Qapiarfiusaaq 0,- koruunilerlugu tunineqartoq

Namminersorlutik Oqartussat Nuummi qapiarfiusaami inissiarsuaatai aqqaneq-marluk nammineq inissiaatileqatigiiutiminnut Illuut A/S-imut 0,- koruunilersillugit tunivaat.

Nunatsinni illoqarfiit pingaarnersaani sumiiffimmi pilerinartumi inissianut 141-nut aki pitsaasupilussuartut isikkoqarpoq, tunineranulli piumasaqaatit sukannersut ilaapput.

Illuut A/S-ip inissiarsuit aserfallassimaqisut isateriarlugit inissianik nutaanik ikinnerpaamik 141-nik sanaartussaaq. Suliassaavoq ukiut tulliuttut tallimat ingerlaneranni aallartinneqarsimasussaq – taamaanngippat Lyngby-Taarbækvejimi normut 21-12 aamma 31-37 taamaaqataanik 0,- koruunilerlugit Namminersorlutik Oqartussanut utertinneqassapput.

Inissiarsuit aqqaneq-marluk tamarmik Qapiarfiusaap qeqqani quleriit marluusut 1974-76-imi sanaartorneqarput. 2022-mi pitsaassusaannut nalunaarsuinermi paasineqarpoq Namminersorlutik Oqartussanit aserfallatsaaliorneqannginnerat peqqutaalluni annertuumik aserfallassimasut, ullumikkullu attartortussamut tullermut iluarsaanneqartussaanatik. Nutarternerannut aningaasartuutit qaffasissupilussuussasut nalilerneqarmata isaterlugit nutaamik sananissaq akilersinnaanerusutut isigineqarpoq. Namminersorlutik Oqartussat Nuummi inissialiornissamut taama aningaasaateqartiginngillat, taamaattumillu inissiat akeqanngitsumik Illuut A/S-imut tunniunneqassapput. Inissiaatileqatigiit tamakkiisumik Namminersorlutik Oqartussanit pigineqartut realkreditimik taarsigassarsinermikkut sanaartortarput, attartortunit naafferartumik akilersorneqarlutillu erniat akilersorneqarlutik.

Ineqarnermut akiusussaq ernummatigineqartoq

Maannakkut Qapiarfiusaami attartortut tamarmik Nuummi Namminersorlutik Oqartussat inissiaataanni taartaasumik initaarnissaminnik neqeroorfigineqassapput inigisartik isaterneqalerpat. Inissiaq taartaasussaq pitsaassutsikkut ineqarnermullu akitigut sapinngisamik maannakkut inissiannut assersuunneqarsinnaassaaq, attartortulli aamma inissiamik nutaanerusumik qaffasinnerusunik ineqarnermut akilimmik toqqaasinnaapput.

- Isaterinissaq sioqqullugu attartortut tamaviisa ataasiakkaarlugit oqaloqatigineqassapput Nuummi Namminersorlutik Oqartussat inissiaataanni allani sumut nuukkusussinnaanersut, ilaatigullu ineqarnermut aki suussanersoq naatsorsuutigisinnaassaneraat, Ineqarnermut attaveqaasersuutinullu Naalakkersuisoqarfimmi sanaartornermut pisortaq Embla Kristjánsdóttir Sermitsiamut oqarpoq.

Attartortut inissianut Qapiarfiusaami sumiiffimmi tassani sananeqartussanut salliutinneqassapput, taamanikkussamulli ineqarnermut aki atuuttoq atorlugu. Attartortut inissiassanut nutaanut uteqqikkusussappata inisseeqqikkallarnissamut pisariaqartitsineq annikillisarniarlugu, akeqanngitsumik tunniussinermi piumasaqaataavoq Illuut A/S-ip sapinngisamik inissiatoqqanik isaterineq immikkoortukkaartumik ingerlatissagaa, taamaalillutik attartortut sapinngisamik amerlanerpaat sumiiffimmi inissiamut taartaasussamut toqqaannartumik nuussinnaallutik.

Sumiiffimmi tassani inissiamut nutaamut Illuut A/S-imit pigineqartumut nooqqissinnaanermik attartortunut neqerooruteqarneq Siumumiit Erik Jensenimit ernummatigineqarpoq.

Ineqarnermut Attaveqaasersuutinullu Naalakkersuisutut apriilimi 2023-mi nuannaarutigaa Illuut A/S-ip Qatserisuni (Mestervejiusimasumi) inissiarsuit portusuut pingasut pisiarimmagit. Akiat: Peqqinnissaqarfimmi sulisunut inissianut 300 millionit koruunit.

Nuannaarnerali tassunga killeqarpoq qaammammut ineqarnermut aki takugamiuk: Inissiarsuarmut marlunnik initaqartumut 11.171 koruunit, sisamanillu initaqartumut 17.496 koruunit saniatigut innaallagissamut, imermut kiassarnermullu akiligassaq. Akit qaffasinnerujussuisigut peqqinnissaqarfimmi sulisut inissiami najugaqarnissaminnut akissaqanngillat.

Erik Jensen aningaasaqarnermut akileraartarnermullu ataatsimiititaliami siulittaasutut maanna ernumavoq, Illuup Qapiarfiusaami inissianik akisussaaffeqalerneratigut Qatserisuni pisutut pisoqarumaassanersoq aarleqqutigaa.

Ataatsimiititaliami amerlanerussuteqartut inissiarsuit aqqaneq marluk 141-nik initaqartut akeqanngitsumik Illuut A/S-imut tunniunneqassasut akuersissutigaat, saniatigulli piumasaralugu akinik tupatsitaarujussuarnissaq pinngitsoortinniarlugu inissiani nutaani qaammammut ineqarnermut aki naatsorsorneqassasoq.

- Kalaaleqativut Qapiarfiusaami inissiat isaterneqarlutik nutaanik sanaartoqqinnerup kingornagut aamma tassani najugaqarnissaminnut akissaqarnissaat qulakkeerniarparput, Erik Jensen Sermitsiamut oqarpoq.

Qapiarfiusaami suliniut 2026-mut Illuut A/S-ip aningaasaliinissamut periusissiaaniippoq tamanna sioqqullugu Naalakkersuisunit akuerineqareersimasussaq.

Ineqarnermi iluanaarniapilunneq

Inissiaatileqatigiiffik sanaartornermi realkreditimik taarsigassarsinikkut aamma periarfissaqarpoq. Illuup inissiarsuit aqqaneq-marluk ilaat namminersorlutik aningaasaliisartunut tunisinnaavaat, taamaattorli inissianik nutaanik 141-nik sanaartornissamik piumasaqaat eqquutsissinnaallugu. Maannakkut inissiat tamarmik quleriit marluupput, sumiiffimmili sanaartornissami quleriit arfineq-pingasuusinnaapput, soorlu tamanna Nuummi Tuapannguani Dronning Igridsvejimilu pisoq, Qinngutsinnilu Suloqqami.

Namminersortunullu aningaasaliisartunut tunisinissamik periarfissaq tamanna aamma aningaasaqarnermut akileraartarnermullu ataatsimiititaliamit ernummatigineqarpoq, Naalakkersuisunullu piumasaqarput qulakkeeqqullugu ineqarnermi iluanaarniapiluttartunit pisariarineqannginnissaat.

Ineqarnermut attaveqaasersuutinullu Naalakkersuisoqarfimmi nassuerutigineqarpoq ima pisoqarsinnaasoq inissiat ineqarnermi iluanaarniapiluttartunit pisiarineqartut, taamaalillunilu ineqarnermut aki qaffalluni.

- Ineqarnermi iluanaarniapiluttartunik attartornermut akinik qaffaaniarluni pisiortornissamut akiuniarneq attartornermut inatsisissami qitiuvoq, namminersortut inissiaataanni attartornermut akeqartitsinissamut aalajangersagaqarluni, sanaartornermut pisortaq Embla Kristjánsdóttir oqarpoq.

Illuummit namminermit aamma aalajangerneqarsinnaavoq 141-nik inissialiornissamik piumasaqaammit amerlanerusunik nammineq sanaartornissaq, inissiallu sinneruttut niuerfimmi akit naapertorlugit tunineqarlutik. Taamaaliortoqarsinnaavoq inissiat inuerunneranni ataasiakkaarlugit tunineranni.

- Qapiarfiusaami inissiat Illuummit tiguneqarpata naatsorsuutigineqarpoq inissiat attartortittakkat tamakkiisut amerlinissaat, taamaalilluni amerlanerit periarfissaqalerlutik akit naapertuuttut atorlugit attartornissaminnut niuerfimmi namminersortunut naleqqiullugu, Nuummi tatineqaataaqisumi. Saniatigut Illuutip taartissanik sanaartornera sanaartornermik ingerlatsinermi patajaallisaataasinnaavoq namminersorlutik aningaasaliisartunut iluanaarfiusorsuunnginnerani, sanaartornermut pisortaq Embla Kristánsdóttir oqarpoq.