Aalisarnerup teknikikkut iluarsartuussivigineqarnissaa pillugu nalunaarummi immikkoortut marluk Polar Seafoodimit sakkortuumik isornartorsiorneqarput.
Aappaa tassaavoq Namminersorlutik Oqartussat umiarsuarnut raajarniutinut killiliussaat nutaaq, tassa 3 sømilip iluani raajarniat angallataat annerpaamik 40 meterinik takissuseqassasut 1.000 tonsinillu oqimaassusilinnik useqarsinnaassasut. Malittarisassaq umiarsuarnut nutaanut atuutissaaq, maannalu kilisaatit raajaniutaareersut nutaamik taarserneqarnissaat tikillugu aalisarnertik ingerlatiinnarsinnaavaat.
Aalisarnerup teknikikkut iluarsartuussivigineqarnissaa pillugu nalunaarummi immikkoortut marluk Polar Seafoodimit sakkortuumik isornartorsiorneqarput.
Aappaa tassaavoq Namminersorlutik Oqartussat umiarsuarnut raajarniutinut killiliussaat nutaaq, tassa 3 sømilip iluani raajarniat angallataat annerpaamik 40 meterinik takissuseqassasut 1.000 tonsinillu oqimaassusilinnik useqarsinnaassasut. Malittarisassaq umiarsuarnut nutaanut atuutissaaq, maannalu kilisaatit raajaniutaareersut nutaamik taarserneqarnissaat tikillugu aalisarnertik ingerlatiinnarsinnaavaat.
Tunisisussaatitaaneq
Pissutsit aappaat isornartorsiorneqartoq tassaavoq nalunaarut malillugu raajarniutit kilisaammi tunisassiornissamik akuersissutaateqartut ukiortaamiit Disko-karsimi aalisaqqusaajunnaarnissaat.
Allannguutit Polar Seafoodimut kisimik sunniuteqaannaratik kalaallinut aalisarnermik ingerlatsisunut allanut aamma sunniuteqassasut kiisalu nunatta karsiata akitsuutinit akileraarutiniillu isertitassaraluani annaassagai Kalaallit Nunaanni aalisarnermik ingerlatseqatigiiffiit namminersortut annersaata erseqqissarpaa.
Raajarniutit angissusaannut killiliineq Namminersorlutik Oqartussat aalisarnermut inatsimmut ukioq manna siusinnerusukkut akuerineqartumut tunngaviusunut akerliliisoq Polar Seafood isumaqarpoq.
- Aalisariutit angissusaannut killiliinikkut inatsisiliortut aalisariutit sumiiffinni aalajangersimasuni qanoq atorluartigisinnaanerat aqunniarsaraat, taamaalillunilu aalisarnermik ingerlatsisut aningaasatigut imminut akilersinnaanngitsunik nutaalianik aalisariutiliornissaannik pinngitsaalillugit, taakkualu isumannaatsuunermut, ilorrisimaarnissamut aamma/imaluunniit aningaasatigut ingerlatsinermi assigiinngitsorpassuarnut atorluarsinnaanermut piumasaqaatinik nutaaliaasunik naammassinnissinnaassanngillat, Polar Seafood Greenlandimi pisortat Miki Brøns aamma Bent Salling ingerlatseqatigiiffiup tusarniaanermut akissutaani Sermitsiap pissarsiarisimasaani allapput.
Royal Greenlandi isumaqatigigaat
Angallatit killeqarnerat 50 meterinngortinneqassasoq, killeqanngitsumillu usisinnaatitaassasut taakku siunnersuutigaat.
- Taamaasilluni umiarsuarnik nutaanik ingerlatsinermut imminut akilersinnaasunik, inuttanut, umiarsuarmut tamarmut ilorrisimaarnartuanut isumannaatsuuneranullu annikillisitsinngitsumik sanasoqarsinnaalissaaq, Polar Seafoodimit tunngavilersuipput.
Umiarsuit angissusaannut killiliussaq 45-50 meterit akornanniissasoq Royal Greenlandip Sermitsiamut siusinnerusukkut oqaatiginikuuaa, taamaalillunilu Namminersorlutik Oqartussat ingerlatseqatigiiffiutaata unammillertiminnit annermit isumaqatigineqarpoq.
Allannguut pingaarutilik alla tassasavoq aqutsiveqarfimmi Sisimiut-karsimi Disko-karsimilu raajat pisat nunami tunisassiarineqartussanngorlugit tulaanneqartartussanngussammata taannalu "allannguineq annertooq aalisartut allannguinermut piffissalernagit nalimmassartussanngorneqartutut“ isigineqarpoq.
Unioqqutitsilluni pigisanik arsaarinninneq
Namminersorlutik Oqartussat aalisarnermut inatsisip akuersissutigineqarnissaa sioqqullugu oqaaseqaataat, tassaasut tunisisussaatitaaneq pigisanik pinngitsaaliilluni arsaarinninnerusutut nassuerutigineqarnera taamaaliornerlu taarsiisussaatitaanermik malitseqarsinnaasoq Polar Seafoodip innersuussutigai:
”Tassunga atatillugu nunami suliffinni sulisoqarnissaq pillugu pingaarnertigut
kissaateqarnermik eqqarsaatiginnittoqassammat soorlu aamma allannguinerit ingerlatsisunut
atukkanik ajornerulersitsisut (assersuutigalugu tunisinerup annertusinissaanik
piumasaqarnikkut) Naalakkersuisut taarsiinissamut akisussaalersinnaanerat
isiginiarneqassammat.
Pisat tulaanneqartussaasut amerlassusiannik Naalakkersuisut amerliliissappata, tamatumalu
kingunerisaanik ingerlatsisut aningaasaqarnerat ajorseriarluni, allannguinerup
pilersinnissaanut piffissaliinissamut pisariaqartitsineq isumaliutigineqartussaassaaq.”
- Tunisisussaatitaanerup 25 procentimiit 30 procentimut allanngortinneqarneranut atatillugu ukiut tallimat ikaarsaariarfiunissaa (sivikippallaartoq), ilaatigut pigisanik pinngitsaaliilluni arsaarinninnerummat taarsiissuteqarnissamik piumasaqaatit naaperiarneqarneqassasut. Tunngavilersuutigineqartorli taanna nalunaarutip suliarineqarnerani ilanngunneqarsimagunanngilaq, Miki Brøns Bent Sallingilu tikkuaapput.
- Nalunaarusiaq maannakkutut isikkoqartoq atuutilersinneqassappat unioqqutitsilluni pigisanik pinngitsaalilluta arsaarneqartutut raajartassaraluit tamakkiisumik taarsiivigineqarnissaannik piumasaqassaagut, tusarniaanermi akissummi allassimavoq.
Aningaasatigut kinguneri
Polar Seafood naapertorlugu allannguutit taakku aningaasaqarnikkut kinguneqarujussuassapput:
- Aalisarnermut akitsuutinit akileraarutinillu A-nit isertitat 100 millionit koruunit missaannik appariassapput.
- Umiarsuarmi inuttat katillugit 35 millionit koruuninik isertitakinnerussapput.
- Umiarsuit naatsorsuutaasa inernerannit, soorlu aningaasaleeqataanermut aningaasartuutit aningaasaliinernullu nutaanut nalikillisitsisartut, atorunnaassapput.
Aasianni suliffissuaq aarlerinartorsiortoq
- Kilisaatit anginerusut raajartassaat killeqalernerannik tamanna kinguneqassaaq. Raajat Sisimiunut Nuummullu suliffissuarnut tulaanneqartalissapput, taakkumi raajanik qerisunik tunisassiornissamik periarfissaqarluarnerupput. Taamaalillunilu Aasianni suliffissuatta matuneqarnissaanik aarlerinartorsiorneq nalunaarummit allanngortinneqassanani, Miki Brøns aamma Bent Salling erseqqissaapput.
