Politikeri malunnaatilik Siumup qinigassanngortitaanut ilaanngilaq
Qinersiviup maanna naammassineqartup ingerlanerani Siumumeersoq Najaaraq Møller assut malunnaateqarpoq, partiip Inatsisartuni gruppiani annertuumik sulisimalluni. Kisianni Siumup qinigassanngortitaanut allattorsimaffianiinngilaq. Sermitsiamit paasisavut naapertorlugit, tamanna pissuteqarpoq nammineq atsiorluni sassarnerminik uppernarsaanngitsoorsimaneranik.
Najaaraq Møller (S) Siumumi partiimut annertuumik suliaqarsimavoq. Sermitsiamit paasisavut naapertorlugit ulapinnermini sassarnissaminut atsiornissani puigortoorsimagamiuk sassaqataanngitsoortussanngorsimavoq.
Foto: Leiff Josefsen
Siumut Inuit Ataqatigiillu naalakkersuisooqatigiilermata Najaaraq Møller Siumup Inatsisartuni ilaasortaatitaanik sulinngiffeqartoqaraangat sinniisutut suliassanik isumaginnittarpoq.
Naalakkersuisooqatigiilli naalakkersuisunik nikisitsinerannut 2023-mi ukiakkut ataatsimiinnermi pisumut atatillugu, taanna Inatsisartunut aalaakkaasumik ilaasortanngorpoq.
Najaaraq Møllerip Inatsisartuni piffissaq asiutinngilaa, ataatsimiittarfimmi avataanilu sulilluarsimavoq periarfissallu tamaasa atorlugit avammut saqqumilaartuuvoq, pingaartumik ilinniartitaanermut kulturimullu tunngatillugu, tamatumalu saniatigut Naalakkersuisunut apeqquterpassuaqartarluni.
Sermitsiamit paasisavut naapertorlugu, taanna qinigassanngortinniarluni pilersaaruteqaraluarpoq, taamaattumik maluginiagassaavoq Siumup qinigassanngortitani allattorsimaffiani nassaarineqarsinnaanngimmat.
Najaaraq Møller attavigaarput aperalugulu sooq qinigassanngortittut allattorsimaffianniinnginnersoq. Massakkuugallartorli oqaaseqarsinnaannginnerarpoq.
Siumut: qinigassanngortittut 53-iniit 51-inut
Taamaattorli apeqquterput Siumup siulittaasuata akissuteqarfigisinnaavaa:
- Najaaraq Møllersip partiimut Inatsisartuni peqataanera sulilluarsimaneralu assut iluarisimaarparput. Taamaattumik ilumoorlunga oqarsinnaavunga, taanna qinigassanngortittullu allat marluk, sassartitatta allattorsimaffimmianiinngitsut, sassaqataasinnaanissaminnut periarfissaqanngippata, tamanna partiimut annaasaqaataassammat.
- Teknikkikkut ajornartorsiutit arlallit Siumumi qinigassanngortitatta allattorsimaffiata tunniunneqarnerani misigaarput. Maanna tamaviaarutigaarput qinersinermut ataatsimiititaliamut maalaarutinik suliarinninnissaannut anngussinnaanissarput pillugu, maalaarsinnaatitaanerlu killilerneqarpoq tallimanngorpat nal. 09:00 sioqqullugu, neriuutigiinnarsinnaavarpullu noqqaassuterput kissaatigisatsitut inerneqarumaartoq.
Taamaattorli atsiunngitsoorsimaneq teknikkikkut kukkunerua?
- Naamik, taanna suliassaavoq, ataasiakkaat nammineq isumagisassaat, partiip qinigassanngortitsisunut allattorsimaffik tunniunneqannginnerani isumagisassaq, kisianni uagut massakkut ulapputigaarput, qinigassanngortillutik nalunaaruteqarsimasut pingasut pineqartut tamarmik qinigassanngortitsisunut allattorsimaffimmi ilanngunneqarnissaat, Siumup siulittaasua, Erik Jensen, Sermitsiamut oqarpoq.
Maanna qinersinermut ataatsimiititaliamit aalajangiiffigisassanngorpoq, Najaaraq Møller aamma Siumut sinnerlugu sassartut allat marluk qinigassanngortitsisunut allattorsimaffimmi ilanngunneqarsinnaanersut.
