Politikkikkut soqutiginnittoqarnerunissaanik KNR-imi siulersuisut ujartuipput
KNR-ip siulersuisuisa KNR-imi unammilligassat eqqumaffigaat aaqqiissutissallu sulissutigalugit, aammali innuttaasunik kiffartuussiviup sinaakkutissatut atugassarititaanik politikkerit pitsanngorsaanissaat ujartorpaat.
Qaammatip tulliani iliuusissatut pilersaarusiaq KNR-ip saqqummiutissavaa, ilaatigut tusagassiornermik piginnaasaqalernissamik ineriartortitsinissamut tunngasoq.
Assiliisoq: Leiff Josefsen
Allagaatinik takunnissinnaatitaaneq tunngavigalugu qaammatit aqqanillit kingulliit ingerlaneranni KNR-imi sulisut 35-t suliunnaarsimasut, kiisalu Tusagassiuinermi Sulisut Peqatigiiffiata (TP-p) tusagassiorfimmi sulisoqarnikkut inissisimaneq ernumanartoqartikkaat, qanittukkut Sermitsiap oqaluttuaraa.
Sulinermi avatangiisinut sulisussarsiornermullu tunngatillugu unammillernartut pillugit ajornartorsiutit eqqumaffigalugit aaqqiissutissanillu sulissutiginnillutik, KNR-ip siulersuisuisa tusagassiuutinut nalunaarummi erseqqissarpaat:
- Ajornartorsiutaasunik tamakkuninnga aaqqiissuteqarnissamut siulersuisut iliuuseqarusussuseqarmata, pisortaq assigiinngitsunik piumasaqaateqarfigineqarlunilu naatsorsuuteqarfigineqarmat ataavartumik siulersuisut attaveqarfigigaat erseqqissaassutigerusupparput, siulittaasoq Rosannguaq Rossen siulersuisut sinnerlugit allappoq.
Nutaamik pisortaqalernermit sulisut 15-it taarserneqartut
Annga Lyngep aqutsinerani KNR-imi sulisut 15-t ilinniartullu marluk taarserneqarsimasut, siulersuisut ilisimatitsipput.
- Piffissami tassani sulisut atugarissaarnerulernissannut suliniutit arlallit aallartinneqarput, Rosannguaq Rossen allappoq.
Politikkerinik suleqatigiilluarnerunermik aammalu politikkerit tungaannit KNR-imut sinaakkusiinissamik soqutiginnittoqarnerunissaanik, KNR-ip siulersuisui kissaateqarput.
- Amigaataasoq nalaatsornerinnaasorlu
Taamaattumik Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaq KNR-imi siulersuisut attaveqarfiginiarpaat KNR-ip periusissiaa qanittukkut akuerineqartoq saqqummiunniarlugu, suliniutinimmi anguniagassanillu periusissiamiittunik iluatsittumik piviusunngortitsiniarnermi, politikkerit KNR-ip ingerlanneqarneranut sinaakkutinik pitsanngorsaanissamut iliuuseqarusussusaat aalajangiisuummat:
- Tusagassiiviup atugassarititaasa pitsaanerulernissaat minnerunngitsumik aamma kissaatigaarput, tamannalu sivisuumik anguniagarisimavarput, sulili piviusunngortinneqanngilaq.
- Ajoraluartumik KNR-ip atugassarititaanut soqutiginninneq amigaataasoq, tusagassiivinnullu politikkimik amigaateqarneq pissutigalugu nalaatsornerinnakkut soqutiginnittoqartartoq oqaatigisariaqarparput, KNR-imi siulittaasut allapput.