Professori: Orsussap akiata appasippallaarnera ajornartorsiortitsissaaq
Orsussap akia appasissoq atuisunut suliffeqarfinnullu eqqunngitsunik oqariartuuteqartitsivoq, Aningaasaqarnermut Siunnersuisoqatigiit siulittaasuat taama naliliivoq.
Torben M. Andersen satte spot på den grønlandske økonomi uden bloktilskud fra Danmark.
Leiff Josefsen
Marlunngormat unnukkut KNI-p
ikummatissat akiisa allanngornerat nalunaarutigaa. Akit qaffassapput,
tamatumali saniatigut nalunaarutigineqarpoq ukiut siuliini
sinneqartoorutit akit nunarsuarmi niuernermi akinit appasinnerusumik
nikingatinneqarnissaannut atorneqarumaartut.
Taamatulli periaaseqarneq
ajornartorsiutitaqarpoq, Aningaasaqarnermut Siunnersuisoqatigiinni
siulittaasoq aningaasaqarnermullu professori, Torben M. Andersen
oqarpoq.
Nunat OECD-mut ilaasortaasut
amerlanersaasa orsussat ikummatissatut atorneqartartut
akitsuusertaraat atuineq annikillisinniarlugu, nukissiutillu allat
atortalernissaannik tapersersuiniarlutik, taanna oqarpoq:
- Orsussap akiata
appasinnerulersinneratigut nunanut allanut sanilliullugu
akikinnerulersitsinissaq anguneqarsinnaavoq. Tamanna nukissiuutinik
nalinginnaasunik atuiunnaarnissamut iluaqutaanngilaq, aamma
naleqqussarnissami ajornartorsiutaangaassaaq, Torben M. Andersen
Sermitsiamut allakkatigut oqaaseqaateqarpoq.
Akit appasinnerat pissutigalugu
pitsaanngitsunik iliuuseqartoqartarpoq, nangilluni allappoq:
- Akit piffissami sivikitsumi
appasitsinniarlugit aalajangerneq naleqqussaanermik
kinguartitsisarpoq piffissamilu sivikitsumi akit
qaffarujussuarsinnaanerannik navianaateqartarluni. Akit appasinnerat
pitsaanngitsumik kajumissisitsisarpoq, taamaalillunilu
allannguinissamut kajumilersitsisanngilaq, Torben M. Andersen
allappoq.
Literimut
2,5 kr.-nik akikinnerusoq
KNI-p marlunngornermi unnukkut
Naalakkersuisut isumaqatiginerat naapertorlugu ikummatissap akiata
qaffanneqarnera pillugu ima paasissutissiisoqarpoq:
- Taamaattumik akit maannakkut
akigititavut nunarsuarmi tamarmi akigitinneqartut maannakkut atuuttut
naapertorlugit akitsuusertinnagit danskit akigitiligaannit literimut
2,50 DKK-t missaanniittunik suli appasinnerupput.
Sermitsiap KNI aperaa akit
appasinnissaat anguniarlugu aningaasat qanoq amerlatigisut
atorniarneraat, allaaserisamili matumani akissutisisimanngilagut.
Tapersiineq
paasiuminaatsoq
Torben M. Andersen isumaqarpoq KNI-p
sinneqartoorutaasa taamatut atorneqarneri aningaasaqarnermut
tunngatillugu silatusaarnerunngitsoq:
- KNI-p sinneqartoorutaanit aningaasat
sinneruttut aningaasaqarnerup pingaarnersiuineranut ilaasariaqarput,
siunertamut aalajangersimasumut immikkoortinneqarnatik. Akinik
appasitsitsineq pisuussutinik pitsaanerusumik atuinissamut
akornutaasarpoq, aamma atuisunut suliffeqarfinnullu eqqortumik
oqariartuutaangilaq.
Tamanna aamma innuttaasut
akissakinnerusut ikiorniarlugit iliuuseqarnerunngitsoq, orsussammi
akikitsup kikkut tamarmik iluaqutiginavianngilaat:
- Aningaasanik agguaassinermut
tunngatillugu politikkikkut isumalluutit pitsaanerpaamik
isumagineqarsinnaapput isumaginninnikkut isumannaallisaanikkut,
Torben M. Andersen oqarpoq.