Peqquserlunnermut suliami ilisimannittoq kingulleq killisiorneqartoq
Lars-Møller Sørensenimut aamma Lars-Emil Johansenimut peqquserlunnermut suliami ilisimannittoq illersuisut pingasunngornermi aggersarpaat.
Eqqartuussisoqarfik Sermersooq.
Assiliisoq: Morten Okkels
Kommunaldirektøriusimasoq Lars-Møller Sørensen naalakkersuisunullu siulittaasuusimasoq Lars-Emil Johansen peqquserluuteqarsimasutut unnerluunneqarneranni suliami ilisimannittoq kingulleq pingasunngornermi ullaap tungaani killisiorneqassaaq.
Ilisimannittoq tassaavoq Kurt Rokholm Pedersen, Kommuneqarfik Sermersuumi Tasiilami isumaginninnermut immikkoortortaqarfimmi pisortaq. Taannalu Lars-Emil Johansenip illersuisuanit Ulrik Blidorfimit aggersarneqarpoq.
Ilisimannittup Lars-Emil Johansenimik Tasiilami naapissimaneraa Ulrik Blidorfip aperaa.
- Tasiilami Kofoeds Skolemik pilersitsinissamut atatillugu naapippara, Kurt Rokholm Pedersen oqarpoq.
Politikeriusimasup illersorneqarnerani Lars-Emil Johansenip suliamut tamatumunnga atatillugu iliuuserisimasai pingaarnertut sammineqarput. Kommuneqarfik Sermersuumut siunnersortitut atorneqarnermini suliaqarsimanngitsutut unnerluutigineqarpoq.
Kurt Rokholm Pedersenip Kofoeds Skolep Tasiilami immikkoortortaqarfittaarnissaanut pilersaarutit pillugit eqqartuussivimmi sukumiinerusumik oqaluttuarpoq.
Lars-Emil Johansen Kofoeds Skole sinnerlugu Tasiilamut tikeraartoq isumaqarsimavoq, kingusinnerusukkulli tusagassiuutitigut Kommuneqarfik Sermersuumi siunnersortitut atorfeqartoq paasillugu.
Uppernarsaatit maanna naammassineqarput, eqqartuussinerlu aallartippoq. Ullumi kingusinnerusukkut eqqartuussivimmi aalajangiisoqassaaq.
