Assersuut siulleq tassaavoq napparsimasoq qaammatini sisamat tallimallu akornanni Danmarkimiippoq. Napparsimasoq namminersortuuvoq isertitaqarniarunilu angerlarsimaffiminiittariaqarpoq sulilluni.
Napparsimasoq Danmarkimut aallarmat inuusuttoq 18-ileeqqammersoq angerlarsimaffimmini paarsisuusariaqarsimavoq akiligassanillu aningaasartuutinillu allanik akiliinissaq isumagisariaqarsimavaa, tassani napparsimasoq aningaasanik nassiussisarluni.
Assersuut siulleq tassaavoq napparsimasoq qaammatini sisamat tallimallu akornanni Danmarkimiippoq. Napparsimasoq namminersortuuvoq isertitaqarniarunilu angerlarsimaffiminiittariaqarpoq sulilluni.
Napparsimasoq Danmarkimut aallarmat inuusuttoq 18-ileeqqammersoq angerlarsimaffimmini paarsisuusariaqarsimavoq akiligassanillu aningaasartuutinillu allanik akiliinissaq isumagisariaqarsimavaa, tassani napparsimasoq aningaasanik nassiussisarluni.
Aningaasat kommunimit qaammammi siullermi kaasarfimmiussatut tunniunneqartarput, kingornali kaasarfimmiussatut tunniunneqartartut atorunnaarsinneqarput napparsimasorlu isertitaarulluni. Taamaattumik kommunimut aningaasatigut ikiorsiisoqarnissaanik qinnuteqartoqarpoq, suliarli uteqattaartut pivoq sullissisoq immersugassanik nassiussimmat. Taakkua immersoriarlugit Kalaallit Nunaannut utertinneqarput. Tamatuma kingorna sullissisoq allakkanik arlalinnik aamma immersugassanik akisassanillu nassiussivoq. Taava sullissisoq nakorsap nalunaarutaanik pisariaqartitsileriataarpoq, nakorsap nammineq allagaanik – tassa Kalaallit Nunaanni napparsimmavimmi - taamaattunik Danmarkimi napparsimmavimmi allattoqarsinnaanngimmat. Nakorsap Kalaallit Nunaanniittup allagaa pissarsiariuminaatsoq paasinarsivoq, eqqaasitsissutigineqaqattaarlunilu.
Nalaatsornerinnakkut napparsimasoq Kalaallit Nunaanni kommunimi borgmesterimik oqaloqateqarpoq. Borgmesterip uppernarsarpaa napparsimasoq aningaasatigut ikiorserneqarsinnaatitaasoq, taannalu sullissisuminut sianerpoq borgmesterillu oqaluussimanera eqqaallugu. Taamaattoqarmat suliaq aatsaat ingerlaqqippoq. Napparsimasoq pisussaaffimmitut aningaasanik ikiorserneqarpoq.
Qaammatit qulit qaangiummata siusinaarluni soraarninngortoq
Napparsimasoq tullia assersuutitut atugarput tassaavoq siusinaartumik soraarnerussutisiaqalernissaminik qinnuteqartoq, akissutisinissamullu arlaleriarluni eqqaasitsisaqattaarsimasoq. Qaammatialuit qaangiummata napparsimasoq Kalaallit Peqqissartut Københavnimi Angerlarsimaffiannut tikippoq oqaluttuaralugulu kommunimi suliap sivisuumik ingerlanera. Peqqissartut Angerlarsimaffiat iliuuseqarpoq napparsimasoq sinnerlugu akissuteqaqqusilluni, tamatumalu kingorna suliamik suliaqartut uppernarsaatinik nutaanik piumapput immersugassanillu nutaanik nassiussillutik. Paasitinneqarpoq suliaq qaammatit pingasut-sisamat qaangiuppata pulaarnermi aalajangiiffigineqarnissaa utaqqisariaqartoq. Napparsimasoq aningaasatigut periarfissaqanngilaq taamalu sivisutigisumik suliarineqarnissaa utaqqisinnaanagu. Aningaasaateqanngikkunimi Kalaallit Nunaanni inaa annaaneqaratarsinnaavoq. Napparsimasup qinnuteqaqqaarnermi kingorna qaammatit qulit qaangiuttut siusinaartumik soraarnerussutisiaqalerpoq, suliarlu aatsaat ingerlallualerpoq suliamik suliaqaqqaaraluartoq taarserlugu allamik sullissisoqalermat.
Tupinnartoq paasiuminaatsorlu
Assersuutit pingajuat atuakkiortup Franz Kafkap silarsuaanut — silarsuarmut tupinnartumut paasiuminaatsumullu — eqqaanarpoq.
Napparsimasoq sivikitsumik Peqqissartut Illuanniinnissaa, tassa sapaatip-akunnerani, pilersaarutaagaluarpoq. Taassumali katsorsarneqarnera qaammatinik marlunnik sivitsorneqarpoq. Napparsimasoq namminersortuuvoq kommuniminullu aningaasatigut ikiorserneqarnissamik qinnuteqarpoq. Peqqissartut Illluata napparsimasoq peqatigalugu kommuni attaveqarfigaa, sullissisorlu immersugassanik nassiussivoq. Taakku immersorneqarput kommunimullu utertinneqarlutik.
Taava suliaq uteqattaalerpoq. Sullissisoq ullualuit qaangiummata immersugassanik allanik nassiussivoq. Taakkulu immersorneqariarlutik utertinneqarput, sullissisorlu kingorna immersugassanik allanik akisassanillu nassiusseqqippoq.
Qaammat ataaseq taamaaliortoqareersoq sullissisup pisortaa saaffigineqarpoq, paasiniarlugu suliaq sooq taama uteqattaaginnarnersoq. Piffissami tassani napparsimasup Kalaallit Nunaanni innaallagissamik imermillu atuisuuffiata akiligassat akilerneqanngippata matusiniarluni kalerriutigereerpaa. Pisortaq aatsaat saaffigineqareermat suliaq akuerineqarpoq naammassineqarlunilu.
