Inatsisartunut
ilaasortat Nuup avataani najugaqartut illusisimavissaannik sanaartornissaq
pilersaarutaasimasoq ukiorpassuarni oqallisigisaanikuuvoq. 2018-imiilli
sanaartorneq aallartippoq. Qaammatilli arlaqanngitsut ingerlanerinnaanni
inissiat 24-t, suliniummi Tuullimmi sanaartorneqartut, affaat Noorlernuni Nuup
qeqqaniittumi iserterfigineqarsinnaanngussapput.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Inatsisartunut
ilaasortat Nuup avataani najugaqartut illusisimavissaannik sanaartornissaq
pilersaarutaasimasoq ukiorpassuarni oqallisigisaanikuuvoq. 2018-imiilli
sanaartorneq aallartippoq. Qaammatilli arlaqanngitsut ingerlanerinnaanni
inissiat 24-t, suliniummi Tuullimmi sanaartorneqartut, affaat Noorlernuni Nuup
qeqqaniittumi iserterfigineqarsinnaanngussapput.
– Septembarimi, Inatsisartut ukiakkut ataatsimiinnissaat sioqqutilaarlugu,
inissiat iserterfigineqarsinnaalissapput. Inissiat sinneri 2025-mi upernaakkut
ataatsimiinnissamut piareerneqareersimassapput, Namminersorlutik Oqartussat
inissiaatileqatigiiffianni Illuut A/S-imi pisortaaneq Torben Pauls oqarpoq.
Ingerlatseqatigiiffik sanaartortitsisuuvoq illunillu ulluinnarni
ingerlatsisuussalluni. Inatsisartut taamalu Namminersorlutik Oqartussat Illuut
A/S-imik inissiat attartornissaannut isumaqatigiissuteqarput.
Inissianik 24-nik marlunnik pingasunillu initalinnik, immikkut
igaffeqartunik perusuersartarfilinnillu sanaartornerup saniatigut Tuulliit
aamma ataatsimoortarfeqalissapput. Ataatsimiinnernut ilassinninnernullu
ataatsimoortarfik atorneqarsinnaavoq. Inissiat ataatsimoortarfillu illunut
tallimanut agguataarsimapput.
Sanaartorneq akisooq
Suliniut Tuullit qanoq akeqassanersoq Naalakkersuisut Inatsisartullu
suli oqaatiginngilaat. Maannali taamaaliortoqarsinnaalerpoq.
- Inissiat kvadratmeterimut 40.000 koruunit missaannik akeqassapput.
Politikerit pitsaasumik akuitsumik sanaartuunneqarput, Torben Pauls oqarpoq.
Illuutip sanaartornermut aningaasartuutai, ilaatigut inissianik
pisoqqanik isaterineq ilanngullugu, 100 millionit koruunit missaanniissapput. Taakkunannga 90 millionit
koruunit missaat Tuulliit sanaartorneqarnerannut atorneqarput, Illuummi
pisortaaneq ilisimatitsivoq.
Maannamut ataatsimiinnissat tamaasa sioqqullugit inissianik
attartortitsisartut namminersortut, pingaartumik LP Invest, ataatsimiinnerup
nalaani inissianik attartornissamut Inatsisartut
isumaqatigiissuteqartarsimapput.
Sanaartornermik suliniutit annertuut ingerlakkaat
Illuut A/S, illunik sanaartornermik, piginnittuunermik, tuniniaanermik,
attartortitsinermik ingerlatsinermillu siunertalik, ullumikkut inissianik
850-it missaannik piginnittuuvoq. Inissiat tamarmik suliffeqarfinnik
najukkamiittunik isumaqatigiissuteqarnikkut aqunneqartarput.
Inissiat saniatigut aamma Nuuk Centerimi allaffinnik quleriinnik
angisoorsuarnik Illuut piginnittuuvoq, namminersorlutillu oqartussat
suliffeqarfiutaat allat namminerlu akisussaaffiigisat suleqatigalugit
sanaartornermik suliniutit annertuut arlallit sanaartortitsisuuffigaat.
Sanaartornermik suliniut annertooq alla Kalaallit Nunaanni Mittarfinnut,
KAIR-imut, tunngavoq. KAIR-imut attartortitassaminik Nuummi mittarfimmi nutaami
qullersaqarfimmik Illuut sanaartorpoq.
Sanaartornermut siunnersortit suleqatigalugit suliniutit amerlanersaat
KAIR-ip nammineq suliarisarpai.
- Sanaartornerulli nalaani isumannaallisaanermut, peqqissutsimut
suliffiullu avatangiisaanut akisussaaffik tamakkiisumik allamut
tunniunneqarsinnaanngilaq, pisortaq Torben Pauls oqarpoq.
Ineqarnermut Attaveqaasersuutinullu Naalakkersuisoqarfik aamma
Siulersuisunut Allattoqarfik qanimut suleqatigalugit Illuutip suliniutissai
toqqarneqartarput, suliniutillu angisuut tamarmik politikkikkut
akuerineqartarput.
Namminersorlutik Oqartussat piginneqatigiiffiutai marluk Illuut aamma
INI kattunneqassapput. Namminersorlutik Oqartussat piginneqatigiiffiutaasa
piginneqataassutsimut politikkiannik isumaqatigiissummut IA-p, Siumup,
Demokraatit Atassutillu isumaqatigiissutigisaannut kattunnissaq ilaavoq. Qaqugu
kattunnissaq pissanersoq suli ilisimaneqanngilaq.
