Politiit toqutsisoqarsimasinnaaneranik takunnissimasunik ujartuipput
Kangaamiuni toqusoqarnera toqutsisoqarsimaneratut politiinit misissuiffigineqarpoq. Innuttaasut pisumut tunngatillugu ilisimasallit politiinut saaffiginneqquneqarput. Misissuinermi ikiortissat nunaqarfimmut aggersarneqarput.
Assi: Oscar Scott Carl
Angut 49-nik ukiulik pingasunngornermi oktobarip 22-anni Kangaamiuni toqungasup nassaarineqartup toqunneqarsimanissaa politiinit pasitsaanneqarpoq.
Danmarkimit toqusut timaannik misissuisartut pinerluffimmilu misissueqqissaartartut aamma Nuummiit ikiuiartortussat Kangaamiunut aggersarneqarput.
Innuttaasut takunnissimasinnaasut imaluunniit suliamut tunngasunik allanik paasissutissaateqarsinnaasut tamarmik politiinit tusarfigineqarusupput.
Politiit iluaqutigisinnaasaannik ilisimasaqaruit oqarasuaammut uunga sianersinnaavutit: 70 14 48.
Misissuineq ingerlammat Kalaallit Nunaanni Politiit pisoq pillugu tamanut ammasumik itisiliisinnaanngillat.
