Pisortanit ikiorsiissutit pillugit ukiorpassuarni isumaqatigiinngissut kommunip ajorsarfigaa
Thyge Østergaard, Kommuneqarfik Sermersuup toqqaannartumik nalunaaruteqarani taassuma innuttaasullu allat amerlasuut pisortanit ikiorsiissutinik pisartagaannik appaasimanerata kingorna eqqartuussivimmut suliassanngortitsisoq, pingasunngormat eqqartuussinermi Nunatta Eqqartuussivia iluaqutissaanik eqqartuussivoq.
Kommuneqarfik Sermersooq Thyge Østergaardimut eqqartuussivimmi ajorsarpoq.
Assiliisoq: Leiff Josefsen
Thyge Østergaardip Kommuneqarfik Sermersuullu ukiorpassuarni isumaqatigiinngissutaat sapaatip-akunnerani matumani Nunatta Eqqartuussiviata naammassivaa.
Suliaq inunnut amerlasuunut sunniuteqarsinnaasoq, Thyge Østergaardip eqqartuussissuserisua oqarpoq.
Thyge Østergaardip ullut 14-it tamaasa 1014 koruuninik ikiorsiissutinik pisarnera 775 koruuninut Kommuneqarfik Sermersuup appartimmagu, akerleriinneq 2014-ip 2015-illu ukiup nikinnerini aallartippoq.
Innuttaasunut kommunimit ikiorsiissutinik pisartagalinnut akigitinneqartartunik appartitsineq pineqarpoq, ikiorsiissutinilli pisartagallit – Thyge Østergaard ilanngullugu – kommunip toqqaannartumik ilisimatinngilai.
Ombudsmandi: Isornartorsiornangaarpoq
Pisortanit ikiorsiissutinut akigititat nutaat Nuuk Ugeavisi aqqutigalugu kommunip nalunaarutigiinnarpai, tamannalu naammanngilaq.
Tamanna Nunatta Eqqartuussivianit Thyge Østergaardimut uppernarsarneqarpoq, taamaattumillu kingumoortumik pisinnaatitaaffigisani, tassa ukiuni arlalinni pineqartumi, pisortanit ikiorsiissutinik pisinnaatitaaffigisani, pisinnaavaa.
Kommunip periaasia isornartorsiorneqarnissaanut pissutissaqarluartoq siusinnerusukkut Ombudsmandip aamma oqaatigaa, kommunilli suliaq nakkaannarfigiumanngilaa ukiullu ingerlaneranni eqqortumik iliuuseqartoqarsimasoq aalajangiusimalluinnarlugu. 2020-mi Thyge Østergaardip pisortanit ikiorsiissutai kingumut atuutilersumik kommunip appartinniaraluarpai, tamannali Nunatta Eqqartuussivianit itigartinneqarpoq.
Aningaasartuuteqarani eqqartuussivimmi suliassanngortitsisoq
Thyge Østergaardip eqqartuussivimmi suliassanngortitsinissamut aningaasartuuteqannginnissaa, eqqartuussissuserisumillu Marie Louise Frederiksenimit sinniisoqarsimanera, tusagassiuutini innuttaasunik kiffartuussisumi KNR-imi 2021-mi allaaserineqarpoq.
Suliaq innuttaasunut 1500-t angullugit amerlassuseqartunut, Thyge Østergaarditulli pisortanit ikiorsiissutinik appaavigineqartunut, sunniuteqarsinnaasoq, eqqartuussissuserisoq ilisimatitsivoq.
Eqqartuussiviit qullersaannut suliamik ingerlateqqiinissamut Kommuneqarfik Sermersooq qinnuteqarsinnaavoq.
Eqqartuussineq tamatumalu isumaa Kommuneqarfik Sermersuumit oqaaseqarfigineqarnissaa Sermitsiap sulissutigaa.
