Pinerluttunik Isumaginnittoqarfiup qimaasarnerit unitsikkusuppai

Pineqaatissinneqarsimasunut inissiisarfinnit ammasunit ukiumut 15-it 30-llu akornanni qimaasut amerlassuseqartartut, inatsisinik atortitsinermut ministerip Peter Hummelgaardip IA sinnerlugu folketingimi ilaasortamut Aaja Chemnitzimut akissutaani allassimavoq

Pineqaatissinneqarsimasunut inissiisarfimmit ammasumit qimaaneq nalinginnaasumik pillaanermik kinguneqartarpoq, tassani pineqartoq Nuummi immikkoortortaqarfimmut matoqqasumut nuutsinneqartarluni. Kisianni inissiisarfimmi matoqqasumi inissat amigaataaneranni, pinerluttunik isumaginnittoqarfiup 'kissaatigisat malillugit' nuutsitsisinnaasanngillat.

Pillaatitut nuussinerit

- Taamaattumik Kalaallit Nunaanni Pinerluttunik Isumaginnittoqarfik Nuummi matoqqasumut immikkoortortaqarfimmut nuunneqarsinnaasunik pingaarnersiuisariaqarpoq. Tassa pineqaatissinneqarsimasut immikkoortortaqarfimmit ammasumit qimaasimasut Nuummi matoqqasumut immikkoortortaqarfimmut nuunneqarsinnaassanngillat, inissiisarfimmili ammasumiiginnartassallutik, Pinerluttunik Isumaginnittoqarfik ilisimatitsivoq.

Peter Hummelgaardip Kalaallit Nunaanni inissanut tunngatillugu ilungersunartoqarnera eqqumaffiginerarpaa.

- Pineqaatissinneqarsimasunik amerlanerusunik inissiisarnissaq pillugu Naalakkersuisut kissaateqarnerat tunngavigalugu, tamanna qanoq piviusunngortinneqarsinnaanera pillugu naalakkersuisoqarfimmi immikkut ittumik misissuisoqalerpoq. Tamatumunnga atatillugu aamma suliassat amerlassusaat qanoq iliuuseqarfigineqarsinnaanersut misissorneqassaaq, inatsisinik atortitsinermut ministeri allappoq.

Kalaallit Nunaanni Pinerluttunik Isumaginnittoqarfiup pinerluttunut inissiisarfinniittut kisissimavai, kisitsisillu imaapput:

- Pinerluttunik Isumaginnittoqarfik ilisimatitsivoq 2024-mi marsip 25-ani Kalaallit Nunaanni pineqaatissinneqarsimasunut inissiisarfinni 85-it sakkortuumik pinerlussimasutut piffissalerneqarsimasumik pineqaatissinneqarsimasut. Kisitsisinut ilanngunneqarput toqutsisimasut, nakuusersimasut, ikuallatsitsisimasut, inunnut navianartorsiortitsisunik allanik pinerlussimasut, pinngitsaaliisimasut, pinngitsaaleeriarsimasut, aamma kinguaassiutitigut allatigut kannguttaatsuliorsimasut kiisalu qanigivallaakkanut atoqateqarsimasut, peqqarniitsumik ikiaroornartunut tunngasunik pinerluuteqartut aamma ujajaasimasut.

Inissinneqarsimasut amerlassusaat

Piffissami aalajangersimasumi pineqaatissinneqarsimasut inissiisarfinnut ammasunut inissinneqartarnissaat tunngaviusoq, tassani aamma ilisimatitsissutigineqarpoq.

- Naatsorsuisoqarnerani pineqaatissinneqarsimasut 85-iusunit 82-it parnaarussivimmi ammasumiittut nalunaarutigineqarsinnaavoq, pineqaatissinneqartullu pingasut Nuummi matoqqasumik pillaanermut tunngatillugu immikkoortortaqarfimmiipput. Nuummi parnaarussivimmi inissat matoqqasut katillugit 40-nit piffissaligaanngitsumik pineqaatissinneqarsimasunut aamma tigummigallarneqartunut atorneqarsinnaapput, pinerluttunik isumaginnittoqarfik ilisimatitsivoq.