Lars-Emil Johansenip Kommuneqarfik Sermersuumut unneqqarilluni sullissinermini 730.000 koruuninik akissarsiva?
Apeqqut taanna Lars Møller-Sørensenip Lars-Emil Johansenillu peqquserlussimasutut oqartussaassutsimillu atornerluisimasutut qaammatini arfinilinni pineqaatissinneqarsimasut inissiisarfimmiittussanngortinneqarneranni pingaarnertut sammineqarpoq.
Lars-Emil Johansenip Kommuneqarfik Sermersuumut unneqqarilluni sullissinermini 730.000 koruuninik akissarsiva?
Apeqqut taanna Lars Møller-Sørensenip Lars-Emil Johansenillu peqquserlussimasutut oqartussaassutsimillu atornerluisimasutut qaammatini arfinilinni pineqaatissinneqarsimasut inissiisarfimmiittussanngortinneqarneranni pingaarnertut sammineqarpoq.
Eqqartuussutip Nunatta Eqqartuussisuuneqarfiani suliareqqitassanngortinneqarnera Sermitsiap ulluni makkunani malinnaaffigaa, tassani Lars Møller-Sørensen unnerluussisussaatitaasumit illersuisumillu apersorneqangaatsiarluni.
2019-imi isumaqatigiissutip atsiorneqarnerani politikikkut isumaqatigiinngittoqartoq oqarpoq.
– Lars-Emilimik isumaqatigiissuteqarnerput politikikkut isummersoqateqarnissamut tunngassuteqarpoq. Kommunimi aqutsisutut kommunalbestyrelsimi suleqatigiinnut illuatungiliuttunullu politikikkut qanoq iliuuseqarnissat paasissallugu pingaaruteqarami.
Mailikkut Messengerikkullu attaveqatigiinnernut uppernarsaatit
Taamanikkut borgmesteri Charlotte Ludvigsen IA-mi politikkeriuvoq. Taamaasilluni Siumumi siulittaasuusimasoq politikkikkut pissutsinik tamatumanilu avissaartuuffiusunik paasinninnerulernissamut iluaqutaasinnaavoq, Lars Møller-Sørensen oqarpoq.
Tasiilami Kofoeds Skolemik pilersitsiniarsarineq Lars-Emil Johansenip suliassaasa ilagigaat taamanikkut atorfilik uppernarsaavoq. Eqqartuussisoqarfik Sermersuumi taanna sammineqangaatsiarpoq.
Lars-Emil Johansenip mail-ianit Facebook Messengerianiillu uppernarsaatit, ilaatigut Kofoeds Skole Tasiilamullu angalanermut tunngasut, saqqummiunneqarput.
Lars-Emil Johansenili allanik suliassaqarsimasoq, Lars Møller-Sørensen oqarpoq.
2019-imi isumaqatigiissuteqarnissaq sioqqullugu pisimasut uterfigaavut. Lars-Emil Johansenip quiasaarluni Møller-Sørensen Kommune-Larsimik taavaa.
Lars-Emil Johansenip eqqartuussissuserisut saaffiginninnermini 2020-mi allagai aamma saqqummiunneqarput:
- Kommunimi pisortamut siunnersortaavunga, annikitsutigut annertuutigullu siunnersortarlugu, Lars-Emil Johansen allappoq.
Sooruna suliassat eqqaaneqanngitsut?
Lars-Emil Johansenip Lars Møller-Sørensen inissialiornissamut tunngatillugu sunniiniarnermini paasissutissanik pissarsiniarluni ukioq taanna aamma allaffigaa.
Tamanna suliamut tunngasunik paasissutissanik nutaanik imaqarpoq, taakku tunngavigalugit aningaasat unneqqarilluni atorneqarsimasut illersuisut oqaatigaat. Unnerluussisoq tassunga isumaqataanissaa ilimanangilaq.
Møller-Sørensenip unnerluussisup apeqqutai arlallit akiussuteqarfigereeramigit peqqiilliulernini pissutigalugu ualikkut apersorneqaqqinngilaq.
Eqqartuussisorli Mette Søndergaard apeqqutissaqarpoq:
– Sooruna Lars-Emil Johansenip suliassai suunersut isumaqatigiissummi allassimanngitsoq?
- Taamani pisariaqarsorinngilarput, Lars Møller-Sørensen akivoq.
Kingornali pisut eqqarsaatigalugit soorunami isumassarsiatsialaagaluartoq ilanngullugu oqaatigaa.
Pineqartut marluk peqquserlussimasutut oqartussaassutsimillu atornerluisimasutut (Lars-Emil Johansenimut tunngatillugu oqartussaassutsimik atornerluinermut peqataasimasutut) pinngitsuunerarput.
Ataasinngornermi ualikkut killisiuinerit nanginneqarput, tassanilu eqqartuussivimmi pingaarnertut unnerluutigineqartut saniatigut ilisimannittut arlallit qaaqquneqartut siullersaat tusarnaarneqassallutik.
