Pisut assigiinngitsut politiit ulapputigigaat

Kalaallit Nunaanni Politiit ullormi kingullermi ulapaarsimaqisut pigartut pisortaat Poul Kreutzmann oqarpoq.

Pinngitsaaliilluni arnerisoqarneranut nakuusernernullu suliat sisamat aallartinneqartut pigaartut pisortaata ilaatigut eqqaavai. Nakuusernermut tunngassuteqartut ilaat Sisimiuni ulloq unnuarlu paaqqinnittarfimmi pivoq, tassani 17-inik ukiulik sulisumut nakuusersimasutut pasineqartumut suliaq aallartinneqarluni.

- Pisortani atorfilimmut nakuuserneruvoq, pigaartut pisortaat oqarpoq.

Inuusuttut marluk ujajaasutut iliornertik pillugu tigusarineqarput

Nuummi sioorasaarisoqarsimasinnaaneranut ujajaariartunullu pasisanut suliat aamma aallartinneqarput.

Nuummi illoqarfiup qeqqani pisiniarfiup Akikip eqqaani nukappiaqqat 17-inik ukiullit marluk eqqissiviilliortitsisut politiinit sisamanngornermi ualikkut orniguffigineqarput.

Immiaaqqanik angutillu pisiaanik tilleriaraluartutut pasineqarlutik tigusarineqarput.

17-inik ukiullit taakku marluk kingorna iperagaapput, eqqartuussivilersuunneqassallutillu.

Imigassaq pissutaasoq

Eqqissiviilliortitsinerit pingasut, aserorterineq ataaseq imigassartorsimallunilu biilersimasut pasisaq ataaseq pillugit suliat aamma aallartinneqartut pigaartut pisortaata aamma eqqaavaa.

Angerlarsimaffinni eqqissiviilliornerit aqqanillit, taakkunannga marluk meerartallit, politiinit aamma iliuuseqarfigineqarput.

Aammattaaq inuit aalakoortut aqqaneq-marluk imminut paarinngitsoorsimapput.

Pisut amerlasuut pillugit pigaartut pisortaat ima naliliivoq:

- Aningaasarsinerit imigassartornerillu pissutaanerpaapput-aasiit. Imigassat pissutaalluni meerarpassuinaasit eqqugaapput. Sapaatit akunnerata naanerani ulapaaqqinnissarput ilimagaarput.