Politikkikkut piaartumik iliuuseqartoqartariaqartoq

Naalakkersuisut nutaat inissipput, tamannalu ilutigalugu naalakkersuisoqatigiinnissamut isumaqatigiissut annertuumik imalik atsiorneqarpoq. 

Tusagassiorfiit kiffaanngissuseqarnerat attuumassuteqanngitsuunerallu pingaartinneqartoq isumaqatigiissummut ilaavoq.

KNR-ip aningaasaqarnerata pitsanngorsarneqarnissaa pingaaruteqartutut eqqaaneqarpoq.

- Kalaallit Nunaata Radioa nukittooq attuumassuteqanngitsorlu oqartussaaqataanitta sukaraat, tusagassiornermillu siammasissumik tutsuiginartumillu, oqaatsitsinnik, kulturitsinnik assigiinngiiaartuunitsinnillu takutitsisuussaaq,

AAMMA ATUARUK

KNR-imi pisortaq alla aamma soraartoq

KNR-imili pissutsit allarluinnaapput. Tusagassiorfik sulisussaaleqinermik, teknikikkut unammilligassanik aqutsisullu taarseraannerujussuannik piffissami sivitsortumi tatineqaqqavoq.

Tusagassiorfik innuttaasunik kiffartuussisoq ajornartorsiutinit aniguiumalluni pitsaanerujussuarnik sinaakkuteqalertariaqartoq tusagassiuutit pillugit immikkut ilisimasalik ph.d.-lu Aviaq Fleischer oqarpoq. Naalakkersuisoqatigiinnissamut isumaqatigiissut nutaaq pissutigalugu allanngortoqarnissaa taassuma neriuutigaa.

- KNR kulturikkut ingerlatsiviuvoq pingaaruteqarluinnartoq, ukiumullu kulturimut aningaasaliissutit amerlanerpaartaat pissarsiarisarpaat. Maannali sulisussaaleqillutillu pitsaanerusunik atugassaqalernissamik pisariaqartitsipput, oqarpoq.

Nutaarsiassaqartitsivik ingerlanerliortoq

KNR assigiinngitsorpassuartigut aningaasanik amigaateqartoq Aviaq Fleischer oqarpoq. Soorlu toqqorsivimmi suliaqarnermut, digitaliseeriinermut teknikikullu atortutigut nutarterinermut.

- KNR-imut aningaasaliissutit aningaasat naleerukkiartornerat malinnaavigisimanngilaat, sulisussaaleqinerlu ajornartorsiutit annerpaartarigaat qularnanngilaq. KNR-ip nutaamik aamma illorsuartaarnissani amigaatigaa, oqarpoq.

Naalakkersuisunut isumaqatigiissut pissutigalugu KNR ukiumut aalajangersimasunik annertussusilinnik nutaarsiassiisussaavoq, ilinniutinik saqqummersitsisussaavoq aamma tv-kkut aallakaatitassiortussaavoq. Taamaakkaluartoq nutaarsiassat saqqummersinneqartartut piffissami sivitsortumi ikilisinneqartariaqaqqapput. - Nutaarsiassaqartitsivik ingerlanerliorpoq. Nunat minnerit isumaqatigiissummik naammassinnissinnaanertik ajornakusoortittarpaat, assersuutigalugu ilinniartitaaneq peqqissuserlu pillugit aallakaatitassiornermi. Kalaallit Nunaanniinnaanngitsoq. Sulisut amigaataapput, tusagassiortunik ilinniartitsinermut peqqissuserlu pillugit ukiumut akunnernik 20-30-t missaanniittumik tv-kkut aallakaatitassiortussanik atorfinitsitsinissamut akissaqartoqanngilaq.

KNR-ip sulisussaaleqineq pissutigalugu qallunaatut radioaviisertitsisarnini qanittukkut unitsikkallarpaa.

- Maqaasineqassanersoq pissanganarpoq. Savalimmiuni savalimmiormiutuinnaq nutaarsiassiisoqartarpoq. Siunissami qanoq pisoqassaneranik immaqa ersersitsivoq, Aviaq Fleischer oqarpoq.

Isumaqatigiissut naammassineqartoq

Tusagassiorfiup radioaviisip qallunaatoortaa unitsikkallaraluaraa, kiffartuussinissamik isumaqatigiissut naammassineqartoq pisortaagallartoq Bjørk Lange isumaqarpoq. Sermitsiamut allakkatigut akissuteqarluni paasissutissiivoq.

- 2024-mut kisitsisit akunnerillu suli kisinngilavut, kisianni ataatsimut isigalugu piumasaqaatinik naammassinnissimasugut nalilersinnaavara, oqarpoq.

- Pingaarnersiusariaqarsimavugut, tassanili kalaallisut aallakaatitat pingaarnerutissimallugit.

Pisortaagallartup naalakkersuisoqatigiinnissamut isumaqatigiissutip tusagassiuutinut KNR-imullu tunngasortaa isumalluarfigivaa, qanittukkullu Naalakkersuisut nutaat oqaloqatiginissaannut qaaqquniarlugit.

- Naalakkersuisut nutaat isumatusaartumik ineriartortitsinissamillu eqqarsaateqarluta qanittukkut oqaloqatigissavagut. Tusagassiuutitigut ineriartornermut malinnaasinnaajumalluta, piumasaqaatinut inuiaqatigiinnullu pisussaaffivut pitsaanerpaamik naammassiniassagutsigit KNR-ip sinaakkutai qanoq pitsanngorsarneqarsinnaanersut pillugit oqaloqatigissallugit, Bjørk Lange Olsen allappoq.

Isumalluutit malinnaanngitsut

KNR-i ajornartorsiorunnaassappat akissarsiat pingaarnertut aaqqiivigineqartariaqartut Aviaq Fleischer oqarpoq.

- Siullertut tusagassiortut akissarsiaat pineqarput. Assersuutigalugu Namminersorlutik Oqartussani sulisunit akissarsiaqarnerunngillat. Ilinniagaq tusagassiortutut sulinissamik siunertaqarpoq, attaveqaqatigiinnermili sulisutut akissarsiaqarnerullutillu suliakinnerullutik sulisinnaagunik soorunami taanna ornigineqarnerussaaq. Ajornartorsiut tassaniippoq. Tusagassiortutut suliffiup pilerinartunngorteqqinnissaa politikkikkut iliuuseqarfigineqartariaqarpoq, Aviaq Fleischer oqarpoq.

KNR siornatigut suliffissatut pilerigineqartarnikuugaluarluni ajornartorsiornerup nalaani tamanna allanngorsimasoq oqarpoq.

- KNR-i tulluusimaarutigineqaleqqittariaqarpoq suliffeqarfittullu ataqqinartutut isigineqaqqilertariaqarluni. Sulinermi atugassarititaasut isumalluutillu allannguiffigineqarneratigut tamanna pisinnaavoq.

Tamatuma saniatigut KNR-ip tv-kkut aallakaatitassiai ukiut aqqaneq-marluk matuma siorna aalajangersimasunik sammisaqartunngortinnerisa kingorna suliat amerleriapiloorsimapput – sulisulli isumalluutillu amerlineqaratik.

- Nammineq aallakaatitassiat ukiup ataatsip ingerlanerani pingasoriaatinngorput, aningaasaliissutinilli naammattunik malitseqaratik.

Inatsit allanngussasoq

Aviaq Fleischerip ph.d.-nngorniutini illersoqqammerpaa. Allaaserisaminilu KNR-ip pitsanngorsarnissaanut innersuussutinik arlalinnik saqqummiussaqarpoq.

- KNR-ip teknikkikkut atortui ukiuni arfineq-pingasuni nutarterneqarsimanngillat. Tamanna sivisuallaaqaaq. KNR piffissamut malinnaasariaqarpoq innuttaasunullu teknikitigut atugaannut aamma malinnaasariaqarlutik, Aviaq Fleischer oqarpoq.

KNR-illi innersuussutai arlallit tusaatissatut tigullugit Naalakkersuisunut ingerlateqqissimagai misigaaq. Naalakkersuisoqatigiinnissamut isumaqatigiissummi nutaami tusagassiuutinut tapiissutit nutarterneqassasut neriorsuutigineqarpoq. Tusagassiuutinut nalinginnaasunut atuutiinnaratik, aammali digitalikkut tusagassiinermi soorlu nittartakkanut podcastinullu atuuttussanngornissaat siunertarineqarluni.

KNR-ip kulturikkut ingerlatsisutut inissisimaffia pingaaruteqarpallaartoq, taamaammallu imminiiginnarneqarsinnaanngitsoq Aviaq Fleischerip erseqqissarpaa:

- Politikerit paasitinniarnissaat suliassaavoq. Pissutsit allanngortinneqartariaqarput KNR-ilu nukittorsarneqartariaqarluni. Inuiaqatigiinni qitiusumik inissisimaffeqarput ikiorneqarnissarlu pisariaqartillugu, tamannalu nukinginnartuuvoq, oqarpoq.