Piffissami paatsiveerusimaarfiusumi politikikkut siulersuisut nutaat

Inatsisartuni ilaasortat Hans Egedep Illuanit Annaassisitta Oqaluffianut ingerlaaqatigiinnerat piffissap nutaap aallartinneranut takussutissaavoq.

Qupanuk Olsen (N) ilaasortaqatimi naalagiarneranni peqataaniarnani Sassuma Arnaanukarniarluni aalajangerpoq, 2023-mimi ilagiinnit anisimagami.

Tamatuma kingorna Inatsisartut ataatsimiittarfiata saavaniipput nuna tamakkerlugu politikerit 30-t, taakkunannga arnat 14-it angutillu 16-it assuartut, tassami Minik Serano Frederiksen (D) Inatsisartut suli inissitsitertinnagit Inatsisartunut ilaasortaannginnissami qinnuteqaatigisimammagu.

Inatsisartuni sivisunerpaamik ilaasortaasimasup Hans Enoksenip (N), marsimi ukiuni 30-ni qinikkatut sulisimanerminik nalliuttorsiorsimasup ataatsimiinneq sianerluni ammarpaa, - ataatsimiinneq ammarpoq, oqarpoq.

Inatsisartut Siulittaasoqarfiat

Aqqalu Clasen Jerimiassenip (A) partiit naalakkersuisoqatigiit Demokraatit, Inuit Ataqatigiit, Siumut aamma Atassut sinnerlugit Kim Kielsen (S) Inatsisartuni siulittaasussatut innersuussutigaa.

- Inatsisartut siulittaasussaattut Kim Kielsen (S) siulittaasullu tulliatut siullertut Lars Poulsen (S) ataatsimoorluta inassutigaavut, Aqqalu Clasen Jeremiassen oqarpoq.

Naleraq arfineq-pingasunik ilaasortaatitaqarluni Inatsisartuni illuatungiliuttuni kisiartaalerpoq. Siulittaasussamik qinersinermut akerliuniarnani aalajangersimavoq, naalakkersuisoqatigiilersut sulinissaannut piffissaqartikkumallugit.

- Qinigaasimasusi sulilluarnissassinnik kissaappasi, qinigaaqqinngitsullu qujaffigaavut akerliullutalu taasinavianngilagut, Jens Napaattooq oqarpoq.

Inatsisartuni ilaasortat ileqqutoqaq malillugu nikuillutik taasigamik 22-t Kim Kielsen Inatsisartut siulittaasussaattut qinerpaat.

- Siulittaasutut qinigaaninni pilluarit, ataatsimiinnermillu aqutsineq ilinnut tunniuppara, sivisunerpaamik ilaasortaasimasoq Hans Enoksen oqarpoq.

- Qaqortormiut illoqarfiup tunngavilerneqarneranit ukiut 250-inngortorsiorneranni periarfissaq manna iluatsillugu pilluaqquniarpakka, Kim Kielsen oqarpoq, ingerlaqqillunilu Naalakkersuisut siulittaasussaannik, Inatsisartuni ataatsimiititalianut assigiinngitsunut ilaasortassanik kiisalu Inatsisartut ombudsmandiannik qinersinissaq oqaluuserisassanngortillugit.

Naleraq eqqissilluni suleqqaaqqusisoq

Anna Wangenheimip partiit naalakkersuisooqatigiit sinnerlugit Jens-Frederik Nielsen (D) Naalakkersuisunut siulittaasussatut innersuussinnaagamiuk tulluusimaarutigeqaa, tamatumalu kingorna partiip illuatungiliuttunngornissaanut piareersimaneq Naleqqap oqaaseqartartuata Jens Napaattuup (N) nalunaarutigaa.

- Naalakkersuisut siulittaasussaattut innersuunneqartoq 75 procentinit tapersersorneqarpoq, uagulli partiitut illuatungiliuttutut nutaatut aamma nuna tamakkerlugu tapersersorneqarluarpugut. Naalakkersuisut nutaamik inissisimalernerat pissanganaqaaq, Jens Napaattooq oqarpoq nangillunilu:

- Aalisarnermut inatsit qanoq iliuuseqarfigissaneraat pissanngatigaarput. Ineqarnermut aaqqissuusseqqinneq qanoq allanngortinniarneraat soraarnerussutisiaqarnissamut ileqqaagaqarnissaq qanoq atorunnaarsinniarneraat. Nammineernerulernissaq qanoq sulissutiginiarneraat. Ullut 100-t siulliit eqqissillutik sulinissaat isumagissavarput, kisianni peqataajumallutalu suliniutini sunniuteqarumavugut, Jens Napaattooq oqarpoq.

Taasisut 22-t Jens-Frederik Nielsen Naalakkersuisut siulittaasuattut taavaat. Akerliusoqanngilaq.

- Pisussaaffik akisussaaffillu tunniunneqartoq inuiaqagiinni piffissami pingaarutilimmiippoq, Nunatta inissisimanera ulluni makkunani assoralisimaarnartuusutut isigineqarsinnaavoq. Aatsaat taamak ataatsimoornissamik nunarput pisariaqartitsivoq, aatsaat taamak toqqissisimanartumik siulersorneqarnissaminik pisariaqartitsivoq, Naalakkersuisuni siulittaasoq Jens-Frederik Nielsen (D) oqarpoq.

Naalakkersuisunngorlaat Inatsisartunit sulinngiffeqarnissartik qinnutigaat. Demokraatit sinniisaat pingasut, ilaatigut Aqissiaq Semsen aamma Leo P. Jørgensen, qinigaasinnaanngitsutut naliliiffigineqarlutik tunuarniarlutik aalajangerput.