ANGERLARSIMAFFEQANNGINNEQ
Qiianarsiartorpoq – 500-ngajaat angerlarsimaffeqanngillat
Naleraq § 37 naapertorlugu angerlarsimaffeqanngitsuuneq pillugu arlalinnik apeqquteqaateqarnikuuvoq, tassani pingaarnerusutut ujartorneqarluni Naalakkersuisut angerlarsimaffeqanngitsuuneq pillugu qanoq isumaliuteqarnersut aammalu iliuusissat suut maanna ingerlanneqarnersut.
Ilisimatusarfik siullermeerluni nunatsinni angerlarsimaffeqanngitsunik kisitsivoq 2022-mi. Taamani misissuinerup takutippaa, inuit katillugit 491 angerlarsimaffeqanngitsut kommuniini tamani agguataarsimasut, taakkunannga 356-it angutaapput 135-it arnaallutik.
Asseq toqqorsivimmit: Leiff Josefsen
Naalakkersuisooqatigiit siuliisa politikkikkut sammisassat ilagaat kommunit peqatigalugit suleqatigiinnikkut angerlarsimaffeqannginnermut periusissiap timitalersorneqarnissaa.
ANGERLARSIMAFFEQANNGITSUT KOMMUNINUT AGGUATAARSIMANERAT
2022-mi katillugit 491 angerlarsimaffeqanngillat, taakkunannga 356-it angutaapput 135-llu arnaallutik.
2022-mi Kommune Kujallermi angerlarsimaffeqanngitsut 106-iupput. 77-it angutaallutik arnat 29-iusut.
2022-mi Kommuneqarfik Sermersuumi angerlarsimaffeqanngitsut 258-iupput. 185-it angutaalælutik 73-illu arnaallutik.
2022-mi Qeqqata Kommuniani angerlarsimaffeqanngitsut 24-iupput. 20-it angutit arlallu sisamat.
2022-mi Avannaata Kommuniani angerlarsimaffeqanngitsut 87-iupput. angutit 64-it arnallu 23-it.
2022-mi Kommune Qeqertalimmi angerlarsimaffeqanngitsut 16-iupput. Angutit qulit arnallu arfinillit.
Paasissutissat: Angerlarsimaffeqanngitsunik kisitsisineq pillugu Hans Enoksenip § 37 apeqqutaanut akissut.
Naalakkersuisut nutaat qinersereernerup kingorna aalajangerput "angerlarsimaffeqannginnermut pilersaarut sapinngisamik ingerlateqqinniarlugu", taamak akissuteqarpoq isumaginninnermut, suliffeqarnermut, nunamut Namminermut Avatangiisinullu Naalakkersuisoq, Bentiaraq Ottosen (A) Naleraq sinnerlugu Inatsisartuni ilaasortaq Jens NapãtôK’s § 37 naapertorlugu apeqqutaanut.
Pilersaarutip pingaarnertut oqaasertaa tassaavoq "kikkut tamarmik pitsaasumik inuuneqarsinnaatitaapput", periusissiarlu januaarimi 2023-imi saqqummiunneqarpoq. Angerlarsimaffeqanngitsut qanoq amerlatigisut periusissiaq pineqartoq tunngavigalugu angerlarsimaffeqanngitsuunermit aniguisimanersut, eqqortumik paasissutissaatigineqanngilaq.
- Maanna suli angerlarsimaffeqanngisut assut suli takussaapput sorluluunniit amerleriaannarsimasut ajoraluartumik takussaangaarmata.
Ilisimatusarneq siunnerfiuneqartut qanoq atorenqarnerat malinnaaffgiineqarpa kisitsisit qanqo malinnaatinneqarpat– Nuup iluani, sinerissami illoqarfinni nunaqarfinnilu.
Aasaq naajartulerpoq sila qiianarseqqilerpoq angelersimaffeqanngitsut ikilisartariaqarnerat siunnerfiunikuusut pillugit piumasarivara periusissiamik ingerlatsineq pissusissamisut ingerlanersoq imaluunniit uninngatiinnarneqaqqissimanersoq. Aammalu paaserusunnarpoq qanoq atuutsinneqarnissaa Naalakkersuisut qulakkeersimaneraat suliniutit nunap tamakkerlugu iluaqutaasinnaanissaat anguniarlugu iliuuseqarnerminni, NapãtôK’ apeqqutiminik ilaatigut tunngavilersuivoq.
Anguniakkanik piviusunngortitsinissamut unammilligassat annertusut
Periusissiaq matumani pineqartoq ersarikkaluaqisoq, inuit angerlarsimaffeqanngitsut amerlassutsimikkut ikiliartunngitsutut isikkoqarpoq. Taamaattorli Naalakkersuisut ilisimatitsipput Ilisimatusarfik suleqatigalugu 2026-imi angerlarsimaffeqanngitsunik kisitsisoqaqqissasoq.
Bentiaraq Ottosenip Jens NapãtôK’-mut akissuteqaammini aamma oqaatigaa suliniutit 13-it akornanni suliniutit pingasut kisimik piviusunngorsimasut. Tassa angerlarsimaffeqannginnermut nassuiaat, angerlarsimaffeqanngitsunik kisitsineq kiisalu Nuummi angerlarsimaffeqanngitsunut misiliutaasumik inissiaqartitsineq.
Misileraalluni suliniut angisooq tassaavoq "Housing first" tassanilu siunertaavoq innuttaasut eqqissisimasumik najoruminartumillu najugaqarnissaat, piffissami sivisuumi najugaqarfigisinnaasaminnik neqeroorfigalugit, suliniullu taanna Naalakkersuisut isumaat malillugu neriulluarnartoqarpoq, taamaammallu Naalakkersuisut kissaatigaat illoqarfinnut allanut siammarterusullugu.
Kisianni angerlarsimaffeqannginneq ukiakkut ataatsimiinnermi oqaluuserisassaniinngilaq. Naalakkersuisut angerlarsimaffeqannginnermut periusissiamik ingerlatitseqqikkusummata, periusissiap kingunerisaanik malitseqartitsisoqarnissaa naatsorsuutigineqartussaassaaq
