Qinersinernut atatillugu ullut pingaarutillit
Kalaallit Nunaanni innuttaasut qinersisussaapput, siullermik Inatsisartut qinersisoqassaaq apriilip 11-ani, kingornalu apriilip aallaqqaataani kommunalbestyrelsinut, nunaqarfinnut aqutsisunut aamma ilagiit sinniisaannut. Avataasiortut, ilinniagaqartut peqqissarnermullu atatillugu Danmarkimiittut allallu ullormi qinersivimmi angerlarsimaffimminniissinnaanngitsut allakkatigut qinersisinnaalereernikuupput.
Kingullermik Kalaallit Nunaanni qinersisoqarpoq apriilip 6-ani 2021-mi coronap tuniluuteruttorfiani. Taamanikkut ulloq qinersivissuuvoq, tassa Inatsisartunut qinersineq, kommunalbestyrelsinut qinersineq, nunaqarfinni aqutsisunut qinersineq aamma ilagiit sinniisaannut qinersineq ataatsikkut ingerlanneqarlutik. Maanna Inatsisartunut qinersineq qinersinerit sinnerinut avissaartinneqarpoq, Inatsisartunullu qinersineq marsip 11-ani ingerlanneqassaaq, kommunalbestyrelsinut qinersinernullu allanut qinersinerit sinneri apriilip aallaqqaataani 2025-mi ingerlanneqassallutik.
Assi: Leiff Josefsen
Marlunngornermi februaarip 11-ani partiit nutaat nalunaarutigineqarnissaannut killissarititaasoq kingullerpaajuvoq. Kalaallit Nunaata partiivisa orpissuat nutaamik avalequtitaarpoq, tassalu partii Qulleq, taassuma atsiornerit piumasaqaataasut 860-it missaanniittut katersorsimavai.
Sassartitassat kingusinnerpaamik februaarip 18-ani nalunaarutigineqassapput
Qularnanngitsumik ikigisassaanngitsut eqqarsarfeqarlutik inissisimasimassapput, Inatsisartunut, kommunalbestyrelsimut, nunaqarfinni aqutsisunut imaluunniit aamma ilagiit sinniisaannut qinigassanngortissanerlutik eqqarsaatigalugu.
Sassartitassat nalunaarutigineqarnernissaannut killissarititaasut:
- Inatsisartunut qinersineq: sap. akunn. pingasut sioqqullugit (februaarip 18-ani)
- Kommunalbestyrelsinut: sap. akunn. arfinillit sioqqullugit (februaarip 18-ani)
- Nunaqarfinni aqutsisunut: sap. akunn. marluk sioqqullugit (marsip 18-ani)
- Ilagiinni sinniisunut: sap. akunn. sisamat sioqqullugit (marsip 4-ani)
Qinersinermi allattorsimaffiit aamma maalaaruteqarnissamut piffissaliussat
Qinersinermi allattorsimaffiit saqqummiunneqarnerat (kommune tamakkerlugu):
Inatsisartunut aamma kommunalbestyrelsimut qinersineq: kingusinnerpaamik sapaatit akunneri pingasut sioqqullugit ulluni marlunni tamanut saqqumisumik takusassiarineqassapput.
Maalaaruteqarnissamut piffissaliussat:
Inatsisartunut qinersineq, qinersisartut allattorsimaffiannut ilanngunneqarsimannginnermut qinersinermut ataatsimiititaliamut naammagittaalliuuteqarniaraanni: kingusinnerpaamik ullut marluk qinersinissamut ulloq sioqqullugu.
Inatsisartunut qinersineq, qinersinerup atuutsinneqarneranut naammagittaalliuut, qinersinermut ataatsimiititaliamut tunniunneqassaaq kingusinnerpaamik qinersinerup kingorna ullut arfineq marluk qaangiutsinnagit.
Kommunimut qinersineq, qinersisartut allattorsimaffiannut ilanngunneqarsimannginnermut qinersinermut ataatsimiititaliamut naammagittaalliuut: kingusinnerpaamik ullut marluk qaangiunnerani, qinersisartut allattorsimaffiat saqqummiunneqarsimasoq.
Kommunimut qinersineq, qinersinermut ataatsimiititaliap aalajangiineranut qinersinerup atuutsinneqarneranut naammagittaalliuut: ullut 7-t aalajangiinerup kingorna.
