Pinngitsaaleeriarsimasutut nakuusertutullu piffissaligaanngitsumik pineqaatissinneqarneq uppernarsaraat
Nunatta Eqqartuussisuuneqarfiata angutip 34-nik ukiullip Maniitsumeersup piffissaligaanngitsumik pineqaatissinneqarnera uppernarsarpaa.
Leiff Josefsen
Nunatta
Eqqartuussisuuneqarfiata sapaatip akunnerani matumani angut 34-nik
ukiulik Maniitsumeersoq, Maniitsumi Esbjergip Aqqutaani 2023-mi
apriilip 14-ianni unnuakkut arlaleriarluni nakuusersimasutut aamma
sakkortuumik pinngitsaaleeriarsimasutut pisuutinneqarluni
eqqartuunneqarnera aalajangersarpaa, Kalaallit Nunaanni Politiit
ilisimatitsipput.
Unnerluutigineqartoq
eqqartuussivimmit eqqartuunneqarami eqqartuunneqarnini
suliareqqitassanngortissimavaa, piumasaralugulu
piffissaligaanngitsumik pineqaatissinneqarnini piffissamik
killilimmik pineqaatissinneqarnissani kissaatigalugu. Nunatta
Eqqartuussisuuneqarfiatali eqqartuussivimmit eqqartuussut
atuuttussanngortippaa.
Unnerluussisup
Alexander Stürupip suliap inernera naammagisimaarpaa:
-
Pinerluttoqarneranik suliaq politiit unnerluussisussaatitaasullu
ukiumi kingullermi nukippassuarnik atuiffigisaat maanna naammassivoq.
Arlaleriarluni
pineqaatissinneqareersimasoq
-
Unnerluutigineqartup inunnut allanut ulorianarpallaarnera
pissutigalugu piffissaligaanngitsumik tigummineqartussanngorlugu
pineqaatissinneqartariaqarneranik Nunatta Eqqartuussisuuneqarfiata
isumaqataanera eqqissiallaatigaara, unnerluussisoq tusagassiuutinut
nalunaarummi allappoq.
Politiit
oqarnerat naapertorlugu inuup piffissaligaanngitsumik
tigummineqartussanngorneranik pineqaatissinneqarnissaanut
aalajangiinermi unnerluutigineqartup siornatigut qanoq
annertutigisumik inunnut ulorianaatilimmik pinerlussimanera
apeqqutaasarpoq.
-
Angut 34-nik ukiulik politiinit ilisimaneqarluarpoq, piffissami
2009-miit 2020-mut inunnut navianartorsiortitsisumik pinerlussimanini
pissutigalugu arfineq-marloriarluni pineqaatissinneqarsimavoq,
katillugit ukiuni arfineq-marlunni qaammatinilu aqqanilinni
pineqaatissinneqarsimasunut inissiisarfimmiittussanngorlugu
eqqartuunneqarsimalluni, Kalaallit Nunaanni Politiit nalunaarummi
ilisimatitsipput.
Angut
34-nik ukiulik siorna apriilip 15-ianiilli tigummigallarneqarpoq,
marsillu arfernani 2024-mi Qeqqata Eqqartuussiviani
tigummigallarneqarnissaminut eqqartuunneqarpoq.