Pinerlunnermi tunuliaquttat malersorneqartut
Ikiaroornartumik pinerluuteqartut ikiaroornartuerniarfinnut ungasissuni najukkanut kusanartunut toqqoqqassanngillat. Nassaarineqassapput, tigusarineqarlutik pillarneqarlutillu, Inatsisartuni amerlanerussuteqartut taama isumaqarput.
Kalaallit Nunaanni politiit sapinngisartik tamaat hashimik eqqussuisartunik tigusarinninniartarput. Tunuliaqutaasulli pineqartillugit nunat tamat akornanni suleqatigiittoqassaaq. Politiit Danmarkimi imikkut ilisimasalinnit ikiorluarneqarput. Assi toqqarsivimmit.
Leiff Josefsen
Mittarfiit nutaat Kalaallit Nunaannut ikiaroornartunik isertortumik eqqussisarnernut aarlerinaammik annertunerulersitsinissaat, politikerit siullermeerlutik siorna upernaakkut oqaluuseraat.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
Anngiorlutik eqqussuisartunut pineqaatissiissutit sukannernerulernissaat taamanikkut Inatsisartunut siunnersuummi siunertaavoq. Amerlanertigut angutit arnallu soriarfissaaruteqqasut mittarfiit umiarsualiviilluunniit aqqutigalugit nunatsinnut anngiortumik eqqussuisarput.
Piffissamili kingullermi Inatsisartuni aappassaaneerinninnermi partiit amerlanerussuteqartut, inunnguakkuluit naqqaniittut kisiisa pinnagit annertunerusumik suliniuteqarnissaq kissaatigigaat paasinarsivoq. Taamatullu kissaateqarneq Naalakkersuisunit taperserneqarpoq.
Annertunerusumik pinerlunnermi tunuliaquttat, tassa inuit eqqissillutik ungasianit pinerluuteqartitsisartut, ikiaroornartumillu angallassisut aqqutigalugit hashimik ikiaroorniutinillu sakkortuunik nunatsinnut eqqussuititsinermikkut aningaasarpassuarnik iluanaaruteqartartut.
- Naalakkersuisut naalagaaffeqatigiinnermi oqartussanut saaffiginninnissaannut, ikiaroorniutinillu akuersaanngilluinnarnitsinnik, sulianilu taamaattuni ingammik pinerlunnerni tunuliaquttat sakkortuumik pillarneqartarnissaannik erseqqissaassuteqarnissatsinnut siunnersuut periarfissatsialaavoq, Naaja H. Nathanielsen (IA), inatsisit atuutsinneqarnerannut naalakkersuisoq allannguutissatut siunnersuutip akuerineqarneranut atatillugu oqarpoq.
Inuit sanngiitsut
Siumut partiinut pilersaarusiorluakkamik suliniuteqarnissamik pingaartitsisunut ilaavoq.
- Anngiortumik eqqussuisartunut tunuliaqutaallutik pinerlutsitsisartut unitsinneqanngippata, ajornartorsiut anigorneqarunnanngilaq. Taakku ulluinnarni ikiaroornartunik tigummiaqartannginnerat, aningaasanillu toqqaannartumik agguaasannginnerat pissutigalugu qaqutikkuinnaq tigusarineqartarput. Ikiaroornartunik eqqussuisarneq aaqqissuulluagaasumik ingerlanneqarpoq, tunuliaqutaasullu inuit sanngiitsut atornerluttarpaat, Siumup oqaaseqartartua siullermeerinninnermi oqarpoq.
Kalaallit Nunatsinni ikiaroornartut sakkortuut annertunerusumik maanna ajornartorsiutaanngillat, hashili annertuumik ajornartorsiutaavoq. Ukiuni kingullerni tallimani hashi 412 kiilu arsaarinnissutaavoq. Politiillu akuttunngitsumik ikiaroornartumik anngiortumik eqqussuisut tunuliaqutaasalu iluanaarutigisartagaannik takutitsisunik, aningaasarpassuarnik arsaarinnissuteqartarput. Nuummiinnarlu ukiup ataatsip ingerlanerani 3,2 millionit koruunit arsaarinnissutaapput.
Naak ikiaroornartut sakkortuut qaqutiguinnaq naammattoorneqartaraluartut, taamaattoq taamaariarluni LSD, kokain, steroidit amfetaminillu annertunngitsut arsaarinnissutaasarput.
AG siorna sammisaq pillugu allaaserinnimmat, assersuutigalugu Danmarkimut sanilliullugu ikiaroornartunik anngiortumik eqqussuinermut pineqaatissiisarnerit qaffasinnerujussooreernerat saqqummerpoq.
- Eqqartuussinerit agguaqatigiissillugu Kalaallit Nunaanni pingasoriaammik sakkortunermik pineqaatissiisoqartarnera takutippaat, Kalaallit Nunaanni Politiini paasiniaasartoqatigiit siuttuat AG-mut oqarpoq. ”Inatsisartuni aappassaaneerinninnerup kingorna Naalakkersuisut
Ikiaroornartunik sakkortuunik eqqusseriartunut, tuniniaasunullu taakkulu tunuliaqutaannut pineqaatissiisarnerup sakkortunerulernissaa pillugu Naalakkersuisut 2024 naatinnagu Naalagaaffimmut saaffiginnissuteqarnissaannik Inatsisartut aalajangiiffissaattut siunnersuut” aappassaaneerneqareerluni Inatsisartunit akuerineqarpoq.
