Qasukkarsimaarujussuarneq aamma Quasimodo

»Yin Yogarlutit timi eqqarsartaaserlu isumagikkit«.

Yoga Nuanip facebookimi quppernerani taama allassimasoqarpoq. AAP, qujanaq, tamaviaalaarlunga eqqarsarpunga. Taartaleqqippoq, ilaannikkullu naqisimanarsinnaavoq. Timimik eqqarsartaatsimillu isumaginninneq ukiakkut silap nillertinnerani isumassarsiatsialaarpasippoq.

Timigissarneq peqataaffigisassara Yoga Nuanimit aaqqissorneqarpoq.

‘Nuuk Shotokan Karate-Do’p illutaanut Nuummi Illorsuup Timersortarfiup eqqaaniittumukarpunga. Illu qernertuullunilu aappaluttumik qalipaatilimmik isaariaqarpoq, inuillu takkussuutilereersimapput. Minutsit 30 missaanniittut qaangiuppata timigissarneq aallartissaaq. Lene Kaastrup Nielsenip uanga yogartartullu 14-it allat ilitsersortussaavaatigut. Yogartarfimmik Yoga Nuanimik piginnittoq.

Yin yoga siornatigut misilinnikuunngisaannarpara, inuillu allat 14-it ilagalugit assigiinngitsunik misileraanissaq eqqanakujuppoq.

Yin yoga sallaatsumik yogartariaasiuvoq. Taamaaliornikkut arnanut naleqqunnerusumik yogartoqartarpoq. Yogartariaatsimimi pineqartumi nukkassartoqarneq ajorpoq. Annerpaartaa qasoornissamut tunngavoq. Yogartariaatsimi matumani ipinerit aamma tasitsaarneqartarput, taamaaliornikkut eqaannerusumik timeqalertoqarsinnaavoq.

- Tikilluarit, Lenep matup eqqaani qungujulluni oqarfigaanga.

- Qujan, inussiarnerlunilu oqaloqatigiuminarmat oqiliallallunga qungujuppunga.

Lene qujanaq. Atortut assigiinngitsut aassagikka qinnuigaanga; yogarnermi allequtaq, tippit marluk, yogarnermi akisaasaq takisuujullunilu qituttoq, blokkit tunguusat marluk, yogarnermi qitequt arsaaqqallu tennisserutit pingasut.

Soqutiginaq, atortut tamaasa ataatsikkut tigumminiarsariitigalugit eqqarsarpunga, natermullu ingillunga. Ini angillunilu inituvoq.

Yogarfissanngormat ilitsersuisutta “qaqqatut” inissittariaaseq, aamma Tadasanamik taaneqartartoq, atorlugu nikueqquaatigut. Tassa qiteq narlortillugu nikorfaneq.

Inuit 15-iugaluarluta tattoqisaattutut misinnanngilaq. Eqqissillunga misileraasinnaallungalu ‘kisimiittutut’ misigisinnaavunga, piffissamilu tassani iluarpoq.

Qungujullunga eqaarsaarnermi aalariaatsit anersaartoriaatsillu pisariunerit misilissallugit piareersimaffigisutut misigaakka. Akunneq ataaseq sinnilaarlugu qaangiuppat isarukitsutut qerataqisutut pisussallunga naluara.

Lotusitut, imaluunniit uanga lotusiusorisattut, inissippunga. Malugilerpara siumut peqillunga issiallunga, Victor Hugollu atuakkiaani Quasimododut misigaanga. Qitera narlortipallariarlugu ilakka qiviarpakka. Aallarterlaatut misigeqaanga.

Yin yoga anguniagaqarluni yogartariaasiunngilaq, timilli eqqarsartaatsillu oqimaaqatigiissumik sulinissaat anguniarneqartarput. Yin yogartartorpassuit aamma chakratik isumagalugillu ujaqqanik atuisaramik ataatsimut isiginninnerusumik yogap silarsuaani periuseqarput.

Arsaq naami tammartoq

Maanna arsaaqqat tenniserutit atussavagut. Nikuilluta arsaaraq tutillugu siumut utimullu isikkatsinnik ingerlaartillugu isikkagut tagiartorpagut. Arsaaqqap manngernera isikkanut iluaqaaq. Minutsialuit qaangiummata ilitsersuisup isikkagut illuttut natermut tutsillugit nikueqquaatigut. Isikkap illua arsaaqqamik tagiartornikuusarput tunnganerusutut misinnarpoq. Soorlu tassa natermut atassuteqalersimasoq.

- Uuh, eqqumiik, eqqarsarpunga qungujullungalu.

Isikkatta illua tagiartoreeratsigu arsaaqqat aqajatta allersaanut ilillugit pallussasugut ilitsersuisutta oqarfigaatigut.

- Arraa, tupaallakujuppunga. Asaaqqat angakkuakkatut aqajannut tammarnissaat annernarpasik. Qanoq?!, eqqarsarpunga.

Periuseq arnanut naartusunut naleqqutinngitsoq ilitsersuisoq nassuiaavoq. Naartoqqinnginnissamut patsisissatsialak, eqqarsarlunga pallorpunga. Arsaaqqat aqajama ataanut ilisakka tupaallannartumik malugisinnaanngingajaavippakka.

Minutsini pingasuni sisamaniluunniit pallungavugut, taamaalillungali timinni susoqarnersoq maluginiarnissaanut periarfissaqarpunga. Eqqumiiginarsinnaavoq, timilli allatut malugisinnaanera iluaqaaq. Aammali timi allanartumik inissisimatillugu inuit allat akornanneq unammillernarsinnaammat ilaannikkut nilliaatigalunga aniartornissara eqqarsaatigisarpara.

Yin yoga arriitsuararsuarmik ingerlariaaseqarpoq. Tassami yogami inissisimaffiit tamarmik minutsini pingasuniit tallimanut sivisussusilimmik inissisimaffigineqakkajupput. Yogariaatsinut allanut sanilliullugu sivisuginarsinnaavoq. Piffissaqarluartilluni inisseriaatsit sungiulluarneqarsinnaapput, timimilu inissaqarnerulersutut misinnarpoq.

Arsaaqqat atorlugit assigiinngitsunik sungiusareerluta nallarluta yogarnermi qitequt qaqortoq atortussanngorparput. Qitequt tigoriarlugu ulamertunngorlugulu qileriarlugu siutigut asserlugit isikkatsinnullu inississavarput. Taava qitequt iluaqutigalugu niu 90 gradinngoqqissaarlugu siaarneqassaaq. Niu siaaqqissaassaaq. Niuga peqinniaannarmat qitequt atorlugu angisuumik ulamertuliortariaqarpunga.

- Eqarpallaarpunga, eqqarsarpunga imminullu illaatigilaarlunga.

Niukka qujanaq

Ilitsersuisup Lenep ikiorlungalu isumagaanga, tamannalu toqqissiallaatigaara. Niukka qeratagaluartut inissisimariaaseq qasoornarlunilu niukka oqilisut malugisinnaavakka. Niunut peqqinnaq.

Niukka qujamasuutigisupilussuanngorpakka, sunummi tamanut nammappaannga. Ulloq naallugu ukiut 33-it inuunera tamaat nammappaannga. Niukka asallugit malugisimasaqannginninniit silattoqqillunga nikuippunga. Makisera sukuttoq malugisinnaavara, iluartumilli.

Inissisimariaaseq nammineq nuannarinerusara tassaavoq ‘meeqqatut inissisimaneq’. Nillornartutut uannut sunniuteqarpoq, tassanilu nukikka siaarpallaanngikkaluarlugit qiteralera tallinerusarpoq. Tuikka qasukkartut allequttamut tupput, timeralu aqitsoq konditorpallaarsimasorlu uppatinniippoq. Iluaq!

- ‘Meeqqatut inissisimaneq’ uippajaaraanni iluaqutaangaatsiarsinnaasoq eqqarsarpunga, tullianilu ernera Brugsenimi kamalerpat suut tamaasa iperarlugit nillataartitsiviit akornanni taamatut inissinniarlunga aalajangerpunga. Namaste.

Yogariaaseq yin yoga består assigiinngitsunik katillugit 25-inik inisseriaaseqarpoq. Inisseriaatsit tamarmik timimut annertuumik sunniuteqarlutillu iluaqutaasarput, nukiunngitsunulli ipinernut sunniuteqartaramik iluaqutaapput. Inissisimariaatsittaaq timimi nukissap ingerlaarnera sunnertarpaa, taamaaliornikkullu erlaviit aamma sunnerneqartarput.

Nalunaaqutaq qiviarakku akunneq ataaseq sinnilaarlugu ingerlareersimalerpoq. Timigissarnerup naammassinissaanut minutsit quliinnanngoreersimapput.

- Kaar, piffissaq taamak sukkatigisumik ingerlasimasoq maluginngilara, tupaallallunga eqqarsarpunga.

Timigissarnermi sungiusaat kingulleq tassaavoq nallarluni tippimik qipilluni eqqissisimaarnissaq. Aama ingerlarasaarnera anersaartorneralu malugilluarsinnaaleriasaarpakka. Iluartumik qasuvunga, ulluinnarnilu unammillernartut nukissaqarfiginerulerlugit misigaanga. Nikuikkama makisera sukangasorujussuusoq malugisinnaavara. Timima taamatut tasitsaarnissaa pisariaqartissimavara.

Angerlarpunga – isarukitsutut qeratatigalunga – ukiallu nillernera ulussanni malugisinnaallugu eqqissiallassimaqaanga. Wow, yoga nuan!