaanerulerluni.
Peqqinnissaqarfik ineriartortuarpoq, siunissamilu sulilerumaartussat teknologiinik nutaanik, digitalimik aaqqiissutissanik aamma napparsimasunut innuttaasunullu sulianut pisariusunut sungiusarsinnaasariaqarlutik. Taamaammat ilinniartut ilinniarnerup ingerlanerani ulluinnarni suliarilerumaakkat piviusorpalaartumik sungiusarsinnaanissaannik piginnaanngorsarneqalereertariaqarlutik.
Peqqissaanermik Ilinniarfimmi forstanderi Bettina Hanghøj Johansen.
Assi: Klaus Wiedemann
Kalaallit Nunaata siunissaanut aningaasaliineq
Immersorfiup ammarneqarnera suleqatigiilluarnerup siunissamilu peqqinnissaqarfimmi ilinniagaqarnermut aningaasaliinerit kingunerisaannik piviusunngorpoq. Den A.P. Møllerske Støttefondimit 2 millionit koruuninik tunissuteqarnikkut Peqqissaanermik Ilinniarfik nutaaliaasumik teknologiimik ilinniarfimmik pilersitsinissamut periarfissaqalerpoq, tassani teknologii, piviusuusaartitsineq aamma suliarilerumaakkat aallaavigalugit atuartitsineq ingerlanneqarnerulersinnaalerlunilu ataqatigiissarneqarlutik.
Tamatuma saniatigut ilinniarfik teknologiip ineriartortinnissaanut Tussasimit 350.000 koruuninik tapiiffigineqarpoq. Aningaasat ilaatigut teknologiimik nutaaliornermik periarfissanik pilersitsinissamut, soorlu 3D-printerinik, printer/cutterinik aamma laserit atorlugit killuisartunik pisinikkut kiisalu sulisut piginnaanngorsarnerisigut atorneqassapput.
Ilinniartut pitsaanerusumik atuartinneqarnissaminnik periarfissaqalerlutik atuartitsinermi teknologiimik nutaamik atuisinnaanerat piginnaanngorsarnissaa anguniarneqarpoq.
Aningaasaliissuteqarnerit ataatsimut isigalugit ilinniartitaanerup nutaaliorfiusup pilersinnissaanik takorluukkamik tapersiipput, tassani ilinniartut sulisullu misilittagaqalerlutik, aaqqiissutissanik nutaanik ineriartortitsisinnaallutik peqqinnissaqarfinnilu ineriartortuartuni pisariaqartunik piginnaanngorsarneqassallutik.
Peqqissaanermik Ilinniarfimmi ilinniarfik nutaaq aggustip arfernani ammarpoq.
Assi: PI
Atuartitsissutigineqartuniit sulinermut – ilinniartinneqarsinnaaneq nutaaq
Immersorfik atuartitsissutigineqartut sulinerlu ataqatigiissinnaaqqullugit ilusilersorneqarpoq. Tassani ilinniartut nakorsiartitsinermik piginnaasanik sungiusarnissaminnut, immikkut ilisimasallit akornanni suleqatigiinnissamut napparsimasullu oqaluttuaat aallaavigalugit piviusorsiortunik suliaqarnissamut periarfissaqalerput. Tassa suli sulilertinnatik tamakku misilittareersinnaanngorlugit.
Ilinniartut suliarilerumaakkaminnik toqqissisimasumik avatangiiseqarlutik misileraanissaminnik, kukkusaarnissaminnik, eqqarsaatiginneqqissaarnissamut piginnaasaminnillu ineriartortinnissaminnut periarfissaqalerput. Ilisimasat atuartitsinermi ilikkakkatik peqqinnissaqarfimmilu sulilerunik suliarisalerumaagassaminnik ataqatigiissaarilluarsinnaalissallutik.
Teknologi ilinniartitsinermut ilaaginnartoq
Immersorfik ilaatigut qarasaasiamut atasunik isaruarsualerluni (VR) piviusuusaartitamik misileraanissamik, assaat atorlugit atuartinneqarnermik, piviusuusaartitsinikkut aamma teknologiikkut iluaqutissat nutaaliat atorlugit atuartitsiffiuvoq.
Teknologimik atortorissaarutit inunnik attaveqarnermut, ilinniartut atuartinneqarnerannut napparsimasullu ilungersunartunik atugaqartillugit toqqissisimanartumik avatangiiseqarluni sungiusarsinnaanermut iluaqutaapput. Taamaalilluni isumannaannerusumik piginnaasaqarnerulernissamik, eqqarsaatiginneqqissaarnissamik napparsimasullu isumannaatsumik sullinneqarsinnaanerat pitsanngorsarneqarluni.
Aammattaaq peqqinnissaqarfinni siunissami pisariaqartinneqalertussat naapertorlugit ilinniarfik ineriartortuassaaq, ilinniartitsisut atuartitseriaatsiminnik nutaanngorsaajuarlutillu misileraasinnaassallutik.
Immersorfik ilaatigut qarasaasiakkut ilinniarfinnik (VR), attaveqaqatigiinnermik tunngavilimmik ilinniartitsinermik, pisuusaartitsissutinik atortorissaarutinillu allanik ilinniartut avatangiisini toqqissisimanartuni piginnaanerinik ineriartortitsisinnaasunik imaqarpoq.
Assi: PI
Ilinniarfik siunissami ilinnialerumaartussanut kajungernarnerusoq
Immersorfik aqqutigalugu Peqqissaanermik Ilinniarfimmi avatangiisit nutaaliaasut kajungernartullu pilersinnissaat kissaatigineqarpoq, taamaaliornikkut inuusuttut amerlanerusut peqqinnissaqarfimmut tunngasuni ilinniagaqarnissamut kajungilersinneqarusullutik.
Ilinniarfik issittumi ineriartornissamut, pilersitsinissamut ilisimasanillu itisiliinissamut periarfissarpassualimmi teknologi, nutaaliorneq atuartitseriaaserlu nutaaq aqqutigalugit peqqinnissamut tunngasunik ilinniarfinnik nutaaliaasunik ineriartortitsinermut siuttuuniarpoq. Teknologi nutaaliaasoq atorlugu atuartut peqqinnissaqarfimmut tunngasuni periarfissanik nutaanik takunnissinnaalersinnaassallutik.
Qaaqqusat suleqatillu peqatigalugit ammaanersiorneq
Suleqatigisat, aningaasaateqarfiit, oqartussat, peqqinnissaqarfimmi sulisut, ilinniarfimmi ilinniartut sulisullu pisortatigoortumik ammaanersiornermi peqataapput.
Oqalugiartoqarlunilu Peqqissaanermik Ilinniarfimmi teknologi atorlugu atuartitsissutit nutaat misiligarneqarput.
Ammaanersiorneq atortorissaarutit nutaat atoqqaartinneqarnerannik malunnartitsiinnarnani aammali ilinniarnermut, ilinniartitsinermut piginnaanngorsaanermullu allatut isiginnittaaseqalernermik aallartitsineruvoq.
Atuartunut – aamma Kalaallit Nunaannut tamarmut – iluaqutaasoq
Immersorfik aqqutigalugu Peqqissaanermik Ilinniarfik peqqinnissamut tunngasunik ilinniagaqarfinnik nutaalianik kajungernartunillu, inuiaqatigiit, peqqinnissaqarfiup napparsimmaviillu pisariaqartitaannut naapertuuttunik pilersitsinissamut alloriaqqippoq.
Peqqinnissaqarfimmi sulisut pikkorissut, alapernaatsut nutaaliorusuttullu siunissami unammilligassanut piareersimasut ilinniartinneqarnissaat siunertarineqarpoq.
Immersorfik atuarfiup qiteraa, ilinniarfiullunilu nutaaliorfiusussaavoq suleqatigiiffiusarlunilu – atuartunut, peqqinnissaqarfimmut, ilinniartitaanermut Kalaallit Nunaannullu tamarmut iluaqutaassalluni.
Kalaallit Nunaata siunissaanut aningaasaliineq.
Peqqissaanermik Ilinniarfik suleqatigalugu allaaserisaq suliarineqarpoq.
