Politiit saassussinermut takunnittussarsiorput

Angut Ilulissani illoqarfiup qeqqani Kussangajaannguup aqquserngani arfininngornerup unnuaani saassunneqarpoq pigisaalu tillinneqarlutik.

Politiit nalunaaqutaq 03.49 nalunaarfigineqartut, pigaartut pisortaat Aputsiaq Hansen Sermitsiamut oqarpoq.

Angut saassunneqartoq inunnit arlalinnit unatarneqarlunilu isimmigarneqarsimasoq politiit pasivaat.

Saassussisut angutip pigisai tillimmassuk pisoq ujajaaninngorpoq.

Pisoq qassinorpiaq pisimanersoq politiit ilisimanngilaat, nalunaarutiginninnerlu sioqqutitsiarlugu, tassalu nal. 03.49, pisimanissaa ilimagineqarpoq.

Pinerlineqartoq napparsimaviliarani nammineerluni angerlarsinnaasimavoq. Angerlaramilu pisoq politiinut nalunaarutigaa.

Politiit saassussinermut takunnissimasinnaasunik ujartuipput, pigaartunullu saaffiginnittoqarsinnaavoq uunga: 70 14 48.

Politiit ulloq unnuarlu kingullermi suliaat tassaanerupput aqqusinermi eqqissiviilliornerit, nakuusernerit angerlarsimaffinnilu eqqissiviilliornerit, pigaartut pisortaat oqarpoq .