Pisortani sulisut tamarmik suliatik pillugit nassuiaassasut Musk piumasaqarpoq

Amerikami naalagaaffimmi imaluunniit naalagaaffik sinnerlugu sulisuusut tamarmik nassuiaateqartussanngortitaapput, sapaatip akunnerata siuliani sulianik sunik ingerlatsisimanerlutik. Nassuiaasiunngitsut soraarniuteqartutut isigineqasapput.

Taamak allappoq aningaasaatilissuaq Elon Musk, Amerikami Trumpip aqutsisoqarfiani pitsanngorsaanermut immikkoortortaqarfimmi, Dogemi, siuttuusoq, attaveqaqatigiittarfik X aqqutigalugu.

- Trumpip præsidentitut ilitsersuutaa naapertorlugu, atorfillit tamarmik e-mailimik nassinneqassapput, tassani qinnuigineqassapput sapaatip akunnerata siuliani sulinerminni sunik suliaqarsimanersut nassuiaateqaqqullugit. Akissutissaqannginneq soraarnertut isigineqassaaq.

CBS News-ip naapertorlugu, atorfillit e-mailimik nassinneqareerput, tassani allassimavoq: "Sapaatip akunnerani kingullermi sulininni suut suliarivigit?"

Atorfillit immikkoortunik tallimanik imalimmik immersugassamik nassuiaateqartinneqassapput, sapaatip akunnerata siuliani sulinerminni sulianik sunik ingerlatsisimanersut, taamaattorli paasissutissat isertuussassat ilanngunnagit.

E-maili HR-ip (sulisunut immikkoortortaqarfiup, aaqq.)  mailadresseaniit nassiunneqartoq sulisunut pineqartunut piffissamik killiliinertaqarpoq, sulisullu piumaffigineqarput ataasinngornermi nalunaaqutaq 23.59 tikitsinnagu akissuteqareersimassasut, nutaarsiassaqartitsivik Reuters allappoq.

USA-p præsidentia, Donald Trump, ullumi siusinnerusukkut nammineq attaveqaqatigiittarfimmini, Truth Social-imi, allappoq Musk pitsaasumik suliamik ingerlataasoq naalagaaffiup ingerlatsinerata angissusaa annikillisarlugu, kisianni Muskip suli sakkortunerusumik iliuuseqarnissaa kissaatigalugu.

Paasissutissartaqanngilaq, pisortani sulisut peqqussummik naammassinninngippara soraarsitsiniarnermi inatsisitigut suna Muskimit tunngavigineqarnersoq.

Sulisut kattuffiat AFGE, atorfilittat naalagaaffimmit akissarsiallit sinnerlugit oqaaseqartuusoq, nalunaaruteqaruni oqarpoq, taanna "soraarsitsineq inatsisinik unioqqutitsisoq", Reuters allappoq.

- Kingumut Elon Muskip aamma Trumpip aqutsisoqarfiata takutippaat atorfilittanut naalagaaffimmit akissarsialinnut aammalu kiffartuussinernut pingaarutilinnut, amerikami innuttaasunut tunniussisunut, qanoq annertutigisumik asissuitiginerlutik, AFGE'p siulittaasua, Everett Kelly oqarpoq.

Reuters naapertorlugu Trumpip aqutsisoqarfiata naalagaaffiup aningaasartuutaanik annikillisaanissamik anguniagaqarnerata kingunerisaanik atorfilinnik nalilersuilluagaanngitsumik soraarsitsiortornerit ingerlanneqarput.

Tamatuma kingunerisaanik, kukkusoqartarsimaneragaavoq, aammalu pisortat aningaasalersugaannik ingerlatsivinni soraarsitaasimagaluartut kingusinnerusukkut piaartumik suliartorteqqinneqartarsimasut oqaatigineqarpoq, assersuutigalugu, atomip isumannaatsuunissaanik, illersornissamik aammalu nukissiuutinik tunisassiornermik suliaqartut soraarsikkaluariarlugit suliartorteqqinneqartarsimapput.