Qinersisartut taasipput Kalaallillu Nunaanni
naalakkersuinikkut ullut allanngulerfiit qaapput.
Isumaqatiginninniarnerit
qanorluunniit inerneqassagaluarpata piviusoq tassaalerpoq Demokraatit naalakkersuinikkut
siuttunngornerat, partii inuttut kiffaanngissuseqarnermik pingaartitsisoq
kiisalu naalakkersuisuusimasunut siuliminnut sanilliullutik kiffaanngissusermik
namminersortuunermillu tunngaveqarluni sinaakkusersugaanissamik
pingaartitsisut.
Qinersisartut taasipput Kalaallillu Nunaanni
naalakkersuinikkut ullut allanngulerfiit qaapput.
Isumaqatiginninniarnerit
qanorluunniit inerneqassagaluarpata piviusoq tassaalerpoq Demokraatit naalakkersuinikkut
siuttunngornerat, partii inuttut kiffaanngissuseqarnermik pingaartitsisoq
kiisalu naalakkersuisuusimasunut siuliminnut sanilliullutik kiffaanngissusermik
namminersortuunermillu tunngaveqarluni sinaakkusersugaanissamik
pingaartitsisut.
Qinersinerup inernera mumisitsineruva? Immaqaluunniit
taannaanerpa inuusuttatta namminneq oqariartornerat allamik
toraagaqarusussuseqarnerminnik, namminersulivinniarneq
sinaakkusersorneqarsimanngitsoq aningaasalersugaanngitsorlu qimallugu?
Qinersisartummi katitigaaneranni inuusuttut tassaapput amerlanerussuteqartut.
Nunatsinni politikkikkut inissisimaneq qanorluunniit
ikkaluallarpat, inuiaqatigiinni allanngulernerup nalaappaatigut. Ilai
ugguassajunnarsipput allalli oqaqqooqaat allanngortoqarnissaa
pisariaqalivissimasoq.
USA-mut naaggaarneq
Ukiortaami qaammatini siullerni paatsiveerusimaarneq,
tupigusunneq, aarlerineq eqqarsaatersornerujussuarlu atuussimapput. ”Davip
Goliatsimut akiuunnera” ajornaatsuinnaanngilaq, nunarsuatsinni ajortup
peqqarniisernerullu tungaannaanut ingerlasumi. Kingumut misigititaavugut
ikittunnguulluta nunarput isorartoorsuaq najoripput, allanit
pilerigineqarluartoq, inissisimanini pisuussutinilu pillugit. Aamma
pissarsuaqartoq allamut qissimigaannguarnatik nangaariallannguaratilluunniit
nunatsinnik tiguaarusuttunik, nuna inoqareeraluartoq soqutiginngilluaasarlugu.
Ernumalersitsillutik. Ila pissaaneqarusussusersua tupinnaqaaq. Aammami
silanngajaaqataa Putin taamaappoq.
Ernumalersitaanerli kisimi piunngilaq. Iliuutsip
kusanaalluinnartup ataatsimoortilerpaatigut eqeersarlutalu. Sorpassuit
isumaqatigiinngissutigisinnaavagut tujorminartumik ajornerunngitsumilli!
Nuannernerpaavoq takullugu Donald Trumpersuup nunatsinnik tiguaaniarneranut
ataatsimoorluni akerliussutsimik takutitsineq arfininngormat 15. marts pisoq.
Inuiaat ataatsimoorlutik peqqarniiseratik akerliussutsimik takutitsinerat tassa
nukittussuseq. Ikikkaluaqaagut nalunngilliuinnarparpulli angutit issoqanngitsut
kisimik nukersorniartartuusut, aarlerilersitsillutik peqqarniiserlutillu
taakkuullutillu inoqatiminnik sunngitsunik saassussisartuusut sorsunnermillu
aallarniillutik.
Toraagaq alla
Qinersinerup inernerata uissuummisitsinera uterfigeqqillara
naatsumik: Taannaana amerlasuut iluunngarlutit kissaatigisimagaat, inuusuttut
utoqqaanerusullu, namminersulivinnissaq ungasissumi aatsaat pissasoq.
Taamaallaat Naleqqakkut taasisaallu 7.009-t minillugit, partiini
taasiseqarnerpaat tullii.
Naleqqap angusaata oqaluttuuppaatigut inuiaqatigiit allatut
aaqqissuussamillu ineriartortittariaqartut, pingaartumik Nuup avataani
tulluarsaasoqartariaqarmat. Sinerissami nunaqarfinni illoqarfinnilu
inuuniarnikkut atugarisat, peqqinnerusumik inuuneqalernissaq, inissiat nutaat,
ineriartorneq kulturikkullu immersorneqarneq aamma atuuttariaqarput.
Ineriartorneruna pitsaasumik malunniukkaangat aatsaat inuit illoqarfiillu
alliartoqataalersartut.
Ukiut 50-it sinnerlugit politikkikkut ingerlaatsip
tunngavigisaa annerpaatigut inooqatigiinnermi tunngavissatut aalajangersakkatut
taasat najoqqutaralugit ingerlasimapput. Tamanna immini ajunngilluinnarpoq,
anguniakkat isumagilluarneqarsimasuuppata nalitsinnilu inuunermut mutiusumut,
digitaliusumut atugassarititaasunullu nutaajusunut tulluarsarneqarsimasuuppata,
aningaasaqarnikkut, inooqatigiinnikkut kulturikkullu.
Kalaallit Nunarput ajunngitsunik tamanik kissaallugu!
