Politiit: Arnaq 200 gram kokainimik eqqusseriarsimasutut pineqaatissinneqarpoq
Kokainimik 200 gramingajammik nunatsinnut eqqusseriartoq, ukiuni sisamani qaammatinilu arfinilinni pinerluuteqarsimasunut inissiisarfimmiittussanngortinneqarluni pineqaatissinneqarpoq.
Arnaq ukiunik 51-inik ukiulik eqqartuussivimmi ukiut sisamat affarlu pineqaatissinneqarpoq kokainimik 200 gram missaannik eqqusseriarsimasutut.
Leiff Josefsen
Arnaq 51-inik ukiulik Danmarkimiit Kalaallit Nunaannut angalasoq, Kangerlussuarmi mittarfimmi arfininngornermi 25. maj ilanngaaserisunit unitsinneqarpoq. Arnaq angalasoq kokainimik 200 gram missiliorlugit oqimaatsigisunik nassataqartoq paasineqarpoq.
Aqaguani, tassa sapaatiummat 26. maj Sermersuup Eqqartuussiviani eqqartuunneqarpoq, suliaq nassuerutiginninnertut suliarineqarluni, taamaattumillu ingerlaannartumik pineqaatissiinissaq atuuttussanngortinneqarluni. Tamanna Kalaallit Nunaata Politiivinit nalunaarutigineqarpoq.
- Eqqartuussut pitsaalluinnarpoq, takutippaa ikiaroornartunik sakkortuunik Kalaallit Nunaannut eqqussisarneq ilungersunartutut isigineqartoq. Aamma suliap taama sukkatigisumik aalajangiiffigineqarsimanera naammagisimaarinnippoq, Kalaallit Nunaanni Politiini unnerluussisussaatitaasoq Lars Petersen oqarpoq.
Arnaq Kangerlussuarmi ilanngaaserisunit unitsinneqartoq misissorneqarnerani kokainimik 200 grammit missaanniittumik nassaartoqarsimasoq, politiit ilisimatitsipput.
Ukiuni sisamani qaammatinilu arfinilinni pineqaatissinneqartoq
- Unnerluussisussaatitaasut piumasaat malillugu ukiuni sisamani qaammatinilu arfinilinni pineqaatissinneqassasoq eqqartuussiviup aalajangerpaa. Pineqaatissiissutip atuutsilernissaata tungaanut politiinit tigummigallarneqaannassaaq, politiit allapput.
Kalaallit Nunaanni Politiit sapaatip akunnerata naanerani Sermitsiamut paasissutissiissutigaat suliat arlallit ikiaroornartunut tunngassuteqartut politiinit paasiniarneqartut.
