Qasigiannguani, Qeqertarsuarmi Kangaatsiamilu suluusalinnut mittarfiliornissamut piareersartoqartariaqarpoq

Aqqusernit mittarfissap tungaanukartut suliarineqarsimatinnagit suluusalinnut mittarfiliassat sanaartorneqarlutik aallartinnissaat ajornakusoorsinnaapput. Taamaattumik Kommune Qeqertalimmi kommunalbestyrelsimi ilaasortaq, Aqqa Samuelsen isumaqarpoq Qasigiannguani, Qeqertarsuarmi Kangaatsiamilu suluusalinnut mittarfiliornissamut piareersaatit aallartinneqartariaqartut.

Kommuni Qasigiannguani, Qeqertarsuarmi Kangaatsiamilu suluusalinnut mittarfiliornissamut piareersartariaqarpoq.

Mittarfiliornissamut suliniutit Naalakkersuisut suliassaqarfigaat, taamaakkaluartoq kommuni suliniutit pillugit siuarsimasariaqartoq, Kommune Qeqertalimmi kommunalbestyrelsimi ilaasortaq, Aqqa Samuelsen isumaqarpoq.

- Aqqusernit mittarfissap tungaanukartut suliarineqarsimatinnagit suluusalinnut mittarfiliassat sanaartorneqarlutik aallartinnissaat ajornakusoorsinnaapput. Aqqusernit suluusalinnut mittarfiliassat tungaanukartut suliaralugit aallartinnerisigut kommunitut mittarfittaarnissatsinnut soqutiginninnerput takutittariaqarparput, Aqqa Samuelsen siunnersuutimini sisamanngornermi oqaluuserineqartussami allappoq.

Naalakkersuisuni Inatsisartunilu oqaluuserineqartoq

Aqqa Samuelsen naapertorlugu Naalakkersuisuni Inatsisartunilu Kommune Qeqertalimmi suluusalinnut mittarfiliassat oqallisaasarsimapput, assigiinngitsunillu isummersorfigineqarlutik Aningaasanut inatsimmiit peerneqarlutillu ikkuteqqinneqartarsimallutik.

- Kommune Qeqertalimmi suluusalinnut mittarfiliassat oqallisigiinnarnagit maannakkut timitaliiniarluni suliniutit aallartittariaqarput, Aqqa Samuelsen allappoq nangillunilu:

- Qasigiannguani, Qeqertarsuarmi Kangaatsiamilu siunissami suluusalinnut mittarfiliornissamut piareersaatit piviusorsiortumik aallartittariaqarput.

- Suluusalinnut mittarfiit Kommune Qeqertalimmi angallannikkut takornariaqarnikkullu inerisaanissamut iluaqutaasussaapput. Kommunitut soqutigalugu suliassaq pimoorullugu maannangaaq aallartittariaqarparput.

Aqqa Samuelsenip siunnersuutaa kommunalbestyrelsimi sisamanngornermi oqaluuserineqassaaq.

Allattoqarfimmit inassuteqaatigineqarpoq Kommunalbestyrelse isummissasoq siunnersuut ingerlaqqissanersoq imaluunniit ingerlaqqissannginnersoq.

Powered by Labrador CMS