Sapaatip akunnerata naanerata aallartinnera ulapaarfiusoq: Imigassartorsimatillutik biilertut eqqissiviilliortitsinerillu
Sapaatip akunnerata naanera aallartilaaginnarnerani Kalaallit Nunaata Politiivi ulapaarlutik aallartereerput. Inuit marluk imigassartorsimatillutik biilertut tigusarineqarput. Saniatigut angerlarsimaffimmi eqqissiviilliornerit arlallit nalunaarutigineqarlutik.
Assiliisoq: Leiff Josefsen
Illoqarfiliassaguit aalakoornartutussaguillu taxarit busserlutilluunniit imaluunniit arlaata biiliullitit.
Biilit aqquserngup sinaanut maggupput, paasinarsivorlu aquttoq imigassartorsimatilluni biilernernimi ajutoorsimasoq. Kalaallit Nunaata Politiivi aamma nalunaarfigineqarput biilit sangujoraarlutik ingerlasut, aamma paasinarsivoq aquttoq alla imigassartorsimasoq.
Tamanna aaversinnikkut uppernarsarneqarpoq.
Kalaallit Nunaanni Politiivini pigaartut pisortaat, Aputsiaq Hansen mianersoqqusivoq. Aalakoornartortalinnik imigassartortoqassamaartilluni biilinnginnissaq kaammattuutigaa.
- Inuup aalakoortilluni aalajangiisinnaassusaa appasittumiittarpoq, taamaalilluni aalakoortilluni biilerneq ulorianarsisarpoq aamma inunnut allanut. Ingammik ukiuunerani nittaatsillugu aqqusinerlu quasatsillugu. Taxarit busserlutilluunniit aamma allamit biiliutsissinnaavutit, Aputsiaq Hansen kaammattuilluni oqarpoq.
Taakkua saniatigut angerlarsimaffimmi eqqissiviilliortitsinerit imminullu toqunnissamik siorasaarinerit politiinut nalunaarutigineqarput.
