Pisortat akissarsiaat: Mariane Paviasenip Naalakkersuisut akissutaat naammaginngilaa

Aningaasarsiat qaffasissut INI-mi aqutsisumut naammaginanngillat

Inuit Ataqatigiit sinnerlugit Inatsisartunut ilaasortap Mariane Paviasenip namminersorlutik oqartussat suliffeqarfiutaanni pisortat akissarsiaat pillugit paragraf 37 naapertorlugu apeqqutini Naalakkersuisut avaqqutaarillutik akissuteqarnerat iluaagaa.

- Apeqqutima akissutissarsinissaat naatsorsuutigigaluarpara, akissutissarsinngilangali. Siulersuisut pisortanut annertuunik akissarsialersuisarnerannut Naalakkersuisut akuliukkumanngitsut maanna paasivara. Uggoraara.

Mariane Paviasen paragraf 37 naapertorlugu apeqquteqaatiminut Naalakkersuisut siulittaasuata Múte Bourup Egedep akissutai pillugit Sermitsiamut allappoq:

- Inuiaqatigiit pigissaanni aktiaatileqatigiiffinni pisortaatinneqartartut aningaasarsiaat Naalakkersuisunit pissusissamisoortutut isigineqarpat?

- Naalakkersuisut piginneqatigiilluni suliffeqarfiit inuiaqatigiinniit pigineqartut pisortaasa aningaasarsiaannut imminut naleqqunnerusunngorsarniarlugit sulissuteqarnissamut piumassuseqarpat?

- Naalakkersuisut pisortat/inuiaqatigiit pigisaani piginneqatigiiffinni aktiaatileqatigiiffiit pisortaanut aningaasarsiaritinneqartartunut qaffasissorujussuannut qanoq isumaqarpat?

Mariane Paviasen Jensen akerliliivoq qaffasissunik akissarsiaqartitsinermut aqutsisunut

Mariane Paviasenip Naalakkersuisunut qaammatip siuliani apeqqutaasa taakku ilaraat:

- Qullersat akissaataannik aalajangersaasarnermut tunngatillugu ingerlatseqatigiiffiup siulersuisa akisussaaffigalugulu suliassaraat, ingerlatseqatigiiffimmili sulisunik aqutsisunik akissarsiat ingerlatseqatigiiffinni ataasiakkaani qullersanit aalajangerneqartarput Taamaattumik ilisimatitsissutigisinnaavara niuernikkut illersorneqarsinnaasumik ileqquusullu atuuttut naapertorlugit ingerlatsisoqarpat ingerlatseqatigiiffiit Namminersorlutik Oqartussanit pigineqartut namminneerlutik atorfinitsitsisarnermut akissarsiaqartitsinermullu najoqqutassaminnik aalajangersaasinnaammata, akuleruttussaannginnermut tunngaveqarneq Naalakkersuisut malimmassuk, Naalakkersuisut siulittaasuat Múte Bourup Egede allappoq.

Oqartussat suliffeqarfiutaanni pisortat akissarsiaasa qaffasippallaarnerat Mariane Paviasen Jensenip isornartorsiornikuuaa. Namminersorlutik Oqartussat suliffeqarfiutaat Royal Greenland siuttoralugu inissiaatileqatigiiffimmut Iseritimut Kommuneqarfik Sermersuumit pigineqartumut. Royal Greenlandimi pisortaaneq Susanne Arfelt Rajamann 8 millionit koruuninik siorna akissarsiaqarpoq, INI-milu pisortaq Henrik Rafn 2 millionit koruuninik akissarsilluni. Mariane Paviasen isumaqarpoq akissarsiat qaffasippallaartut.

Eqeersimaartumik piginnittuuneq

Naalakkersuisut piginnittuunermut politikkimik Inuit Ataqatigiit, Siumut, Demokraatit Atassutillu akornanni isumaqatigiissutaat naapertorlugu akulerutinnginnissamik tunngaviusumut sinaakkutit iluini Naalakkersuisut eqeersimaartumik ingerlatseqatigiiffinnut piginnittuusinnaasariaqartut Naalakkersuisut siulittaasuata Múte Bourup Egedep nassuiaatigaa.

Naalakkersuisut ”Namminersorlutik Oqartussat ingerlatseqatigiiffiutaannut tunngaviit aalajangersimasut akissarsianut tunngasut sulissutigaat. Sulineq taanna ukiaru naammassissangatinneqarpoq”, nangippoq.

- Taassumap saniatigut Namminersorlutik Oqartussat aktianik piginneqatigiiffiini akissarsiat nassuiaasiorfigissallugit pilersaarutigaarput. Taamaalilluni naleqquttumik suliniutaasinnaasunik Naalakkersuisut nalilersuinissaminnut periarfissagissaa rnerussa mmata, Naalakkersuisut siulittaasuata akissutaani allassimavoq.

Siulittaasoq illersorpaa millioninik akissarsiaqartitsineq aqutsisumut taaneqarlunilu naapertuuttumik

Politikkerit amerlanerusut pisortat akissarsiaasa qaffasissutut appartinnissaat kissaatigissagaat Mariane Paviasen neriuppoq. Namminersorlutik oqartussat suliffeqarfiutaanni pisortat akissarsiaasa sammineqarnissaat anguniarlugu Naalakkersuisut kimigiiserfigissallugit oqarpoq.

Paviassen: - Aningaasarsiat killilerneqarlik

- Suliffeqarfinni Namminersorlutik Oqartussanit pigineqartuni siulersuisunut maleruagassiornissaq minnerpaatut iliuuserineqarsinnaavoq. Siunnersuutigissavara pisortanut qanoq aningaasarsiaqartitsinissamut taavalu suut ajunngitsorsiarineqarsinnaanerannut killiliisoqarnissaa.

- Ajoraluartumik Naalakkersuisut maannakkut allannguiniarpasinngillat. Neriuppunga Naalakkersuisut pissutsit eqqarsaatigeqqissaarnerulissagaat, Mariane Paviasen oqarpoq.

Partiimut naligiinngissutsinik annikillisitsiniartunut ilaasortaalluni oqarpoq.

- IA-p anguniagaasa ilagaat pisuussutit uumassusillit nunallu pisuussutai tamarmik innuttaasunut iluaqutaanissaat, Mariane Paviasen oqarpoq.