Pinerluttut aningaasatigut peqquserluutinik malunnarunnaarsaanermi periutsit nutaat ujartorpaat — immaqa TikTok aqqutigalugu
2023-miilli Aningaasatigut Peqquserluutinik Malunnarunnaarsaaneq Akiorniarlugu Allattoqarfiup inuit attaveqaqatigiittarfiisigut aningaasatigut peqquserluutinik malunnarunnaarsaanermut tunngasunik nalunaarutit amerliartornerat maluginiarpaa.
Inuit attaveqaqatigiittarfiannut TikTokimut aningaasanik nuussinerit pasinartut pillugit pingaartumik aningaaseriviit nalunaaruteqartartut, Aningaasatigut Peqquserluutinik Malunnarunnaarsaaneq Akiorniarlugu Allattoqarfiup ilisimatitsissutigaa. (Assi toqqorsivimmit).
Bo Amstrup/Ritzau Scanpix
Inuit attaveqaqatigiittarfiisigut - ilaatigut TikTok-ikkut aningaasanik nuussinerit pasinartut pillugit amerliartuinnartunik Aningaasatigut Peqquserluutinik Malunnarunnaarsaaneq Akiorniarlugu Allattoqarfik tigusaqartarpoq.
Taamatut Aningaasatigut Peqquserluutinik Malunnarunnaarsaaneq Akiorniarlugu Allattoqarfik, National enhed for Særlig Kriminalitetimut (NSK) (Nuna Tamakkerlugu Pinerlunniarnernik immikkuullarissunik paasiniaasartoqarfik, aaqq.) ilaasoq, nalunaarusiami nutaami nalunaaruteqarpoq.
Inuit attaveqaqatigiittarfiannut TikTokimut „aningaasanik amerlasuunik nuussinerit imaluunniit nuussinerit akulikinnerit“ pingaartumik aningaaseriviit nalunaarutigisarpaat, nalunaarusiami allassimavoq.
Periuseq taanna nutaajunngilaq, nutaajuneruvorli, Dorte Hermansen, Aningaasatigut Peqquserluutinik Malunnarunnaarsaaneq Akiorniarlugu Allattoqarfimmi siunnersortiuneq immikkoortortamilu pisortaq, oqarpoq.
- Tamanna aningaasatigut peqquserluutinik malunnarunnaarsaariaaseq nutaajusoraarput. Aningaasatigut peqquserluutinik malunnarunnaarsaanermik aningaaseriviit eqqumaffiginninnerulersimapput pasitsaassillaqqinnerulerlutillu.
- Pinerluttut aningaasat eqqunngitsuliorfigineqarsimasut isertinniarlugit periutsit nutaat atorniarlugit aqqutissarsiulersimanerinik tamanna isumaqarpoq, Ritzauimut oqarpoq.
Allattoqarfiup nalunaarutigineqartut qassiunersut oqaatiginngilaa, Dorte Hermansenili naapertorlugu 2023-mit allattoqarfiup periuseq tamanna isiginiarnerulerpaa.
Tunulequtat TikTok aqqutigalugu aningaasanik peqquserluutinik malunnarunnaarsaaniaraangamik ikiorteqartarput, taassumalu ikiortip aningaasat peqquserluutit aningaaserivimmi kontuminut nuuttarpai, assersuutigalugu aningaasanik nuussinikkut aningaasanngorluguluunniit ikisinikkut.
TikTokimi atuisut "oorinik" pisisinnaapput kingornalu "tunissutinngortillugit" atuisunut allanut nassiussinnaavaat. Taamaalillutik Aningaasatigut Peqquserluutinik Malunnarunnaarsaaneq Akiorniarlugu Allattoqarfik naapertorlugu ikiortit tunulequtap TikTokianut "tunissutinik" nassiussisinnaapput.
Tamatunga kingorna "tunissutit" nassiunneqartut "diamantinngortinneqarsinnaapput", PayPay-imullu kontorisamut aningaasanngortinneqarsinnaallutik. Taamaaliornikkut TikTok aqqutigalugu aningaasat akuerisatut isertitatut isikkoqassapput.
Inuit attaveqaqatigiittarfiini susoqarsinnaanersoq Aningaasatigut Peqquserluutinik Malunnarunnaarsaaneq Akiorniarlugu Allattoqarfiup qaammarsarusuppaa, pingaartumik suliffeqarfiit, inuit pisortallu oqartussaasut nalunaaruteqartussaasut eqqarsaatigalugit.
- Pineqartumi kisitsisaatiginngisat annertoorujussuupput, taamaattumik takusinnaasatsinnit amerlanerujussuugunarput.
- Navianartoqarsinnaasoq takusinnaatillutigu nalunaartussaatitaasunik paasititsinissaq suliassaraarput, Dorte Hermansen oqarpoq.
/ritzau/
