Politiit: Nunani tamalaani ingerlatsisinnaanermut allagartanik tunniussisarunnaarpugut
Kalaallit Nunaata Politiivi ukiorpassuarni Kalaallit Nunaanni ingerlatsisinnaanermut allagartamik nunani tamalaani atuuttumik innuttaasunut tunniussisarnikuupput, naak Kalaallit Nunaanni aqqusinermi angallannermi inatsisini ingerlatsisinnaanermut allagartanut taakkununnga malittarisassaqanngikkaluartoq. Taamaattumik taamaaliortarneq politiit unitsissimavaat.
Kalaallit ingerlatsisinnaanermut allagartaat EU-mi ingerlatsisinnaanermut allagartamut naleqqiunneqarsinnaanngilaq, biilernermik ilinniarneq allanngortinneqaraluarpalluunniit, taama nalunaarpoq Angallannermut Aqutsisoqarfik.
Leiff Josefsen
Nunani tamalaani ingerlatsisinnaanermut allagartanik tunniussisarunnaarsimallutik, Kalaallit Nunaanni Politiit Facebookikkut naatsumik nalunaaruteqarput.
Nunani EU-p, Schweizip aamma EØS-ip nunaani pingasuni (Island, Norge aamma Liechtenstein) avataanni biilerniaraanni, nunat tamalaat akornanni ingerlatsisinnaanermut allagartaqartoqartariaqarpoq. Malittarisassat pillugit Angallannermut Aqutsisoqarfimmik Kalaallit Nunaanni Politiit oqaloqatiginnereersullu, nunat tamalaat akornanni ingerlatsisinnaanermut allagartaqarneq pillugu Kalaallit Nunaanni aqqusinermi angallannermi inatsimmi malittarisassaqartoqanngitsoq paasineqarpoq.
Danmarkimi angallannermut ministerip akissuteqarnerata kinguninngua nutaarsiassaq takkuppoq, kalaallillu ingerlatsisinnaanermut allagartaat EU-mi ingerlatsisinnaanermut allagartamut naleqqiunneqarsinnaassasoq, kalaallillu biilertartut qallunaatut innuttaassuseqartutut allatulli pisinnaatitaaffeqalissallutik naatsorsuutigissanngikkaat, tassani takutinneqarpoq.
- Kalaallit Nunaat EU-mut imaluunniit EØS-imut ilaasortaannginnera pissutigalugu, ilaatigut EU-p ingerlatsisinnaanermut allagartamut qullersaqarfik naapertorlugu, Kalaallit Nunaat nunatut allatut isigineqarpoq. Taamaattumik nunat EU-mi ilaasortaasut kalaallit ingerlatsisinnaanermut allagartaannik akuersinissamut pisussaaffeqanngillat. Kalaallit Nunaat EU-mut ilaasortaanngimmat taamaalillunilu EU-p ingerlatsisinnaanermut allagartamut inatsisaanut ilaanani, kalaallit ingerlatsisinnaanermut allagartaat EU-mi ingerlatsisinnaanermut allagartanut sanilliunneqarsinnaanngillat, IA-mit folketingimut ilaasortamut Aaja Chemnitzimut akissummini angallannermut ministeri Thomas Danielsen, taama ilisimatitsivoq.
EU-p najoqqutassiai
Ingerlatsisinnaanermut allagartamut EU-p inatsisaanik aallaaveqartunik, ilaatigut biilernermik ilinniarnermut piumasaqaatinik, atuutilersitsinissamik piumasaqaatinik Kalaallit Nunaanni oqartussaasut aalajangersinnaasut, akissummi ilisimatitsissutaavoq. EU-mili najoqqutassianut assingusunik atuutilersitsineq kalaallit ingerlatsisinnaanermut allagartaasa amerlanernit akuerineqarneranik kinguneqarnavianngilaq.
- Taamaattumik kalaallit ingerlatsinnaanermut allagartaat akuerineqassanersut kiisalu kalaallit ingerlatsisinnaanermut allagartaat EU-mi ingerlatsisinnaanermut allagartamut taarserneqarnissaannut suut malittarisassarineqartassanersut, EU-mi nunat ilaasortaasut namminneq aalajangertussaavaat, angallannermut ministeri maajip pingajuani akissummini ilisimatitsivoq, nangillunilu:
- Nunap allap ingerlatsinnaanermut allagartaanik akuersissuteqarnissamut aalajangiinermi nunami tamatumani angallannermi pissutsinut, aqqusinerni EU-mi ilaasortaasuni angallannermi pissutsinut kiisalu aqqusernit attaveqaataannut assersuunneqarsinnaanissaat, EU-mi nunat ataasiakkaat piumasaqaatigisarpaat. Angallannermut aqutsisoqarfiup naliliinera naapertorlugu Kalaallit Nunaanni angallannermi pissutsit aqqusernillu assigiinngitsut EU-mut sanilliunneqarsinnaanissaat ilimananngilaq.
Ilinniarnissamut piumasaqaatit
Innuttaasut Danmarkimi najugaqartut kalaallillu ingerlatsisinnaanermut allagartaannik piginnittut ingerlatsinnaanermut allagartamik qallunaatut allagartatut ittumik peqarsinnaalersinnaasut aamma ilisimatitsissutigineqarpoq, aqqusinerni assigiinngitsuni (illoqarfimmi, nunaannarmi motovejimilu) biilersinnaanermut minnerpaamik minutsinik 45-nik sivisussuseqartunik marlunnik biilernermut ilinniartitsisumit ilinniartinneqarunik.
- Kalaallit Danmarkimi najugaqartut ingerlatsisinnaanermut allagartallit Danmarkimi biilersinnaanermut misilitsinnermikkut angusigunik allagartaq taarsertissinnaavaat. Taamaalillutik ingerlatsisinnaanermut allagartaq atorlugu EU-mi, assersuutigalugu takornariatut, biilersinnaalissapput.
Angallannermut aqutsisoqarfik
Siusinnerusukkut IA-mi politikerimut akissummi angallannermut aqutsisoqarfik ima paasissutissiivoq:
- Kalaallit Nunaanni ingerlatsisinnaanermut allagartamik tunniussinermut EU-mi najoqqutassiat atuutilersinneqarpata kingunerlutsitsinerussasoq Angallannermut ministeriaqarfik isumaqarpoq, ingerlatsisinnaanermut allagartamik tunniussinermut tunngasut allaffissornerulertitsissammata, tamannalu kalaallit innuttaasuinut ajornartorsiortitsissaaq, piumasaqaatimmi najoqqutassiallu allanngortinneqarpata, kalaallit ingerlatsisinnaanermut allagartaat immaqa atorneqarnerulernavianngimmata, EU-milu nunani allani ingerlatsisinnaanermut allagartap taarserneqarnissaat kalaallit ingerlatsinnaanermut allagartaannik piginnittut iluaqutigiumaaraat aamma qulakkeerneqarsinnaanngilaq.
