ULLORMUT NALUNAARUSIAQ
Pinngitsaaliisoqarneranik nalunaarutiginnittut arlaqartut
Pinngitsaaliinerit pingasut sapaatip-akunnerata naanerani politiinut nalunaarutigineqarput. Maniitsumi ujajaasoqarnerani takunnissimasunik politiit aamma ujaasipput.
Assi: Oscar Scott Carl
Politiit imigassartorsimanermut attuumassuteqartut ullormi kingullermi suliaqarfigaat, soorlu nakuusernerit, aqqusinermi eqqissiviilliornerit angerlarsimaffinnilu eqqissiviilliornerit, pigaartut pisortaat Aputsiaq Hansen Sermitsiamut oqarpoq.
Sumiiffinni assigiinngitsuni pinngitsaaliisoqarnerit pingasut politiinut aamma nalunaarutigineqarput.
Suliami ataatsimi pinerluttutut pasineqartoq politiinit tigusarineqarpoq, tigummigallarneqarnissaalu qulakkeerniarlugu sapaammi eqqartuussivimmut sassartinneqassaaq.
Pigaartut pisortaata pinerlineqartut eqqarsaatigalugit pisut pillugit sukumiinerusumik oqaaseqanngilaq.
Maniitsumi takunnissimasunik ujaasineq
Angut savilersorluni sioorasaaraluni aningaasanik tunniusseqqusisimasoq pillugu Maniitsumi politiit sapaammi ullaakkut nalunaaqutaq 06.52 nalunaarfigineqarput.
Tamanna Esbjerg-ip Aqqutaani pivoq, sioorasaarneqartullu aningaasaatini tunniuppai ujajaaffigineqarnerminilu ajoqusernani, pigaartut pisortaat oqaluttuarpoq.
Politiit ornigutsinneqarput pisorlu pillugu paasiniaallutik. Pinerliisorli suli tigusarineqarsimanngilaq.
Pinerluttoq ima isikkoqarpoq:
Angut kalaalerpasittoq, 20-t 30-llu akornanni ukiulik tujuulua qernertoq nasartalik.
- Takunnittoqarsimappat imaluunniit pisumut ilisimannittoqarpat tusarfigerusuppagut, Aputsiaq Hansen oqarpoq. Politiit pigaartui uunga sianerfigineqarsinnaapput: 70 14 48.
Ilulissani tigusarinnittoqartoq
Ilulissani arfininngornerup unnuaani nakuuserluni ujajaasoqarnerani takunnissimasinnaasunik politiit arfininngornermi ujaasinertik nalunaarutiginikuuaat.
Ujajaasoqarsimanngitsoq paasiniaanermi paasineqartoq nakuusertoqarsimasutullu maanna suliarineqartoq, pigaartut pisortaata maanna paasissutissiissutigaa.
Politiit suliamut atatillugu marlunnik tigusarinnipput pisunilu pingasuni unnerluutiginnillutik. Takunnissimasinnaasunik ujaasineq unitsinneqarpoq, misissuinerli suli naammassinani.
