Sermersuup Eqqartuussisoqarfiani suliaq annertunerusoq ataasinngormat aallartippoq. Angut politiiusimasoq niviarsiaqqanik marlunnik pinngitsaaliillunilu kannguttaatsuliorsimasutut aamma niviarsiaqqamik allamik isumapiloqarluni tatiginnilersitsiniarsimasutut unnerluutigineqartumut suliaq pineqarpoq. Unnerluutigineqartoq eqqartuussinissap tungaanut Nuummi tigummigallarneqarpoq.
Sumiiffimmini peqatigiiffimmi suliaqartuusimavoq, ilaatigut meeqqat inuusuttullu pillugit suliniuteqartarluni. Tassani suleqataasarnini aqqutigalugu niviarsiaqqat marluk pinngitsaalisimagai unnerluutigineqarpoq. Niviarsiaqqat pingajuat suminngaanniit nalunngissimaneraa allassimanngilaq.
Sermersuup Eqqartuussisoqarfiani suliaq annertunerusoq ataasinngormat aallartippoq. Angut politiiusimasoq niviarsiaqqanik marlunnik pinngitsaaliillunilu kannguttaatsuliorsimasutut aamma niviarsiaqqamik allamik isumapiloqarluni tatiginnilersitsiniarsimasutut unnerluutigineqartumut suliaq pineqarpoq. Unnerluutigineqartoq eqqartuussinissap tungaanut Nuummi tigummigallarneqarpoq.
Sumiiffimmini peqatigiiffimmi suliaqartuusimavoq, ilaatigut meeqqat inuusuttullu pillugit suliniuteqartarluni. Tassani suleqataasarnini aqqutigalugu niviarsiaqqat marluk pinngitsaalisimagai unnerluutigineqarpoq. Niviarsiaqqat pingajuat suminngaanniit nalunngissimaneraa allassimanngilaq.
Unnerluussisup angut ukiuni arfineq-marlunni pineqaatissinneqarsimasunut inissiisarfimmiittussanngortinneqarnissaa piumasaraa. Unnerluussissutaa 20-nik immikkoortoqarpoq, ingammik kannguttaatsuliornermut tunngasunik. Unnerluussissummi allassimasut naapertorlugit angerlarsimaffinni, akunnittarfinni peqatigiiffiullu angalanerini Kujataani Avannaanilu pisuni kannguttaatsuliornerit pisimapput.
Suliamut tunngatillugu atinik taaseqqusaanngilaq, taamaattumik angutip aqqa tamanut saqqummiunneqarsinnaanani.
14-inik ukiulik atoqatigisimagaa
Unnerluutigineqartoq pinngitsaaliilluni atoqateqarunnarani allanulluunniit pinngitsaaliiunnarani eqqartuussivimmi oqarpoq. Amerlasooriarluni kannguttaatsuliorsimasunut unnerluutigineqarnini aamma paasisinnaanngilaa.
Angutilli niviarsiaqqat pineqartut marluk atoqatigisimallugit nassuerutigaa. Taakkua namminneq piumasaat malillugu, naqissusiivoq. Niviarsiaqqap aappaa 14-inik ukioqartoq atoqatigisimallugu nassuerutigaa, tassa atoqateqarsinnaaneranni ukiumikkut inuuttut. Ingerlaannarli paasisimavaa sianilliornerusoq, oqarpoq.
Inatsisit siorna allanngortinneqarnerat taamaalilluni sunniuteqarsinnaavoq. 22-nik ukioqalereersup meeraq 15-it inorlugit ukiulik atoqatigiguniuk pinngitsaaliisimasutut pillarneqarsinnaavoq.
Isumapiloqarluni tatiginnilersitsiniaanermut suliaq siulliusinnaasoq
Niviarsiaqqalli aappaanut tunngatillugu aatsaat 15-ileereermat atoqatigiittalersimallutik angutip oqaatigaa. Peqatigiiffilerineranut piffissami tassani attuumassuteqanngitsoq ilanngullugu oqaatigaa.
Eqqaaneqareersutut niviarsiaqqamik allamik aamma isumapiloqarluni tatiginnilersitsiniaasimavoq. Tatiginnilersitsiniaaneq tassaavoq pinerluttup meeqqamut imaluunniit inuusuttuaqqamut tatiginnilersitsiniaalluni attaveqartartoq kinguaassiutitigut kannguttaatsuliorniarluni atornerluiniarluniluunniit.
Isumapiloqarluni tatiginnilersitsiniaaneq 2024-mi juulimi pinerluttulerinermut inatsimmi aatsaat atuutilersinneqarpoq. Taamaattumik eqqartuussineq manna Kalaallit Nunaanni inatsisip nutaap atuutilernerani siullersaanersoq Sermitsiap paasiniarpaa.
Angutip niviarsiaqqallu Messengerikkut allaqatigiittarsimanerisa uppernarsarneqarneranut ataasinngornermi piffissarujussuaq atorneqarpoq.
Eqqartuussineq marlunngornerup ullaap-tungaani nanginneqaqqippoq, tassani isumapiloqarluni tatiginnilersitsiniarsimanermut tunngasut pineqassallutik. Tamatuma kingorna ilisimannittut eqqartuussivimmi oqaluttuartinneqassapput.
Eqqartuussineq sapaatip-akunnerani matumani ingerlanneqassaaq, marlunngornerullu tulliani naammassineqassasoq naatsorsuutigineqarpoq.
