Qaqortumi Eqqartuussivik annertuumik aserorteriffigineqarsimasoq
Sapaatip akunnerata naanerani tallimanngornerup arfininngornerullu akornanni unnuakkut piffissami suli ilisimaneqanngitsumi, Qaqortumi Eqqartuussivik annertuumik aserorteriffigineqarpoq. Kalaallit Nunaanni Politiit innuttaasuut kaammattuipput, aserorterineq pillugu paasissutissanik pigisaqarsinnaasut politiinut attaviginneqqullugit.
Maluginiagassaq: Assilisat amerlanerusut takukkit assilisap siulliup tikkuutaa toorlugu.
Arfininngornermi ullaakkut nalunaaqutaq 08:43 Kalaallit Nunaanni Politiinut nalunaarutiginnittoqarpoq Qaqortumi eqqartuussivimmi annertuumik aserorterisoqarsimanera pillugu.
Kalaallit Nunaanni Politiit nakkutilliisuutitaasa pisortaat, Malik Olesen oqaluttuarpoq politiit misissuinerat maanna ingerlasoq, taassumalu kaammattuutigaa innuttaasut aserorterisoqarsimaneranik takunnissimasinnaasut imaluunniit paasissutissanik pigisaqarsinnaasut Kalaallit Nunaanni Politiinut attaveqaqqullugit 70 14 48-mut.
Takusaq tuparujussuarnartoq alanartorlu
Kujallermi eqqartuussisuuneq, Pia Hjort Larsen aamma suleqatai tupannaqisumik takunnipput, arfininngornermi ullaakkut takugamikku illorsuup igalaavisa amerlanersai aserorneqarsimasut:
- Takusarput assut tupannarpoq alianarlunilu, paasinarsivormi eqqartuussiviup illutaani igalaarpassuit sequtserneqarsimasut. Maanna igalaat qisunnik matoorarneqarsimapput, illullu iluani igalaaqarfiit amerlanersaat qisunnik matoorneqarsimasut isersimaffigissallugu assut tujorminarpoq, Eqqartuussivik Kujallermi eqqartuussisuuneq, Pia Hjort Larsen, Sermitsiamut oqaluttuarpoq.
Taanna ilisimatitsivoq igalaanik nutaanik inniminniisoqarnera ikkussuinissarlu sivisussasoq, ilanngullugu erseqqissaatigaa suli nalunarallartoq aserorterineq qanoq kinguneqassanersoq, ammasarfiit pilersaarutillu eqqarsaatigalugit.
- Pisimasoq suli nutaajuvoq, taamaattumik piffissami matumani oqaatigisinnaanngilarput aserorterineq suliffeqarfitsinni ingerlatsinitsinnut qanoq sunniuteqassanersoq, igalaat aserorterneqarsimasut tamarmik taarsersorneqarsimalernissaasa tungaanut. Tamanna assut ajuusaarnarpoq, pingaartumik meeqqanik oqaloqatigiittarfipput ilanngullugu igalaajarneqarsimammat assut ajuusaarnarpoq, Eqqartuussivik Kujallermi eqqartuussisuuneq, Pia Hjort Larsen, Sermitsiamut oqaluttuarpoq.
