Suut tamarmik ineriartornissaat Nitterip ilimagaa

Air Greenlandip pisortaanera Jacob Nitter Sørensen nalinginnaasumiit nuannaarnerullunilu iluarisimaarinninneroqaaq, suliffeqarfik toqqaannartumik Københavnimiit Ilulissanut sisamanngornermi, illoqarfiup iluliaqarluartup mittarfittaavata ulloq taanna ammarneqarnerani siullerpaamik timmisartuusserngaarmat.

- Illoqarfimmut allannguutaassaaq, inuussutissarsiornermut annermillu takornariaqarnermut, Købehavnimiit toqqaannartumik timmisartornerup nalunaaqquttap akunnerinik sisamat misaannik sivisussuseqartup ingerlanerani, pisortaq Serimitsiamut taama oqaluttuarpoq.

- Ilulissani ineriartortitsinissamut aporfiusimasut annertuut ilaat maanna peerneqarpoq. Maanna Ilulissat Europamut akunnialuinnarnik ungasissuseqalerpoq – tamannalu illoqarfiup tikeraarneqarnerulerneranik qularutissaanngitsumik kinguneqarumaarpoq. Suut tamarmik ineriartorfiujumaarput.

- Taamaattoqarnera Nuummi aamma takuarput, mittarfik tassani ammarneqarmat. Tikeraat nunarsuarmi tamalaanersut takkussuupput – takornariaqarnerlu annertuserujussuarpoq. Ilulissani aamma taama pisoqarumaarpoq.

Pisoqarfik nillataartoq

Ilulissat ukiuunerani takornariaqarfissuanngornissaa Jacob Nitterip ilimagaa.

- Ilullisat Kangia kisimi pineqanngilaq. Arsarnernik takornarianut, qimusserianut, qamuteralannik takornarianut nerisassanillu pitsaasunik misileerusuttunut periarfissaqarpoq. Ilulissat periarfissaqangaarmat kikkut tamarmik inissaqartinneqarput – tamanullu neqeroorutissaqarpoq.

- Siullertut, mittarfittaap takornarialerineq Ilulissani ukioq kaajallallugu inuussutissarsiutinngortissavaa. Akunnittarfiit imminut akilersinnaanerulissapput immaqa aamma amerlanerit akunnittarfilerinermut aningaasaleerusulernissaannik kinguneqassaaq. Ineriartorneq aamma takornarialerisunit malugineqarumaarpoq, Jacob Nitter Sørensen naqissusiivoq.

- Ukioq kaajallallugu suliassaqarpat takornarialerineq ineriartortikkusunnarsissaaq, takornarialerisuuneq, akunnittarfilerisuuneq imaluunnit nerinartarfilerisuuneq apeqqutaatinnagit.

- Kangiatali Ilulissani takornariaqarnermut pingaaruteqassusaa puigorneqassanngilaq, pisortaq isumaqarpoq.

- Taannaavoq takorusunneqarnerpaaq. Nunarsuaq tamakkerlugu ilisimaneqarpoq – Kangia tassaavoq Ilulissani takornariaqarnermi ingerlaartitsisoq. Kangia takornarianit pinngitsoorneqarsinnaanngilaq – ingammik takornarianut inuunerminni ataasiaannarlutik periarfissaqarlutik Kalaallit Nunaannukartunit.

Air Greenland torrallaaqataavoq

Jacob Nitter Sørensen nammineq aamma suliami akuuvoq, Air Greenlandimi nammineq aamma Ilulissani inuussutissarsiornermi pingaartumik inissisimavoq. Arctic Hospitality Group suliffeqarfimmit pigineqarpoq, Hotel Arctic, Ilimanaq Lodge aamma Eqi Glacier Lodge tassannga ingerlanneqarlutik.

- Ilulissani eqqaanilu suliffeqarfiutitsinnut soorunami aamma kinguneqassaaq. Mittarfittaarnissap ilimanarsinera ilaatigut pissutigalugu, ukiut marluk matuma siorna Eqip pitsanngorsarnissaa annertusarnissaalu aningaasaliivigaarput, Jacob Nitter Sørensen nassuiaavoq.

- Kisianna taanna pillugu nuannaanngilanga. Ilulissani periarfissaqangaarmat kikkut tamarmik inissaqartinneqarput. Mittarfittaassaq pillugu aalajangerneq pingaaruteqangaamat kingunissai tamaasa takusinnaanngilagut. Ukiut qulit qaangiuppata passisinnaanavianngilarput sooq oqallisigineqartariaqarsimanersoq, Air Greenlandip pisortaa naqissusiivoq.