Illoqarfimmi politiit nukiinik katersuisinnaasumik Nuummi
politeeqarfik nutaaq pilersinneqassanersoq, Danmarkimi inatsisinik
atortitsinermut ministeri novembarip naanerani aperineqarpoq.
Maanna Naalagaaffiup politiivisa Kalaallit Nunaanni Politiit
oqaaseqartereeraallu Danmarkimit akissuteqartoqarpoq.
Illoqarfimmi politiit nukiinik katersuisinnaasumik Nuummi
politeeqarfik nutaaq pilersinneqassanersoq, Danmarkimi inatsisinik
atortitsinermut ministeri novembarip naanerani aperineqarpoq.
Maanna Naalagaaffiup politiivisa Kalaallit Nunaanni Politiit
oqaaseqartereeraallu Danmarkimit akissuteqartoqarpoq.
- Politiit attartugassamik sulisunut tamanut
inissaqartitsisumik nassaarnissaminnut piffissami sivisuumi
Nuummi periarfissarsiorsimapput. Maannakkut illorineqartut
politiinut inikippallaarput, illunilu arlalinni silaannalunnera
ajornartorsiutaavoq, akissuteqaammi allassimavoq. Illumik attartornissaq
pilersaarutaavoq, namminerlu pigisaqalernissaq pilersaarutaanngilaq.
- Nuummi illut pioreersut piumasaqaatinik taakkuninnga
naammassinnissinnaasut Kalaallit Nunaanni Politiit naliliipput, taamaammat
nutaamik sanaartornissaq pisariaqanngilaq. Maannali illunik pioreersunik
politiit pisariaqartitaannik matussusiisunik politiillu maanna aningaasatigut
periarfissaasa iluanni aningaasalersorneqarsinnaasunik
nassaartoqarsinnaasimanngilaq, ilisimatitsissutigineqarpoq.
Taperseraa
Folketingimut ilaasortaq Aaja Chemnitz, IA, suliamut
tunngasumik apeqquteqartuuvoq. Naalagaaffik ilaatigut eqqartuussiveqarnermut
aningaasat atorlugit politeeqarfinnik nunami sumiiffinni arlalinni
pitsanngorsaasimasoq AG-mut oqarpoq.
Ilulissani aamma politeeqarfik nutaaq siorna maajimi
atoqqaartinneqarpoq.
- Nuuk ilanngunneqanngilaq, tamannalu pingaaruteqaraluarpoq.
Tamanna taperserpara, tassami suliassat ataatsimut katersorneqarnissaat
pisariaqarpoq. Aammali nunani pingasuni, Kalaallit Nunaanni, Danmarkimi
Savalimmiunilu, politiit aningaasaqarnerat tatineqarsimasoq erseqqippoq, Aaja
Chemnitz oqarpoq.
Torshavnimi politiit ukiualuit matuma siorna
aningaaseriviusimasumut nuupput, aningaasartuutigineqartullu 140 million
koruuningajaapput. Tassani nuunneq ilaatigut politeeqarfiup silaannalunneranik
aamma peqquteqarpoq.
Savalimmiut Kalaallit Nunaannit aningaasanik
pissarsiniarnermi iluatsitsilluarnerunersoq AG-p Aaja Chemnitz aperivaa.
Taannali taama isumaqanngilaq. Taassuma Nuummi pinerluuteqarsimasunut
inissiisarfik sananeqarnermini milliardit affaannik akeqarsimasoq sanilliuppaa.
- Kalaallit Nunaannut Savalimmiunullu sanilliullugu
tunngavissaqarluarluta malinnaalluarpugut, oqarpoq.
