QEQQATA KOMMUNIA
Qeqqata Kommuniani innuttaasut novembarip 26-ani taasitinneqassapput
Qeqqata Kommuniani kommunalbestyrelse aalajangerpoq Qeqqata Kommunia avinneqassanersoq pillugu novembarip 26-ani innuttaasunik taasititsinissaq ingerlanneqassasoq.
Sisimiuni Maniitsumilu innuttaasut kommunillu nunaqarfii arfinillit pingasunngornermi novembarip 26-ani ukioq manna taasisussanngorput.
Assinik takussutissiortoq: Linda Lyberth Rachlitz
Pingaartumik Qeqqata Kommuniani kommunalpolitikerit 2009-mili nalornissutigaat Maniitsup kommuniata Sisimiullu kommuniata kattunneqarnerat isumassarsialatsiaasimanersoq.
Sumiiffimmi politikereqarpoq misigisimasunik pinngitsaalisaallutik kattutsinneqarsimasunik, illuatungaanilu sumiiffimmi politikereqarpoq takunnissinnaanerartunik kattussimanertik iluaqutissartaqartoq.
Kommunimi oqallinneq siumut utimullu ingerlasimavoq ukiut 15-it sinnerlugit. Maanna piffissanngorpoq missingersuutaasumik innuttaasunik taasisitsisoqarnissaanut, tassungalu atatillugu kommunalbestyrelsi marlunnik periarfissinneqarpoq taasisitsineq qaqugu pissanersoq, tassa pingasunngorneq 26. november 2025 imaluunniit pingasunngorneq 28. januar 2026.
Innuttaasunik taasititsineq sivisuumik oqaluuserineqareerluni kommunalbestyrelsimit aalajangerneqarpoq pingasunngorneq 26. november 2025. Taamaalillutik kommunimi innuttaasut periarfissinneqarput politikkikkut sinniisaminnut oqariartuuteqarnissamut kommunip avissaartinneqarnissaa piviusunngortinneqassanersoq imaluunniit kommuni ilusimisut ingerlaannassanersoq.
Kommunit pillugit oqaloqatigiinnerit annertuut siunitsinniipput
Taamaattorli Maniitsup Sisimiullu akornanni saqitsaattarnerit kisimiinngillat. Kujataani aamma kommunip illoqarfiisa akornanni saqitsaattarnerit annertupput, pingaartumik Nanortalik kommunillu sinnera.
Kommunip nunaata isikkua ullumikkut imaappoq - 2029-mi kommunip avissaartinnissaanut periarfissaqalissaaq, kommunip avissaartinnissaanut periarfissaqalissaaq.
Kilde: Danmarks nationallexicon - Grafisk illustration: Asiaq
Taamaattumik Naalakkersuisut Inatsisartut peqatigalugit misissuisitsineq annertooq aallartinnikuuaat, taamaalillutik innuttaasut politikerillu sumiiffimmiittut kommunip aaqqissuussaanera pillugu paasissutissinneqarsimanertik tunngavigalugu nalilersuisinnaaniassammata.
- Naalakkersuisooqatigiit kommunit avinneqarsinnaanerat pillugu suliniutit ingerlareersut nangittumik suliarissavaat. Naalakkersuisooqatigiit kommuninilu nutaamik aaqqissuussinissamik kissaateqartoqarnera pisariaqartitsisoqarneralu akueralugu qinigaaffimmi aggersumi nangittumik suliaq pingaartillugu sulissapput. Kommunit aaqqissuussaaneri nutaaliorfiussapput, innuttaasut sumiiffimminni tamat oqartussaaqataanerat qanimut malugissavaat pisortallu ingerlatsinerinut tatiginninnerup annertunerulersinneqarnissaa siunertaralugu nutaaliortoqassaaq.
Allatut oqaatigalugu, 2029-mi kommunit aaqqissuussaanerisa nutaamik aaqqissuuteqqinneqarnissaat anguniarneqarpoq. Kisianni Qeqqata Kommuniani innuttaasut ukioq naatinnagu taasitinneqariissapput.
